Արամ Խաչատրյանը «վերակենդանացնում» է նախկինների արատավոր բարքերը

Լոռու ՔՊ-ական մարզպետ Արամ Խաչատրյանին նախկին մերժված իշխանությունների փառքը, կարծես թե, հանգիստ չի տալիս: Թեև Խաչատրյանը ակտիվորեն մասնակցում էր Թավշյա հեղափոխությանը, մերժում երկրում հաստատված արատավոր բարքերը, այնուամենայնիվ այսօր Լոռու մարզում այդ բարքերը, կարծես թե, կրկին գլուխ են բարձրացնում:

Դիցուք՝ շաբաթներ առաջ տեղեկություններ տարածվեցին, որ Լոռու մարզպետի աշխատասենյակում, մարզպետ Արամ Խաչատրյանի կողմից ծեծի է ենթարկվել Օձուն խոշորացված համայնքի ղեկավար Արսեն Տիտանյանը: Ըստ տեղեկությունների՝ մարզպետը կանչել է համայնքապետին և ներկայացրել հրաժարականի դիմում գրելու անօրինական պահանջ, որից հետո պահանջը չկատարելու համար մարզպետարանի շենքում, 7-8 մարդու ներկայությամբ, նրան ծեծի ենթարկել:  Այս դրվագով, իհարկե, քրեական գործ չհարուցվեց:

Օրեր առաջ էլ «Ժողովուրդ» օրաթերթին բացառիկ տեղեկություններ են հասել այն մասին, որ ՀՀ լոռու մարզպետ Արամ Խաչատրյանը մարտի 6-ին իր բաջանաղին՝ Զուլոյան Կարենին, վարորդ Հայկին, օգնականին՝ էրիկ Կոստանյանին եւ էլի մի քանիսի ուղարկել է Վանաձորի բնակիչ, ֆեյսբուքյան բլոգեր Դավիթ Սարգսյանին ծեծելու: Պատճառն այն է, որ Դավիթ Սարգսյանը ֆեյսբուքում մարզպետ Արամ Խաչատրյանի մասին գրառում է արել, վիրավորել նրան եւ սատարել այսօր կալանքի տակ գտնվող Մամիկոն Ասլանյանին: Մասնավորապես, գրել է. «Ժողովու՛րդ ջան, բարի եղե՛ք ու հիշե՛ք՝ պաշտոնը խիար չէ, որ թարս բուսնի, պաշտոնը արմատուրա է… մի օր ձեռդ է, մի օր կոխելու եմ ոռդ… Էն Ղուկասյան Անդրեյը վկա, ես շատ ցավոտ ու ճակատագրական եմ ցավացնում: Ինձնից կիլոմետրերով հեռու»:

Սրանով բռնաճնշումները չեն ավարտվել: Լոռու մարզպետարանի տեղական ինքնակառավարման և համայնքային ծառայության պետի պաշտոնից սեփական դիմումի համաձայն ազատված Ժիրայր Ղազարյանը հայտարարում է՝ իր նկատմամբ քաղաքական ճնշումներից հետո ստիպված է եղել ազատվել 12 տարի զբաղեցրած պաշտոնի: Հաջորդ սկանդալը, որի կիզակետում հասցրել է այս կարճ ժամանակահատվածում հայտնվել մարզպետը, կապված էր Նիկոլ Փաշինյանի մարտիմեկյան երթին անձնուրացաբար մարդ հավաքելու հետ: Այն, որ Լոռու մարզում գործի են դրվել լուրջ վարչական ռեսուրսներ և լծակներ, բազմաթիվ գրառումներ են ապացուցում, սակայն ինքը' մարզպետը, համարում է, որ ընդամենը մարդկանց հորդորել է մասնակցել այդ երթին: Ի դեպ, վարչական լծակների գործարկումը նույնպես քրեորեն պատժելի արարք է:

Հիշեցնենք` նախկինում նման դրվագների պակաս նույնպես չի զգացվել: Սկանդալային ծեծկռտուքի կենտրոնում է հայտնվել Արմավիրի այն ժամանակվա ՀՀԿ-ական քաղաքապետ Ռուբեն Խլղաթյանի եղբայրը` Սեդրակը (Արմավիրում նա հայտնի է Աշոտ անվամբ): Հանրության հիշողության մեջ դեռ թարմ է Ապարան քաղաքի քաղաքապետի երկու թեկնածուներ՝ Գոռ Աբրահամյանի և Էդգար Փարվանյանի ու  նրանց  թիմերի միջև ծագած վեճն ու  ծեծկռտուքը: Արագածոտնի մարզպետ Սարգիս Սահակյանի եղբայրը անգամ հրապարակային հայտարարել էր, որ մարդ է ծեծել:

Հարց է առաջանում՝ իսկ ինչո՞վ է տարբերվում Լոռու ՔՊ-ական մարպետի վարքագիծը այն նախկինների վարքագծից, որոնց հենց ինքը` Արմեն Խաչատրյանը, 2018-ին մերժում էր փողոցներում: Ակնհայտ է նաև, որ պատկան մարմինները բացահայտ կերպով աչք են փակում մարզպետի կողմից իրականացվող այս քայլերի վրա` ըստ էության աջակցելով նրա հակաօրինական պահվածքին...