Ո՞ւմ ղեկավարման տարիներին ենք առավել աղքատ եղել

Հեղափոխությունից հետո շատ էր խոսվում այն մասին, որ Հայաստանում գրանցվելու է աղքատության մակարդակի կտրուկ անկում և աղքատների կենսամակարդակի աճ ենք ունենալու: Այդպես է, թե չէ՝ դատեք ինքներդ, ձեր ուշադրությանն ենք ներկայացնում ՀՀ բոլոր ղեկավարների կառավարման տարիներին արձանագրված աղքատության ցուցանիշների համեմատականը:

Դիցուք՝ 1996 թվականին Հայաստանում աղքատության մակարդակը կազմել է 54.7 տոկոս: Աղքատ էր գյուղական բնակչության 82.7% և քաղաքային բնակչության 11.4%-ը:

2004 թվականի կտրվածքով` աղքատության մակարդակը տնային տնտեսությունների կտրվածքով կազմել է 36,6 տոկոս, իսկ բնակչության կտրվածքով` 42.9 տոկոս:

2008 թվականի կտրվածքով` ընդհանուր մակարդակը աղքատության, ըստ ինքնագնահատման, կազմել է 16.9 տոկոս, իսկ ըստ մեկ չափահասին համարժեք սպառման ցուցանիշի՝ 25.0 տոկոս;

Ըստ կենսամակարդակի սուբյեկտիվ գնահատականի` 2017թ.-ին աղքատության մակարդակը 3.9 տոկոսային կետով ցածր է 2008 թ.-ի մակարդակից, 2017թ.-ին Հայաստանի տնտեսությունը նախորդ տարվա նկատմամբ գրանցել է շոշափելի աճ՝ 7.5 տոկոս: Նման աճ, դիտարկվող ժամանաշրջանում (2008-2017թթ.), գրանցվել է առաջին անգամ: Միևնույն ժամանակ սպառողական գների ինդեքսը նախորդ տարվա նկատմամբ աճել է 1.0%-ով: 2016թ.-ի համեմատ աղքատության մակարդակը նվազել է 3.7 տոկոսային կետով և գնահատվել է 25.7%: Արդյունքում` աղքատության մակարդակը 2017թ.-ին առաջին անգամ նվազել է 2008թ.-ի աղքատության մակարդակի համեմատ (27.6%)` 1.9 տոկոսային կետով:  

2019-ին Հայատանում աղքատության մակարդակը կազմել է  26,4%, 2020-ին այն գնահատվել է 27%: Հայաստանում բնակչության 0.7%-ն էլ ծայրահեղ աղքատ է: Ծայրահեղ աղքատ է համարվում անձը, որի ամսական սպառումը 23 828 դրամից ցածր է: Մինչև 5 տարեկան երեխաների շրջանում ևս աղքատության մակարդակը բարձր է՝ 34.1%: Ըստ տարիքային խմբերի՝ աղքատության ամենացածր մակարդակը 45-49 տարեկանների շրջանում է: Ավագ տարիքի՝  թոշակառուների շրջանում աղքատության մակարդակն ավելի ցածր է, քան միջին հանրապետական ցուցանիշն է (տարիքային խումբը՝ 60-64, 65+ տարեկան): Հիշեցնենք, որ Հայաստանում կենսաթոշակային տարիքը սկսվում է 63 տարեկանից:

Ինչպես տեսնում ենք՝ հեղափոխությունից հետո աղքատության ցուցանիշի որևէ զգալի կրճատում տեղի չի ունեցել, հարուստներն էլ ավելի են հարստացել, իսկ աղքատները լավագույն դեպքում շարունակել են մնալ աղքատ:

Լուսանկարը՝ armday,am-ից: