ՔՊ-ականներից ո՞ւմ իր «հետևից» կարող է տանել ուրցաձորցի Ռաֆիկը

Վերլուծական 1 Ապրիլ, 2022 21:45

ՔՊ-ականներից ո՞ւմ իր «հետևից» կարող է տանել ուրցաձորցի Ռաֆիկը

ՀՀ քաղաքաշինության, տեխնիկական և հրդեհային անվտանգության տեսչական մարմնի գեոդեզիայի և հողօգտագործման վերահսկողության վարչությունը ՀՀ հողային օրենսդրության պահանջների խախտման, իրավախախտումներ կատարելու վերաբերյալ հողերի օգտագործման և պահպանման նկատմամբ ստուգումներ է իրականացրել ՀՀ Արարատի մարզի Ուրցաձոր համայնքում։ Ստուգման արդյունքում Տեսչական մարմինը հայտնաբերել է, որ համայնքի ղեկավար Ռաֆիկ Անդրեասյանը տասնյակ խախտումներ է թույլ տվել՝ հողամասեր վարձակալության տալով, օտարելով, մրցույթների հաղթող ճանաչելով իր հետ փոխկապակցված անձանց, ինչպես նաև իր ղեկավարած կառույցի աշխատակցի:

Շատ լավ է, եթե տեսչական մարմնի սուր աչքը նկատել է այս խախտումները, սակայն պետք է բացառվեն երկակի ստանդարտները, իսկ դա նշանակում է, որ նույն խախտումը կամ նմանատիպ խախտումներ կատարած ՔՊ-ական պաշտոնյաները նույնպես պետք է չվրիպեն իրավապահների աչքից:

Դիցուք՝ նախորդ տարվա մարտի 25-ին Սարգիս Միշայի Գրիգորյանը նշանակվել է Լոռու մարզպետարանի Ընտանիքի, կանանց և երեխաների բաժնի պետ, հավանաբար առանց որևէ մրցույթի. որևէ տեղ չկա տեղեկություն, որ տվյալ պաշտոնի համար մրցույթ է կայացել: Եվս մեկ հետաքրքիր փաստ` մարզպետարանում կատարվող բոլոր նշանակումները տեղադրվում են մարզպետարանի ֆեյսբուքյան էջում, իսկ այս մեկի մասին, չգիտես ինչու, լռել են: Ուշագրավը, սակայն, միայն առանց մրցույթի պաշտոնը ստանձնելը չէ: Գրիգորյանը նաև 2018-ին քրեական գործով անցել է որպես ամբաստանյալ:

Եղան նաև մրցույթներ, որտեղ հաղթողը այս կամ այն պաշտոնյայի հետ փոխկապակցված անձ էր: Մամուլի հրապարակումների համաձայն՝ ՊԵԿ-ում տեղի ունեցած օպերատիվ հետախուզության վարչությունան գլխավոր օպերլիազորի երկու հաստիքի համար մրցույթում հաղթել է Սերժ Սարգսյանի օգնականի թոռը՝ Նարեկ Զաքարյանը, ում հայրը՝ Տիգրան Զաքարյանը, ՊԵԿ-ում վարչության պետ է։

Արարատի մարզպետ Գարիկ Սարգսյանն իր բարեկամների պաշտոններին է նշանակում, նա չի հերքում և «չի արդարանում»` ասելով. «Ես ամենևին չեմ արդարանում, արդարանալու համար կասեի՝ ոչ, իմ բարեկամն ու ազգականը չեն»։ Օրինակ, Գարիկ Սարգսյանը Արարատի մարզպետարանում աշխատանքի է ընդունել իր զարմիկին՝ Գևորգ Մանուկյանին, ում նշանակել է իր օգնականի պաշտոնում: Մարզպետը պաշտոն էր տվել նաև իր բաջանաղ Արտավազդ Նազարեթյանին, ով նշանակվել է որպես մարզպետի տեղակալ:

Երևանի համար աղբամանների գնման մրցույթում հաղթել էր Երևանի քաղաքապետարանի կոմունալ տնտեսության վարչության նախկին պետ Արարատ Խաչիկյանի քրոջ որդին։

Մոտ երեք տարվա փնտրտուքներից հետո կառավարությանը հաջողվեց վաճառել Ծաղկաձորի «Գոլդեն փելիս» հյուրանոցը 5 միլիարդ դրամով: Նախօրեին ՀՀ տարածքային կառավարման և ենթակառուցվածքների նախարարի հրամանով ստեղծված մրցութային հանձնաժողովի նիստում հանձնաժողովը ներկայացրեց մրցույթի արդյունքները: Պարզվեց՝ հայտարարված մրցույթին ներկայացվել է 1 մասնակցության հայտ՝ «Պրոյեկտ ինտեր-ինվեստ» ՍՊԸ-ի կողմից։ Այս ընկերության սեփականատերը Նարեկ Նալբանդյանն է, որի հանրայնացրած նկարներում կարելի է տեսնել Շրջակա միջավայրի նախկին նախարար Ռոմանոս Պետրոսյանին: Միայն այն հանգամանքը, որ մեկ ընկերություն է հայտ ներկայացրել մրցույթին, արդեն իսկ հարցեր է առաջացնում: Առավել ևս, եթե սեփականատերը հյուրանոցային բիզնեսում որևէ արդյունք չի գրանցել, այլ ալյուրի, թռչնաբուծության, նաև շինանյութերի ներմուծմամբ է զբաղվում։

«Արմֆարմացիա» ընկերությունը վերջին տարիներին կնքել է 240 պայմանագիր՝ 44 պետական կառույցի հետ, ընդհանուր՝ մոտ 606,7 մլն դրամ արժողությամբ, որի կեսից ավելին՝ 137 պայմանագիրը՝ արդեն Ավանեսյանի՝ փոխնախարար եղած ժամանակ։ «Արմֆարմացիա»-ն նաև մենաշնորհային դիրք է ունեցել և մատակարարել է «Մեթադոն» հոգեմետ դեղը: ՓԲԸ-ի տնօրեններից են ոչ միայն Անահիտ Ավանեսյանը, այլ տարբեր տարիներին նաև նրա ամուսինն ու մայրը:

Alternativ.am-ի ձեռքի տակ են հայտնվել փաստաթղթեր, որոնք ապացուցում են, որ «Հայկական ժամանակ» օրաթերթը օգտվում է պետական հովանավորչությունից։ Լրատվամիջոցը, որի առևտրային անվանումը «Դարեսկիզբ» ՍՊԸ է (տնօրինությամբ Մանավազյանի` ներկայումս ԱԺ պատգամավոր), բազմիցս շահում է գնումներ պետական տարբեր գերատեսչություններից, որոնք իրականացվում են տենդերի՝ մեկ անձից գնման միջոցով և տրամաբանական արժեքից շատ ավելի թանկ գնով։

Հարց է առաջանում՝ իսկ ինչո՞վ են այս զանցանքները և խախտումները տարբերվում այն զանզանքներից և խախտումներից որոնք վերագրվում են Ուրցաձորի համայնքապետին: Եթե Նոր Հայաստանում իրապես օրենքի առաջ բոլորը հավասար են, ինչպես մեզ փորձում են համոզել երկրի ղեկավարները, ապա մոտեցումն էլ միևնույն խախտմանը պետք է նույնը լինի` անկախ նրանից, թե ով է այդ խախտումը կատարողը: