Անկարան և Երևանը ընդառաջ են գնում միմյանց․ Regnum

Թուրքիայի արտգործնախարար Մևլութ Չավուշօղլուն, ելույթ ունենալով խորհրդարանում, հայտնել էր, որ Անկարան և Երևանը կնշանակեն հատուկ բանագնացներ՝ քննարկելու հարաբերությունների կարգավորման հարցը։ Նրա խոսքով՝ «բոլոր քայլերը կձեռնարկվեն միայն Ադրբեջանի հետ հարաբերությունները կարգավորելուն համապատասխան»։ Միաժամանակ, Չավուշօղլուն հայտարարել է, որ Ստամբուլի և Երևանի միջև կվերսկսվի չարտերային ավիահաղորդակցությունը։ Հիշեցնենք, որ Հայաստանի և Թուրքիայի միջև դիվանագիտական ​​հարաբերություններ չկան, իսկ երկու երկրների սահմանը փակ է 1993 թվականից՝ Անկարայի նախաձեռնությամբ, գրում է Regnum֊ը։

Երկրների միջև բարդ հարաբերությունների պատճառ են հանդիսանում մի շարք հանգամանքներ՝ կապված, մասնավորապես, ղարաբաղյան հարցի և 1915թ. Օսմանյան կայսրությունում Հայոց ցեղասպանության միջազգային ճանաչման գործընթացին Թուրքիայի սուր արձագանքի հետ։ 
Ավելի վաղ Երևանն ու Անկարան արդեն համապատասխան ազդանշաններ են փոխանակել։ Իրադարձությունների բուն զարգացումը տարածաշրջանում 2020 թվականի նոյեմբերի 9-ին խաղաղության համաձայնագրի ստորագրումից հետո, որը վերջ դրեց Ղարաբաղյան երկրորդ պատերազմին և ամրագրեց կողմերի մտադրությունները՝ սկսելու «հաղորդակցության միջանցքների» ապաշրջափակման գործընթացը, գրում է պարբերականը։

Տարածաշրջանում ենթադրվում էր Հայաստանի, Թուրքիայի և Ադրբեջանի հարաբերությունների կարգավորման անխուսափելի ելք։ Թուրքիայի նախագահ Ռեջեփ Թայիփ Էրդողանը հոկտեմբերին Ադրբեջան կատարած այցի ժամանակ խոսել է «Ադրբեջանի, Հայաստանի և Թուրքիայի միջև երկարաժամկետ խաղաղության համար բարենպաստ պայմանների» առկայության մասին։ Միջնորդական ջանքերով գործեց նաև Վրաստանը։ Սակայն բոլորովին վերջերս՝ նոյեմբերի սկզբին, Հայաստանի արտգործնախարար Արարատ Միրզոյանն իր հարցազրույցներից մեկում շեշտեց, որ «Թուրքիայի հետ բանակցություններ չկան»։ Սակայն, կարճ ժամանակ անց, ԱԳՆ խոսնակ Վահան Հունանյանը հայտնեց, որ հայկական կողմը ռուս գործընկերների հետ քննարկումների ժամանակ հայտնել է հայ-թուրքական հարաբերությունները կարգավորելու իր պատրաստակամության մասին։

Տեղեկություններ կան, որ Եվրախորհրդի ղեկավար Շառլ Միշելը Բրյուսելում երկկողմ հանդիպումներ կունենա՝ նախ Հայաստանի վարչապետի, այնուհետև Ադրբեջանի նախագահի հետ, որից հետո Նիկոլ Փաշինյանը և Իլհամ Ալիևը քննարկումներ կունենան նույն հարցի շուրջ՝ նույն օրը երեկոյան՝ Միշելի միջնորդությամբ։ Բանակցությունների օրակարգի հիմնական հարցը սահմանվում է այսպես՝ «կողմերի միջև փոխվստահության մթնոլորտի ապահովում», գրում է Regnum-ը։

Երևանի համար սա «հանգույցների փոփոխություն» է, որը սկսվել է Ղարաբաղյան երկրորդ պատերազմում կրած պարտությունից հետո։ Այս առումով՝ հայ-թուրքական հարաբերությունների որոշակի ջերմացումը Անկարայի և Երևանի հարաբերությունների ողջ համալիրն առանձնացնում է ԼՂ հիմնախնդրի վերջնական լուծման խնդիրներից։ Թուրքիայի համար Հայաստանի հետ հարաբերությունների կառուցման նորմալ մակարդակի հասնելը նշանակում է Անդրկովկասում իր դիրքերի հետագա ամրապնդում։ Սա ավելի մեծ կովկասյան խաղի մի մասն է, որտեղ առաջատար խաղացողներն ունեն իրենց սեփական նկատառումները: Ինչ վերաբերում է Մոսկվային, ապա այն փաստացի վերականգնում է Ռուսաստան-Թուրքիա-Իրան պատմական եռանկյունու ազդեցությունը տարածաշրջանում։ Այժմ խոսքն այն մասին է, որ Թուրքիայի և Հայաստանի միջև հարաբերությունների վերակենդանացումը վերածվի քաղաքական և տնտեսապես կենսունակ նախագծի։ Հակառակ դեպքում, փոփոխությունների նոր քամին դեռ երկար պետք է սպասի, գրում է պարբերականը։