Կարկառուն ՔՊ-ականները պաշտոնեական դիրքի չարաշահումից «չոր» են դուրս գալիս

2018 թվականի հեղափոխության օրերին Նիկոլ Փաշինյանը հրապարակում հավաքված քաղաքացիներին ի թիվ այլ խոստումների՝ խոստացել էր նաև այն, որ եթե իր թիմակիցներից որևէ մեկի մասով հետագայում անգամ կասկած ի հայտ գա կապված պաշտոնեական դիրքի չարաշահման հետ՝ այդ թիմակիցը անհապաղ ազատվելու է զբաղեցրած պաշտոնից: Անցավ չորս տարի, Նիկոլ Փաշինյանի բազմաթիվ թիմակիցներ ոչ միայն կասկածվել են, այլ նաև շատ հստակ մեղադրվել են վերը նշված զանցանքում, սակայն պաշտոնից ազատման դիմումներ հպարտ քաղաքացիները դեռևս չեն տեսել:

Դիցուք՝ Աջափնյակ վարչական շրջանի նախկին ղեկավար Գևորգ Բաբայանը, որը մեղադրվում էր կոռուպցիոն հանցագործություն կատարելու համար, ոչ միայն չպատժվեց, այլ նշանակվել է Տարածքային կառավարման և ենթակառուցվածքների նախարարության պետական գույքի կառավարման կոմիտեի նախագահի տեղակալ:

ՀՀ կառավարության 2019 թվականի որոշման հիման վրա՝ պաշտպանված բնակարաններ եւ փոքր տներ ձեռք բերելու նպատակով ՀՀ աշխատանքի եւ սոցիալական հարցերով նախարարությանը հատկացրել է գումար, որպեսզի նախարարությունը հայտարարի մրցույթ, որի արդյունքում կոնկրետ ընկերություն հաղթել է մրցույթը: Եվ, ահա, այս ամենից հետո նախարարությունը պետք է տարեցներին պաշտպանված տներ ձեռք բերելու գործընթացը կազմակերպեր, սակայն  ավելի ուշ իրավապահները բացահայտել են, որ նախարարության կողմից բնակարանները ձեռք են բերվել շուկայական արժեքից թանկ գնով: Այդ ժամանակ նախարար էր Զարուհի Բաթոյանը, ով այժմ էլ պատգամավորի աթոռն է զբաղեցնում:

Կոռուպցիայի դեմ անհաշտ պայքարի մասին մշտապես խոսող հեղափոխական իշխանությունների օրոք առողջապահության նախկին նախարար, այժմ պատգամավոր Արսեն Թորոսյանը դրսեւորում էր ճիշտ այնպիսի վարք, ինչը քննադատում էր նախկինում եւ մինչ օրս: Նախկիններին բյուջեի թալանի մեջ մեղադրող Արսեն Թորոսյանն իր կնոջը պատկանող «Միբս» բժշկական կենտրոնը դարձրել էր արտոնյալ կենտրոն:

«Ժամանակ» թերթի տեղեկություններով  այն ժամանակ դեռ Արմավիրի մարզպետ Համբարձում Մաթևոսյանը նույնպես գործի էր դրել փորձված վարչական ռեսուրսի չարաշահումը: Մարզպետը իր մոտ էր կանչում տարբեր պետական հաստատությունների աշխատակիցների և նրանց առաջարկում արտահերթ խորհրդարանական ընտրությունների ժամանակ աջակցել «Քաղաքացիական պայմանագիր» կուսակցությանը՝ դրա դիմաց խոստանալով առաջխաղացում:

Վայքում համայնքի ղեկավարի ԺՊ նշանակված Գարիկ Սարգսյանը նախընտրական շրջանում, ըստ իրավապաշտպանների,  չարաշահել է Վայքի համայնքային մեդիա ռեսուրսը: Բացի այդ, Վայքում ՔՊ-ականները քրեորեն արգելված բարեգործություն են արել։

Հեղափոխությունից հետո հանցագործության մասին հաղորդում է ներկայացվել ընդդեմ՝ այն ժամանակ դեռ Կոտայքի մարզպետ Ռոմանոս Պետրոսյանի։  Դրանում ասվում էր, որ «Կոտայքի մարզպետը, օգտագործելով իր վարչական լծակները, մարզի միջնակարգ դպրոցների կառավարման խորհուրդներում ներգրավում է իր համար ցանկալի անձանց, որպեսզի վերջիններս էլ որպես տնօրեն ընտրեն իրենց համար ցանկալի անձանց:

Առողջապահության նախարար Անահիտ Ավանեսյանն իր՝ մարզային գործուղումներն ուղղաթիռով՝ Սանավիացիայով է իրականացրել, ինչը նույնպես պաշտոնեական դիրքի չարաշահում է: Համեմատության համար նշենք, որ Ղազախստանի առողջապահության նախարարը ընդամենը ամիսներ առաջ պաշտոնանկ է արվել Սանավիացիայի օդանավից օգտվելու համար եւ այժմ մեղադրվում է պաշտոնեական դիրքի չարաշահման համար։ Նույն սցենարը Հայաստանի պարագայում, իհարկե, չի գործի, քանզի իշխանությունը կադրային լուրջ խնդիր ունի:

Վերը նշված անձինք ոչ միայն չեն ազատվել զբաղեցրած պաշտոններից՝ պաշտոնեական դիրքի չարաշահման պատճառով, այլ նաև մինչ օրս օգտվում են իշխանության մեջ լինելու բացառիկ բարիքներից: Ինչպես տեսնում ենք՝ Նիկոլ Փաշինյանի այդ մեկ խոստումն էլ է գրվել սառույցին: