Փաշինյանի և թիմակիցների քաղաքական «բլեֆեր»-ի կարճ կյանքը

Գաղտնիք չէ, որ ՔՊ-ական պաշտոնյաները հաճախ են փորձում մեդիա դաշտում տիրաժավորել այնպիսի տեղեկատվություն, որը հնարավորություն կտա իրենց քաղաքական դիվիդենտներ շահել: Սա իրականում ոչ այլ ինչ է, քան քաղաքական բլեֆի դասական օրինակ:

Դիցուք՝ Նիկոլ Փաշինյանը կառավարության նիստում հայտարարում է, որ թոշակների 10 տոկոսով փաստացի ավելացում ունենք: Արդյո՞ք սա ճիշտ տեղեկություն է` հաշվի առնելով, որ թոշակները որպես այդպիսին չեն բարձրանալու: Իրականում, սակայն, սա բլեֆ է. կենսաթոշակների ոչ մի բարձրացման մասին խոսք չկա, և այն, ինչ ուզում է անել կառավարությունը, ոչ մի առնչություն չունի կենսաթոշակների բարձրացման հետ։ Կենսաթոշակների 10 տոկոս բարձրացում՝ նշանակում է, որ նախկին, ասենք՝ 40 հազար դրամի փոխարեն՝ թոշակառուն ստանալու է 44 հազար դրամ։ Բայց այդպես չէ. կենսաթոշակառուն շարունակելու է ստանալ այնքան, որքան ստացել է։

Երևանի քաղաքապետի ՔՊ-ական թեկնածու Տիգրան Ավինյանը պարբերաբար հայտարարում է, որ մոտ ապագայում սկսելու են մետրոպոլիտենի նոր կայանի կառուցումը: Ավինյանը, մասնավորապես, գրել է՝  «Աջափնյակից» բացի ևս մեկ միջանկյալ կայարանի կառուցում է նախատեսվում «Փեթակի» մոտ։ «Ուրախ եմ հայտնել, որ առաջիկայում մայրաքաղաքում սպասվող լայնածավալ ծրագրերի շարքում են ոչ միայն նախկինում հայտարարված Երևանի մետրոյի «Աջափնյակ» կայարանի կառուցումը, այլև ևս մեկ միջանկյալ կայարանի կառուցում «Փեթակ» առևտրային կենտրոնի հարևանությամբ և 250 նոր էլեկտրական ավտոբուսի ձեռքբերումը»,- գրել է նա։ Իրականում դեռ հասկանալի չէ, թե ինչ գումարներով է կառուցվելու մետրոյի նոր կայարանը, սակայն այդ ծրագիրը փորձում են էլ ավելի ճոխացնել և դրան ավելացնել ևս մեկ կանգառի կառուցում, ինչը, ըստ էության, որևէ լուրջ ծախս չի ենթադրում: Չենք զարմանա, որ արդյունքում կկառուցվի հենց միայն նոր կանգառը, իսկ կայարանի կառուցումը կգրվի սառույցին:

Մետրոյի նոր կայարանի կառուցման համար ներդրող ներգրավելու ընթացքում հասցրել է փիառվել նաև էկոնոմիկայի նախարար Վահան Քերոբյանը.

ՔՊ-ական պատգամավոր Էդուարդ Աղաջանյանը հայտարարում է, որ Նիկոլ Փաշինյանի ելույթից հետո Ադրբեջանը դիվանագիտական մեկուսացման մեջ հայտնվեց․ ունենք ազդակներ՝ Բաքվի պահվածքն ընդունելի չէ: Բնական է, որ շարքային քաղաքացիներին տեղյակ չեն պահի, թե ինչ ազդակներ են ստացվել, որոնք այդպես ոգևորել են ՀՀ իշխանություններին, սակայն նման հայտարարություն անելով` հասարակության մի ստվար հատվածի գլխի տակ դրվում է բարձ, փորձում են համոզել, որ ամեն բան վերահսկվում է, իսկ արդյո՞ք դա այդպես է: 

2018 թվականի նոյեմբերի 29-ին՝ խորհրդարանական արտահերթ ընտրությունների քարոզարշավի ժամանակ վարչապետի պաշտոնակատար, «Իմ քայլը» դաշինքի առաջնորդ Նիկոլ Փաշինյանը Գեղարքունիքի մարզի Գավառ քաղաքի բնակիչների հետ հանդիպմանը, խոսելով սպասվող ներդրումների մասին, հայտարարեց, որ Ծովազարդ գյուղից ծագումով մի գործարար 2019 թ. հունվարին տեքստիլի գործարան կբացի շրջանում: Տվյալ գործարանի կառուցումից, իհարկե, մինչ օրս որևէ նորություն չկա:

Բազմաթիվ խոստումներ էր տվել նաև այն ժամանակ դեռ Բարձր տեխնոլոգիական արդյունաբերության նախարար Հակոբ Արշակյանը:  Օրինակ, որ «Հայաստանը պետք է հանդես գա որպես տարածաշրջանային էկոհամակարգի կենտրոն»: Այն ժամանակ այդ ձևակերպումը շատերի համար թվաց հեղափոխական, սակայն այսօր արդեն պարզ է, որ դա ընդամենը հերթական բլեֆն էր:

Պարզից էլ պարզ է, որ շատ հաճախ ՀՀ պաշտոնյաները պարզապես խեղաթյուրում են իրականությունը` ներկայացնում այն այնպիսի փաթեթավորմամբ, որը կօգնի իրենց ժամանակ և քաղաքական դիվիդենտներ շահել, թեկուզ և ոչ երկար ժամանակով, քանի որ բլեֆը վաղ թե ուշ բացահայտվելու է: