Հզոր Թուրքիան այսօր կարևոր տեղ է գրավում աշխարհում․ Ալիևը հաճոյախառն նամակ է հղել Էրդողանին

Ալիևը հերթական անգամ բաց չի թողել Թուրքիայի նախագահ Ռեջեփ Թայիփ Էրդողանին հաճոյանալու առիթը։ Նա ծավալուն շնորհավորական նամակ է հղել Էրդողանին՝ Հանրապետության օրվա առթիվ՝ բացահայտ կամ տողատակերում գովեստի խոսքեր հղելով նրան և չմոռանալով հշեցնել, որ իրենք «բարեկամական և եղբայրական հարաբերություններ» ունեն։

«Այսօր քաղաքական, տնտեսական և ռազմական առումով ուժեղ Թուրքիան շատ կարևոր տեղ է գրավում միջազգային ասպարեզում։ Ձեր ղեկավարությամբ իրականացվող լայնածավալ ծրագրերն ու նախագծերը ծառայում են եղբայրական երկրի համակողմանի առաջընթացին ու վերելքին»,֊ասել է Ալիևը։

«Ադրբեջանի և Թուրքիայի միջև բարեկամական և եղբայրական հարաբերությունները, որոնք հիմնված են ամուր հիմքերի վրա, ինչպիսիք են ընդհանուր պատմությունը և մեր ժողովուրդների ազգային ու բարոյական արժեքները, մեր միասնության և համերաշխության վառ արտահայտությունն են։ Այսօր մենք ականատես ենք այս հարաբերությունների պատմական շրջանին։ Շուշիի հռչակագրում ամրագրված նպատակներին ու ուղղություններին համապատասխան՝ մեր դաշնակցային հարաբերություններն օրեցօր ընդլայնվում և հարստանում են նոր բովանդակությամբ»,- ասել է Ալիևը։ Նա չի մոռացել նամակում ընդգծել հատկապես Էրդողանի «անուրանալի օգնությունը» Ղարաբաղյան երկրորդ պատերազմում։

«Պատերազմում կարևոր դեր է խաղացել անձամբ Ձեր, եղբայրական թուրքական պետության և ժողովրդի կողմից վճռական, միանշանակ քաղաքական և բարոյական աջակցությունը: Մեր ժողովուրդը երբեք չի մոռանա այս աջակցությունը, որը ևս մեկ անգամ ցույց տվեց ադրբեջանա-թուրքական համերաշխությունն ամբողջ աշխարհին»,- հավելել է Ալիևը։