Ովքեր և ինչու են կոծկել նախկին պաշտոնյաների «թալանն» ու ապօրինությունները

Վերլուծական 25 Մայիս, 2022 20:35

Թավշյա հեղափոխությունից հետո նոր պաշտոնների նշանակված ՔՊ-ականները մեկը մյուսին հերթ չզիջելով խոստանում էին մոտական շաբաթներին կամ ամիսներին բացահայտել իրենց նախորդների թալանը` աուդիտ իրականացնել, ինչպես նաև վերհանել նախորդների ապօրինի հրամանները, որոշումները որի արդյունքում մերժվածները պետք է պատժվեին օրենքի ողջ խստությամբ։ Արդյո՞ք նրանք կատարեցին իրենց խոստումները:

Օրինակ` այն ժամանակվա սփյուռքի նախարար Մխիթար Հայրապետյանը, որ խոստանում էր վերհանել Հրանուշ Հակոբյանի թալանը, այդպես էլ հանրությանը վերոնշյալ թալանի որևէ փաստ չներկայացրեց:

«Հայաստան» համահայկական հիմնադրամի գործունեության մեջ սկզբում որոշակի կոռուպցիոն ռիսկեր գտած Հայկակ Արշամյանը այնուհետև հայտարարեց, որ նման ռիսկեր չկան, աուդիտը ոչ մի չարաշահում չի հայտնաբերել:

Փաշինյանը հայտարարում էր, որ Նաիրիտ գործարանից նախկին վարչապետ Տիգրան Սարգսյանը շուրջ 300 միլիոն դոլար է յուրացրել: Մինչդեռ հենց այսօր գործող իշխանությունները ամեն կերպ փորձում են խոչընդոտել Նաիրիտում աուդիտի անցկացումը, որը կարող էր ապացուցել կամ ինչու ոչ՝ հերքել Փաշինյանի այդ պնդումները:

Լոռու նախկին մարզպետ Անդրեյ Ղուկասյանի հանրությանը սենսացիոն բացահայտումներ էր խոստանում՝ մարզպետարանում նախկինների կատարած թալանից, աուդիտի թիրախում էին նաև մարզի դպրոցները, սակայն Լոռու մարզպետարանում շատ արագ մոռացան, որ հասարակությանը բացահայտումներ են պարտք և որոշեցին աուդիտ ընդհանրապես չանցկացնել:

Արարատի նախկին մարզպետ Գարիկ Սարգսյանն էլ պաշտոնը ստանձնելուց անմիջապես հետո կարգադրել էր իր ղեկավարած կառույցում աուդիտ անցկացնել, որի արդյունքների մասին տեղեկություն չկա անգամ երեք տարի անց էլ:

Առողջապահության նախարար նշանակվելուց անմիջապես հետո Արսեն Թորոսյանը ասուլիս հրավիրեց, և իր նախորդին՝ Ալևոն Ալթունյանին, մեղադրեց ոլորտը տապալելու, կոռուպցիայի, բազմաթիվ չարաշահումների մեջ: Թորոսյանը նախարար աշխատեց շուրջ երկու տարի, սակայն այդպես էլ Ալթունյանի ապօրինի գործողությունների մասին որևէ փաստ և ապացույց հանրությանը չներկայացրեց:

Ընդ որում, ուշագրավն այն է, որ հեղափոխությունից հետո ՔՊ-ական պաշտոնյաները աուդիտ չեն իրականացնում՝ վեր հանելու նաև իրենց ղեկավարման շրջանում արձանագրված պոտենցիալ խախտումները և չարաշահումները: Հաշվեքննիչ պալատի նախկին նախագահ Լևոն Յոլյանի խոսքերով՝ պետական ապարատի մեծ մասը հեղափոխությունից հետո աուդիտ չի անցկացրել: Իսկ սա նշանակում է, որ թավշյա պաշտոնյաները ինչ-ինչ պատճառներով թաքցնում են ոչ միայն նախկինների թալանը, այլ չի բացառվում նաև, որ փորձ է արվում կոծկել սեփական չարաշահումները: Իսկ եթե մի պահ ենթադրենք, որ թալանը վեր չեն հանել, որովհետև այն չի եղել, ստացվում է՝ վերը նշված պաշտոնյաները սուտ մատնություն են տվել, ինչը նույնպես քրեորեն պատժելի արարք է և նույնպես պետք է դառնար պատկան կառույցների ուսումնասիրության առարկա...