1996-ից մինչև 2018 թթ. բոլոր ընտրությունները կեղծվել են, բացառություն է 1999-ի «Միասնության» օրինակը. Ալեն Սիմոնյան

«Ես կարծում եմ՝ այդ ոճով, որով այս պահին աշխատում է ընդդիմությունը, այս հարցի քննարկման պարագայում՝ ճիշտ է, որովհետև, երբ խոսքը գնում է ընտրություն կեղծելու մասին, ավելի քիչ խոսելը և զուսպ լինելը ճիշտ մարտավարություն է, քանի որ Քոչարյանի փաստաբանն ընտրություննեը կեղծելու մասին խոսելիս պետք է շատ երկար հետ նայի»: Այս մասին այսօր՝ սեպտեմբերի 13-ին, ԱԺ-ում ասաց ՀՀ ազգային ժողովի նախագահ Ալեն Սիմոնյանը:

«Պատիվ ունեմ»-ի ներկայացուցիչները, երբ փորձում են ԿԸՀ նախագահ Տիգրան Մուկուչյանի կամ վարչապետի պատգամավոր եղած ժամանակվա խոսքերն իրար հակադրելով տպավորություն ստանալ, թե նախկին ընտրությունները կեղծված չեն եղել, դա ապարդյուն աշխատանք է: Թեև տարիներ շարունակ ասվել է, որ ընտրությունները կեղծված չեն, բայց հասարակությունը հստակ իմացել է, որ կեղծված են՝ միաժամանակ վստահեցնելով՝ մարդիկ գիտեն, որ ներկայում անցկացված ընտրությունները կեղծված չեն, լեգիտիմ արտահայտում են իրենց քվեարկությունը: Ուզում եմ մենք մի բան ֆիքսենք՝ ՀՀ-ում 1996 թվականից մինչև 2018 թվական բոլոր ընտրությունները եղել են կեղծված, անցկացվել են մեծ խախտումներով: Թերևս, բացառություն կարող է լինել 1999 թվականի «Միասնություն» դաշինքի օրինակը՝ Վազգեն Սարգսյանի և Կարեն Դեմիրճյանի քաղաքական ուժը, որն, իրոք, մեծ համակրանք ուներ հանրության կողմից: Եվ այդ ընտրությունների հետ կապված որևէ կասկած ես չեմ կարող հայտնել»,-ասաց Սիմոնյանը: