Որ ՍՊԸ-ից և ինչի դիմաց են միլիոնավոր գումարներ ստացել ՔՊ-ական պաշտոնյաները

Հեղափոխությունից հետո Նիկոլ Փաշինյանը հայտարարում էր, որ իր թիմակիցները զերծ են մնալու ցանկացած բիզնես կապերից և եթե զբաղեցնեն որևէ պաշտոն, ապա ամբողջովին նվիրվելու են պետական կառավարմանը:

Արդյո՞ք այդպես եղավ թե ոչ՝ դատեք ինքներդ: Մի շարք պաշտոնյաների հայտարարագրերում ուշագրավ կապեր են նկատվում այս կամ այն ՍՊԸ-ի հետ, որոնցից վերջիններս եկամուտներ են ստանում,կամ փոխառություններ են վերցնում/ տալիս:

Օրինակ՝ ՀՀ քաղաքաշինության կոմիտեի նախագահի խորհրդական Արտավազդ Թարխանյանը «ՄԼ-ՄԱՅՆԻՆԳ» ՍՊԸ-ից ստացել է 1,792,212.00 դրամ փոխառություն: Նպատակը, իհարկե, հայտնի չէ:

ՔՊ-ական պատգամավոր Արուսյակ Մանավազյանը 1,434,992.00 ՀՀ դրամ է ստացել «Դարեսկիզբ» ՍՊԸ-ից և 765,734.00 դրամ` «Մեր Տպարանը» ՍՊԸ-ից:

Պատգամավոր Գևորգ Պապոյանի պարտապանն է «Նոյ Ինվեստ Գրուպ»-ը, իսկ փոխառությունը կազմում է 21,017,400.00 դրամ:

Պատգամավոր Բաբկեն Թունյանը հայտարարագրել է «Արմբիզնես» ՍՊԸ-ից ստացված 1,750,000.00 դրամ եկամուտը, որպես՝ վարձակալության դիմաց ստացված վճար կամ այլ հատուցում:

Պատգամավոր Տրդատ Սարգսյանը ոմն «Աթիեհսադաթ Սեյեդբահրամ Միրքազեմի»-ից ստացել է 40,894,000.00 ՀՀ դրամ՝ գույքի հետ կապված գործարք կատարելու դիմաց:

Վայոց Ձորի մարզպետ Արարատ Գրիգորյանը ներկայացրել էր պաշտոնը ստանձնելու պահին առկա եկամուտների և գույքի մասին հայտարարագիրը, որտեղ նշված էր նաև 7,970,000.00 դրամի եկամուտ՝ ձեռնարկատիրական գործունեությունից:

Դիլիջան համայնքի ղեկավար Դավիթ Սարգսյանը պաշտոնական պարտականությունները ստանձնելու օրվա դրությամբ հայտարարագրել էր ԱՁ «Դավիթ Սարգսյան»-ից ստացված շուրջ 2 միլիոն դրամի եկամուտ:

Լոռու նախկին մարզպետ Անդրեյ Ղուկասյանը 2018 թվականի իր հայտարարագրում նշել էր ձեռնարկատիրական գործունեությունից ստացված 3,500,000.00 ՀՀ դրամի եկամուտը:

Անահիտ Ավանեսյանը հայտարարագրել է «Աբովյան 39» ՍՊԸ-ից ստացված 11,249,000.00 ՀՀ դրամ եկամուտը:

ԿԲ նախագահ Մարտին Գալստյանը 2,000,000.00 դրամի նվիրատվություն է ստացել բնամթերքով և իհարկե՝ հայտնի չէ ոչ այն, թե ումից  է ստացվել այդ նվիրատվությունը, ոչ էլ այն, թե ինչի դիմաց:

Տավուշի մարզպետ Հայկ Ղալումյանը «Հայէկոնոմբանկ» ԲԲԸ-ում հայտարարագրել է 18,240.00 դրամի շահաբաժին:

Գեղարքունիքի մարզպետի տեղակալ Ռուբիկ Նավոյանը  «ԹԱԳ ՀԷՄ» ՍՊԸ-ից ստացել է 400 հազար դրամի եկամուտ:

ՊԵԿ նախագահի տեղակալ Աշոտ Մուրադյանը 34,147,200.00 դրամի փոխառություն է ստացել  «Միկշին» ՍՊԸ-ից: Այսինքն` ՊԵԿ բարձրաստիճան պաշտոնյան կարող է հանգիստ գումար վերցնել մասնավոր ընկերությունից, և պատկան մարմիններին դա բնավ չի հուզի:

Պատկան մարմինները առանձնապես ուշադիր չեն նաև վերը նշված մյուս դեպքերի մասով: Տպավորություն է, որ կոռուպցիան ռիսկը, որը տվյալ դեպքում առկա է, քանի որ պետական պաշտոնյան գումար ստանալով մասնավոր որևէ ընկերությունից` այդ գումարի դիմաց կարող է տվյալ ընկերության բիզնես շահերի լոբբինգը իրականացնել, նորմալ է Նրո Հայաստանում և դրա դեմ պայքարելը, կամ առնվազն այդ դրվագները ուսումնասիրության առարկա դարձնելը ավելորդ ճոխություն են....