«Քայլած» ՔՊ-ականներն իրենց խաբվա՞ծ են զգում. Փաշինյանը նախընտրում է «նախկիններին»

Դիցուք` Սիսիանում ևս կրքերը սրվել են. ՔՊ-ականները բաժանվել են երկու ճամբարի: Կռիվը քաղաքապետի աթոռի շուրջ է: Սիսիանցի ՔՊ-ական ակտիվիստ Արսեն Ավագյանը, ով եկեղեցու դեմ արշավի նախաձեռնողներից էր, բավարարված չէ իր կարգավիճակով՝ նրան ընդամենը քաղաքաշինության, տեխնիկական և հրդեհային անվտանգության տեսչական մարմնում ինչ-որ աշխատանք են տվել։ Այլ դժգոհ մարդիկ էլ կան Սիսիանի իշխանամետների շրջանում, որոնք պայքար են սկսել քաղաքապետի ժամանակավոր պաշտոնակատար Արմեն Հակոբջանյանի դեմ: Ավագյանը այս ընթացքում մի շարք ուշագրավ Ֆեյսբուքյան գրառումներ է արել։

 

Երեւանի Աջափնյակ վարչական շրջանի ղեկավարի պաշտոնում Կամսար Բաբինյանի նշանակումը միանշանակ չի ընդունվել ՔՊ-ում։ Վերջինս քաղաքապետարանի հնաբնակներից է, մինչ թաղապետ նշանակվելը Երեւանի քաղաքապետարանի առողջապահության վարչության պետի պաշտոնն էր զբաղեցնում։ Այս պաշտոնին նշանակվել է 2012 թվականին։ Բացի դա, Գալուստ Գրիգորիչի որդու՝ Արման Սահակյանի ընկերներից է։ Ի դեպ, խոսվում էր, որ սույն պաշտոնում պետք է նշանակվի պատգամավոր Հովիկ Աղազարյանի որդին՝ Հովսեփ Աղազարյանը, որը մինչեւ վերջերս Աջափնյակի փոխթաղապետի պաշտոնն էր զբաղեցնում, սակայն Հրաչյա Սարգսյանի, ավելի ճիշտ` Տիգրան Ավինյանի որոշմամբ ազատվեց աշխատանքից:

 

Օրերս հայտնի դարձավ, որ Հաշվեքննիչ պալատի նախագահ է ընտրվել ֆինանսների նախկին նախարար Ատոմ Ջանջուղազյանը: Նա, հիշեցնենք, նախարարի պաշտոնը թողնելուց հետո՝ անցած տարվա ապրիլից, գործազուրկ էր։ Պալատի հեռացող նախագահ Լեւոն Յոլյանը հունվարի 20-ին` դիմում գրելու հաջորդ օրը ասել էր, թե տեղը զիջում է թարմ, երիտասարդ ուժերի, եւ անգամ ենթադրել էր, որ կնշանակվի ՔՊ-ական նախկին պատգամավոր, պալատի անդամ Եղիշե Սողոմոնյանը: Սակայն պարզվեց, որ Նիկոլ Փաշինյանի թեկնածուն հներից ժառանգություն մնացած Ատոմ Ջանջուղազյանն է։

 

Սյունիքում Փաշինյանի կադրային որոշումների պակասից դժգոհողների պակաս նույնպես չի զգացվում։ Դիցուք` երկու անգամ` Հունան Պողոսյանի և Մելիքսեթ Պողոսյանի հրաժարականներից հետո խոսվում էր այն մասին, որ մարզպետի բաղձալի պաշտոնը բաժին կհասնի ՔՊ-ական պատգամավոր Դավիթ Դանիելյանին, սակայն վերջին անգամ էլ Փաշինյանը նախընտրեց ոչ թե նրան, այլ Ռոբերտ Ղուկասյանին, ով հեղափոխության հետ որևէ առնչություն չի ունեցել։

 

Բավական թեժ իրավիճակ է նաև Վանաձորում, այստեղ օրենքի փոփոխությունից հետո քաղաքապետին պետք է նշանակի անձամբ Նիկոլ Փաշինյանը։ Սակայն, վերջինս բավական երկար է մտածում, ինչը արդեն իսկ նյարդայնացնում է թիմակիցներին։ Մարզպետ Արամ Խաչատրյանը, ով հավակնում է քաղաքապետի պաշտոնին, կարծես թե, հիմքեր ունի մտածելու, որ այդ պաշտոնում իր փոխարեն Փաշինյանը կնշանակի հայտնի Ակային` Արկադի Փելեշյանին, ով հասցրել է մի քանի կուսակցություն փոխել և անգամ աշխատել քաղաքապետի տեղակալի պաշտոնում` հայտնվելով մի շարք սկանդալների կիզակետում։

 

Արթիկում վերջերս տեղի ունեցած ՏԻմ ընտրությունների ժամանակ երկար փնտրտուքից հետո ՔՊ-ն իր թեկնածու հռչակեց Պեմզաշենի գործող ղեկավար Անանիկ Ոսկանյանին։ Մամուլը գրել էր, որ նրա լոբբինգով զբաղվում էր անձամբ Անդրանիկ Քոչարյանը, իսկ ահա Շիրակի մարզի ՔՊ կառույցում այս հարցը բավական կոշտ էր դրվել և նախկինների հետ առնչվող անձին համայքնապետ դարձնելը դիտարկվել է դավաճանությանը հավասարազոր քայլ։

 

Ինչպես տեսնում ենք` օր ու գիշեր նախկինների դեմ պայքարող, նրանց քննադատող և բոլոր մեղքերը նրանց վրա գցող Փաշինյանն ամեն դեպքում շատ հաճախ այդ նույն նախկիններին գերադասում է իր` հեղափոխություն արած թիմակիցներից, ինչն, իհարկե, չի կարող վերջիններիս մոտ հիասթափություն և նեղսրտվածություն չառաջացնել։