ՔՊ-ականների միջև լարվածությունը խորանում է. ի՞նչ չեն կիսել «հեղափոխականները»

Դիցուք, այն որ ՔՊ-ականների միջև սև կատու է անցել պարզ է դառնում հետևյալ օրինակներից։ Օրեր առաջ համացանցը զարմացրել էր առողջապահության փոխնախարար Լենա Նանուշյանի գրառումը, որտեղ նա, ըստ էության, ծաղրում էր իր ղեկավարի՝ Անահիտ Ավանեսյանի հայտնի աղային ռեֆորմը: Նա ֆեյսբուքյան իր էջում զվարճալի տեսանյութ է հրապարակել, որը TikTok-ից է, և արել է տիկտոկեր։ Տեսանյութում տիկտոկերը հանրային սննդի օբյեկտում է, և երբ ձեռքն է վերցնում աղամանը, դիմացը «հայտնվում» է Անահիտ Ավանեսյանը։ Տեսանյութը փոխնախարարը վերնագրել է ․ «Աղի իրազեկման միջազգային շաբաթվա ամենադիպուկ վիդեոն»։ Զարմանալի է, որ մի ամբողջ գերատեսչության փոխնախարար տիկտոկյան տեսանյութը ոչ միայն որակում է ամենադիպուկը, այլև այդ կերպ, ըստ էության, միանում է նախարարի՝ հանրային քննարկման ներկայացրած նախագծի վերաբերյալ արված հումորներին։ Իսկ պատճառը դժվար չէ կռահել, մամուլը բազմիցս էր գրել Նունուշյանի` նախարարական ամբիցիաների մասին, որոնք սակայն հեղափոխությունից հետո այդպես էլ չեն բավարարվում։

 

Նույն պատճառով Անահիտ Ավանեսյանի հետ լարված հարաբերությունների մեջ է նախկին նախարար Արսեն Թորոսյանը, ով չի էլ թաքցնում որ ցանկանում է վերադառնալ գործադիր։ Սորոսական մի շարք ՀԿ-ներ անգամ մեդիա արշավ էին սկսել ընդդեմ Ավանեսյանի, սակայն որևէ արդյունք այն այդպես էլ չտվեց։

 

Շաբաթներ առաջ, երբ ԱԺ-ում քննարկվում էր «Պետական տուրքի մասին» օրենքում փոփոխություններ կատարելու նախագիծը, բավականին կոշտ զրույց ստացվեց պատգամավոր Բաբկեն Թունյանի և Էկոնոմիկայի նախարար Վահան Քերոբյանի միջև: Թունյանը բառացիորեն ասաց հետևյալը՝ «Եթե ԱԺ բերվում է որևէ նախագիծ, պետք չէ մեզ հիշեցնել, թե վարչապետը ինչ է ասել այդ մասին»: Թերևս այսպես նա սթափեցնում էր նախարարին, ով հաճախ է հղում անում վարչապետի այս կամ այն խոսքին: Մամուլը բազմիցս էր գրել, որ Բաբկեն Թունյանը, ով վստահաբար ավելի լավ է հասկանում տնտեսությունից, քան Վահան Քերոբյանը, ցանկանում է զբաղեցնել էկոնոմիկայի նախարարի պաշտոնը և այդ իսկ պատճառով նախարարի գործողությունների քննադատությունը գնալով առավել անթաքույց է դառնում։

 

Բավականին լարված էին Սյունիքի նախկին մարզպետ Մելիքսեթ Պողոսյանի և պատգամավոր Արմեն Խաչատրյանի հարաբերությունները: Գորիսում կայացած վերջին ՏԻՄ ընտրություններում ՔՊ թեկնածուն Վլադիմիր Աբունցն էր: Նա Ագարակի մաքսատան նախկին պետն է եղել՝ 2019 թվականի մարտի 8-ից սկսած չի աշխատում, ժամանակին բավականին ջերմ հարաբերություններ է ունեցել ՀՀԿ-ականների հետ եւ ՃՈ պետի նախկին տեղակալ Արմեն Խաչատրյանի մտերիմն է, ու վերջինիս շնորհիվ է ՔՊ-ում նրա թեկնածությունը հաստատվել։ Սյունիքի արդեն նախկին մարզպետը ցանկացել է իր տեղակալ Կարո Ավանեսյանին առաջ հրել, սակայն՝ ապարդյուն։ Ներթիմային պայքարին ներգրավվել են նաեւ ընտանիքների անդամները. փոխմարզպետի կինն օրերս Արմեն Խաչատրյանին ու նրա թեկնածուին քննադատող ստատուս էր գրել, ապա ջնջել:

 

Լարված հարաբերությունների մեջ են նաև Արարատի նախկին մարզպետներ Ռազմիկ Թևոնյանն ու Գարիկ Սարգսյանը։ Վերջին ՏԻՄ ընտրությունների ժամանակ Թևոնյանը, ով դեռ զբաղեցնում էր մարզպետի պաշտոնը բացահայտ չէր աջակցում Սարգսյանին, Վեդիում որպես համայնքապետ ցանկանակով տեսնել իր յուրայինին։ Մամուլն այլ ուշագրավ տեղեկություններ էլ է հայտնում: Մասնավորապես՝ Արարատի մարզից Oragir.News-ին ահազանգում են, որ Թևոնյանն ու Սարգսյանը, մեկը մյուսից առաջ ընկնելով, իրար վրա «գործ են տալիս» իրավապահներին:

 

Շատ է գրվել` ՊԵԿ նախագահ Ռուստամ Բադասյանի և փոխնախագահ Շուշանիկ Ներսիսյանի լարված հարաբերությունների մասին։ Բանն այն է, որ Ներսիսյանը կուռացիա է անում ողջ մաքսային ոլորտը և հանդիսանալով Փաշինյանի ընտանիքի մտերիմը` Բադասյանին առանձնապես մանեվրելու տեղ կառույցում չի թողնում։

 

Ռոմանոս Պետրոսյանի և Սասուն Միքայելյանի միջև լարվածություն սկսվեց Աբովյանի քաղաքապետի ընտրությունների ընթացքում, երբ Միքայելյանը չսատարեց Պետրոսյանի առաջադրած թեկածուին: Ավելին` այդ ժամանակ ակտիվ խոսակցություններ էին պտտվում, որ Սասուն Միքայելյանն աշխատում է հենց Ռոմանոս Պետրոսյանի դեմ: Դրանից հետո, հունիսի 16-ին էլ ՔՊ համագումարի ընթացքում, երբ կուսակցությունն ընտրում էր վարչության անդամներ և նախագահ, Սասուն Միքայելյանը, ըստ ձայների հաշվարկի, չընտրվեց նույնիսկ վարչության անդամ, այն դեպքում, երբ դրանից առաջ Միքայելյանը ՔՊ վարչության նախագահն էր:

 

Լոռու մարզում բոլորը գիտեն, որ գործող մարզպետ Արամ Խաչատրյանի և նախկին մարզպետ Անդրեյ Ղուկասյանի ջրերը մի առվով չեն հոսում: Ղուկասյանն էլ ամեն բան անում էր, որպեսզի Խաչատրյանի բերած հեղափոխական կադրերից ազատվի ու իր մարդկանց նշանակի: Նա նույնիսկ Խաչատրյանի ընդունած վարորդին՝ Հայկ Հակոբյանին էր ազատել աշխատանքից՝ առանց որոշակի պատճառաբանության: Այնուհետև վարչապետի թիվ 305-Ա որոշմամբ Լոռու մարզպետի տեղակալ Արշակ Հովսեփյանն ազատվել էր զբաղեցրած պաշտոնից: Նա նշանակավել էր 2018 թ. հոկտեմբերի 16-ին: Հովսեփյանին ևս այս պաշտոնում երաշխավորել էր Խաչատրյանը:

 

Երևանի դե յուրե եւ դե ֆակտո քաղաքապետների` Հրաչ Սարգսյանի եւ Տիգրան Ավինյանի ջրերն արդեն մի առվով չեն գնում. տարաձայնություններն այնքան շատ են, որ չնայած թաղապետերի թեկնածուները որոշված էին շատ առաջ, սակայն հիմա նոր-նոր են նշանակվում` Ավինյանի ձեռամբ։ Սարգսյանին թվացել էր, թե մեկ տարի կարող է լիարժեք վայելել պաշտոնը, քանի որ քաղաքապետի ընտրվելուց հետո 1 տարի չեն կարող անվստահություն հայտնել, սակայն նրան հասկացրել են, որ «Երեւանի վարչական բաժանման մասին» օրենքում փոփոխություն անելը 1 օրվա հարց է։