Որ պաշտոնյաներն են զրոյացրել Փաշինյանի «աննախադեպ» ձեռքբերումները

Դիցուք` Փաշինյանը հպարտանում էր, որ Հայաստանում արտակարգ դրության հայտարարումից ի վեր մայիսի 6-ի դրությամբ շուրջ 23000 ՀՀ քաղաքացի է վերադարձել Հայաստան՝ այն պայմաններում, երբ դադարել էին օդային բազմաթիվ փոխադրումներ, բազմաթիվ ընկերություններ դադարեցրել էին իրենց աշխատանքը: 2021 թվականի դրությամբ Հայաստանը անվերադարձ լքել են 73 571 քաղաքացի։ Այս մեղքը հավաքական է, սակայն գլխավոր մեղավորը, իհարկե, երկրում ստեղծված վիճակն է և դե յուրե այդ վիճակի համար թիվ մեկ պատասխանատուն` վարչապետը։

 

Փաշինյանը նաև նշել էր, որ Աղետի գոտու 227 ընտանիքների բնակարանային խնդիրները կլուծվեն բնակարանների գնման վկայագրեր տրամադրելու միջոցով, որի համար Կառավարությունը այդ նպատակով հատկացրել է 1.3 մլրդ. դրամ: Այդ պահից ի վեր փոխվել են Շիրակի երկու մարզպետներ` Հովհաննես Հարությունյանը և Նազելի Բաղդասարյանը, իսկ իսկ աղետի գոտու 227 ընտանիքների բնակարանային խնդիրների հարցը մինչ օրս այդպես էլ լուծում չի ստացել։

 

Ցանկում առկա էր նաև հետևյալ կետը։ 2019 թվականին հաջողվել է գրանցել 2008 թվականից ի վեր ամենաբարձր տնտեսական աճի մակարդակը՝ 7.6 տոկոս, որն ամենաբարձրն է ԵԱՏՄ անդամ երկրների, հարևան բոլոր երկրների և եվրոպական տարածաշրջանի երկրների համեմատ: Ընդամենը 1,5 տարի անց Փաշինյանի նշանակած Վահան Քերոբյանը, ով, ի դեպ, խոստացել էր հրաժարական ներկայացնել երկնիշ տնտեսական աճ չապահովելու դեպքում` արձանագրեց ընդամենը 4 տոկոս տնտեսական աճ։

 

Կարագի, դիզվառելիքի և շաքարավազի շուկաներում, ըստ Փաշինյանի, դրական փոփոխություններ էին նկատվել։ Կրճատվել էր խոշոր ներկրողների չափաբաժինը, սակայն 2022-ի դրությամբ պետք է փաստենք, որ շուկայում գերիշխող դիրք ունեցողները պահպանել են իրենց դիրքերը, ավելին` արդեն իշխանությունների յուրային օլիգարխներն են դիմում դեմպինգի, հասնում մրցակիցների սնանկացմանը և ամրապնդվում շուկայում։ Դրան ՄՊՀ-ն` ի դեմս Գեղամ Գևորգյանի, որևէ կերպ չի արձագանքում։

 

Առողջապահության ոլորտի աշխատակիցների միջին աշխատավարձն աճել էր 29.5 տոկոսով կամ 46.500 դրամով: Սակայն, 2022-ին դիցուք` Նորքի ինֆեկցիոն հիվանդանոցի աշխատակիցները ահազանգում են, որ մի քանի ամիս է նախարարությունից չեն ստացել իրենց հասանելիք աշխատավարձը։

 

«Transparency International» հակակոռուպցիոն կենտրոնի «Կոռուպցիայի ընկալման ինդեքս 2019» զեկույցի համաձայն՝ Հայաստանն իր դիրքերը, 2018 թվականի վերլուծության համեմատ, բարելավել էր 7 միավորով ու 28 հորիզոնականով՝ զբաղեցնելով 77-րդ հորիզոնականը։ Մինչդեռ ըստ պաշտոնական վիճակագրության Հայաստանում բացահայտված կոռուպցիոն գործերի քանակը, և ըստ այդմ պատժված պաշտոնյաների թիվը զգալիորեն կրճատվել է։ Մեկ տարի առաջ ստեղծված Հակակոռուպցիոն կոմիտեն, որը ղեկավարում է Սասուն Խաչատրյանը, աչքի չի ընկնում բուռն գործունեությամբ և փաստացի պարապուրդի է մատնված։

 

Փաշինյանի հպարտության հաջորդ առիթը այն էր, որ մշակվել և կառավարության կողմից հաստատվել է հանրային պաշտոն զբաղեցնող անձի գույքի, եկամուտների և շահերի հայտարարագրի նոր ձևանմուշը, ինչպես նաև հայտարարագրի՝ հրապարակման ենթակա տվյալների ցանկը, օրենքով ներդրվել են բարեվարքության ստուգման և հայտարարագրման համակարգի արդյունավետությանն ուղղված մեխանիզմներ։ Սակայն 1,5 տարի անց պարզվեց, որ կան պաշտոնյաներ, ովքեր շարունակում են թերի հայտարարագրեր ներկայացնել։ Ամիսներ առաջ մամուլը գրել էր, որ այն ժամանակ դեռ Աշխատանքի և սոցիալական հարցերի նախարար Զարուհի Բաթոյանի վերջին հայտարարագրերում նրա եկամուտները ներկայացված չէին։ Օրերս էլ մամուլը գրել էր, որ Սյունիքի` երեկ պաշտոնից ազատված փոխմարզպետ Կամո Ավանեսյանի վերաբերյալ Հակակոռուպցիոն կոմիտեում գործ կա հարուցված՝ ոչ պատշաճ հայտարարագիր ներկայացնելու հիմքով։

 

Հայաստանի վարչապետի կինը ոստիկանության կողմից վարչական տուգանքի էր ենթարկվել «Կոնդ» կառավարական առանձնատներում՝ վարչապետի կեցավայրի բակում ավտոմեքենայի ղեկը անչափահասին վստահելու համար: Դա ներկայացվել էր իբրև օրենքի առաջ բոլորի հավասարության ցայտուն օրինակ: Օրենքի առաջ բոլորը դադարեցին հավասար լինել այն բանից հետո, երբ Փաշինյանի մի շարք թիմակիցներ այս ձեռքբերումն էլ ջրեցին` օրենք խախտելով և անպատիժ մնալով։ Այսպես` անպատիժ են մնացել ցուցարար ծեծող ԱԺ պատգամավոր Սիսակ Գաբրիելյանը, լրագրող ծեծող, այնուհետև ԱԺ փոխնախագահի պաշտոնը ստանձնած Հակոբ Արշակյանը և այլք։

 

Փաշինյանը այլևս չի ներկայացնում իր 100 փաստերը նոր Հայաստանի մասին և պարզ է, թե ինչու։ Նախ, ներկայացնելու բան առանձնապես չկա` հաշվի առնելով երկրի սոցիալ-տնտեսական աղետալի վիճակը, բացի այդ, անգամ եղածով արդեն չես պարծենա, որովհետև Փաշինյանն ու թիմակիցները հաջողել են այս 1,5 տարվա ընթացքում զրոյացնել անգամ դրանք...