ՔՊ-ական պաշտոնյաները խախտում են իրենց իսկ հեղինակած օրենքը

Փաշինյանի իշխանության ներմուծած սկզբունքներին հավատարիմ իշխանական ֆեյքերը թիրախավորում են նաև քաղաքական-հասարակական գործիչների անձնական կյանքը, ընտանիքի անդամներին և նրանց անձնական կյանքը:

 

Ֆեյքերին հովանավորող իշխանության պիտակից ազատվելու համար ՔՊ-ն անգամ օրենք ընդունեց, որը արգելում էր հղում անել չնույնականացված աղբյուրներին. դա պատժվում էր օրենքով։ Բայց արի ու տես, որ ՔՊ-ականները հենց իրենք են լծվել Ֆեյքերի տարածած ինֆորմացիայով կիսվելով ու տիրաժավորելով։

 

Իշխանական ամենահայտնի ֆեյք էջերից մեկը գործում է Ռեգինա Պրազյան անվան ներքո: Մամուլը բազմիցս գրել էր, որ այդ էջւ վարում է ՔՊ-ական պատգամավոր Արփի Դավոյանը։ Բնականաբար, պատկան մարմինները ոչ միայն չեն կասեցնում այս էջի գործունեությունը, դեռ մի բան էլ պաշտոնական կառույցները` ՄԻՊ-ը պատասխանում է վերջինիս մեկնաբանություններին և դրանց հիման վրա ստուգումներ սկսում։

 

Իշխանությունները ունեն անգամ սեփական ֆեյք կայքը` Civic.am-ը։ Այդ կայքն աշխատեցնում է «Քաղաքացիական պայմանագիր» կուսակցությունը, ֆինանսավորվում այդտեղից, սակայն կայքում չես կարող գտնել տվյալներ նրանց հետ հետադարձ կապ հաստատելու համար: Այսինքն` իշխանությունը աշխատեցնում է ֆեյք կայք, բայց մյուսներին է մեղադրում ֆեյք լինելու, ֆեյք ինֆորմացիաներ տարածելու մեջ:

 

Հետ չի մնում, իհարկե, նաև Փաշինյանը։ Վարչապետը կիսվել էր Minasyan Arsen ֆեյսբուքյան օգտատիրոջ՝ ներկայիս իշխանության, մասնավորապես Նիկոլ Փաշինյանի գովքն անող «Մի քաղաքացու տեսակետ» վերտառությամբ գրառմամբ։ Օգտատերը, ինչպես և սպասվում էր, կեղծ էր:

 

ՔՊ-ական պատգամավոր  Մարինա Ղազարյանը կեղծ տեղեկություն է տարածում առ այն, թե իբր կառավարությունը բարձրացրել է նվազագույն աշխատավարձի շեմը: Աշխատանքի և սոցիալական հարցերի նախարարությունը հերքում է: Ի դեպ, նախկին ուսուցչուհի տիկինը երևի նույնաբովանդակ ստերով է ձայներ մուրացել Սյունիքից, որպեսզի հայտնվի ԱԺ-ում ու ծափ տա բոլոր նրանց, ովքեր այսօր թուլացնում են Սյունիքի անվտանգությունը:

 

ՔՊ-ական պատգամավոր Արթուր Հովհաննիսյանը հոխորտալից գրառում էր կատարել` պնդելով, որ լրատվամիջոցները սուտ լուրեր են տարածում, այնինչ ժամեր անց պարզվեց, որ կեղծ էր հենց Հովհաննիսյանի տարածած տեղեկությունը:

 

ՔՊ-ական պատգամավոր Լենա Նազարյանը տարածում է տեսանյութեր, որտեղ անհայտ անձինք վերջին հայհոյանքներով են խոսում հող հանձնելու դեմ հանդես եկող քաղաքացիների մասին ու սպառնում են գալ սպանել բոլորին։

Մինչ Հայաստանի բանակը 2020-ին կանխում էր Ադրբեջանի սադրիչ ռազմական գործողությունները, վարչապետ Փաշինյանի թիմակիցները ադրբեջանական քարոզչական թեզեր են առաջ տանում։ Իշխանափոխության գործընթացին մասնակցած Բաբկեն Գրիգորյանը տարածել է լուսանկար և կից գրառմամբ տեղեկացնում է, որ լուսանակրում երեկ տեղի ունեցած ռազմական միջադեպի արդյունքում սպանված ադրբեջանցի զինվորական Էլշադ Մամեդովի 7 ամսական երեխան է։ Փաշինյանի մտերիմ ակտիվիստը գրել է, որ «սա է պատերազմի դեմքը և ոչ թե այն պաթոսախառը աղբը, որը դուք տարածում եք երեկ գիշերվանից»։ Ընդ որում, հասկանալի է, որ ադրբեջանական ալիքը որևէ կերպ նույնականացված աղբյուր, այն էլ հավաստի աղբյուր լինել չէր կարող:

 

Արդյո՞ք Փաշինյանն ու իր թիմակիցները պատժվելու են իրենց իսկ ընդունած օրենքը խախտելու համար, թե յուրայիններին կարելի է ամեն բան, իսկ  ՔՊ-ականների կողմից ընդունված օրենքը կիրառելի է միայն ընդդիմադիր մամուլի և գործիչների տարածած տեղեկությունների դեպքում...