Չեխովի անվան դպրոցը՝ «կռվախնձոր» իշխանությունների համար

Երևանի Չեխովի անվան N 55 դպրոցի ուսուցիչները, աշակերտները եւ նրանց ծնողները բողոքի ակցիա են իրականացնում Երեւանի քաղաքապետարանի դիմաց. նրանք վրդովված են, որ տնօրենի պարտականություններն այսօրվանից կատարում է Դիանա Մինասյանը, ով տնօրենի ընտրության առաջին 2 փուլերին մասնակցել է և չի հաղթել, իսկ հաջորդ փուլը կայանալու է ապրիլի 14-ին։

Բանն այն է, որ դեկտեմբերին լրացել է դպրոցի տնօրեն Գայանե Սարուխանյանի պշտոնավարման 5 տարի ժամկետը: Օրենսդրության համաձայն` հոկտեմբերին տեղի է ունեցել մրցույթ, որի ժամանակ տնօրենի պաշտոնի համար առաջադրվել է 3 թեկնածու՝ Գայանե Սարուխանյանը, դպրոցի ուսմասվար Տաթեւիկ Մելքոնյանը եւ Դիանա Մինասյանը, որը դպրոցում չի աշխատում: Երեք անգամ մրցույթ է տեղի ունեցել, սակայն այդպես էլ հաղթող չի ճանաչվել: Քաղաքապետարանն իր ձայները տվել է Դիանա Մինասյանին, ուսուցչական անձնակազմը եւ ծնողական կոմիտեն իրենց ձայները տվել են Գայանե Սարուխանյանին, իսկ Տաթեւիկ Մելքոնյանի օգտին քվեարկել է միայն ԿԳՄՍՆ-ի ներկայացուցիչները: Դեկտեմբերից մինչ օրս նա պաշտոնավարել է որպես տնօրենի ԺՊ, սակայն այսօր նամակ է ստացել քաղաքապետարանից, որ որեւէ բան չստորագրի որպես ԺՊ, որովհետեւ այլ մարդ է նշանակում ժամանակավոր պաշտոնակատար:

Վաստակավոր մանկավարժի կոչում ունեցող Գայանե Սարուխանյանը դպրոցը ղեկավարել է սկսած 1994 թվականից և նրա գործունեությունը թե՛ ծնողների, թե՛ աշակերտների կողմից մշտապես բարձր գնահատականի է արժանացել: Այս ընթացքում դպրոցի սաները հաղթել են բազմաթիվ համապետական և միջազգային մրցույթներում և օլիմպիադաներում, բացի այդ, գաղտնիք չէ, որ Չեխովի անվան դպրոցն ըստ արժանվույնի համարվում է Երևանի ամենաէլիտար դպրոցներից մեկը: Սակայն, պատերազմից հետո, երբ Գայանե Սարուխանյանը բացահայտորեն դեմ արտահայտվեց այս իշխանություններին և այնուհետև սկզբունքորեն հետ չկանգնեց իր հայտարարություններից՝ պարզ էր, որ նրան ամեն գնով հեռացնելու էին տնօրենի պաշտոնից։ Եվ քանի որ ամեն գնով խնդիր էր դրված հասնել դրան, իսկ «դրսից» մարդ բերելը այն ժամանակ բավական դժվար կլիներ, իշխանությունները որոշեցին ծնողկոմիտեի հետ կոնֆրոնտացիայի չգնալ և իրավիճակը չլարելու համար տնօրենի ԺՊ նշանակել «ներսից»՝ 2004-ից դպրոցում աշխատող Մելքոնյանին: Չնայած այն հանգամանքին, որ ծնողկոմիտեն համոզում էր Սարուխանյանին կրկին առաջադրել իր թեկնածությունը մրցույթին, այնուամենայնիվ, ըստ լուրերի, վերջինս բավականին հանգիստ վերաբերվեց իրեն ամեն գնով հեռացնելու իշխանությունների «արշավին» և ինքնակամ հեռացավ տնօրենի պաշտոնից:

Տաթևիկ Մելքոյանի նշանակումից ի վեր անցել է ընդամենը երեք ամիս, հետևաբար դժվար է որևէ գնահատական տալ նրա կատարած աշխատանքին: Վերջինիս հրապարակային գրառումներից, սակայն, պարզ է դառնում, որ նա մեծ տեղ է հատկացնում դրպրոցում քրիստոնեական դաստիարակության իրականացմանը: Իրենք` ծնողներն էլ Մելքոնյանի եռամսյա աշխատանքը գնահատում են ընդհանուր առմամբ բավարար և չեն ցանկանում, որպեսզի տնօրեն նշանակվի բոլորին անհայտ, մինչ այս ուսմասվար աշխատած Դիանա Մինասյանը, ում ծնողների մեծ մասը անգամ դեմքով չի ճանաչում:  Մինասյանը որևէ առնչություն «չեխովցիների» հետ չունի, նա դասավանդում է Տնտեսագիտական համալսարանում, համատեղության կարգով էլ աշխատում է իր հոր ղեկավարած շինարարական ընկերությունում: Սակայն, քաղաքապետարանին այդ հանգամանքը չի կանգնեցնում: Մամուլը գրել էր, որ Մինասյանը Երևանի քաղաքապետարանում արդեն իսկ «տնավորված» Տիգրան Ավինյանի ընկերոջ կինն է, հետևաբար յուրայինին առաջ տանելու «սուրբ» մղումն այստեղ ակնհայտ է:

Ընդ որում, իշխանություններին, կարծես, բնավ չի անհանգստացնում այն հանգամանքը, որ այդ ընթացքում փաստացի «մեջքից» հարվածում են իրենց իսկ կողմից ամիսներ առաջ նշանակած տնօրենի ԺՊ-ին: Տպավորություն է, որ Չեխովի դպրոցը դարձել է յուրահատուկ կռվախնձոր իշխանության ներկայացուցիչների համար, կամ յուրայիններին ամեն գնով աշխատանքի տեղավորելու վայր, արդյունքում՝ կրթության հաշվին նման փորձարկումներից առաջին հերթին տուժում է հենց կրթությունը և, իհարկե, երեխաները, ովքեր զրկվում են որակյալ կրթություն ստանալու և բնականոն դասապրոցես կազմակերպելու հնարավորությունից: