Ում կառավարման տարիներին են երկրում աճել ծայրահեղ աղքատների թիվը

Քանի որ կառավարության կողմից հաճախ է խոսվում այն մասին, որ իրենց համառ ջանքերի արդյունքում հնարավոր է եղել հասնել ծայրահեղ աղքատների թվի զգալի կրճատմանը, փորձենք հիմնվելով վիճակագրական կոմիտեի պաշտոնական տվյալների վրա պարզել՝ ՀՀ ղեկավարներից ում կառավարման տարիներին է ծայրահեղ աղքատությունը եղել իր ամենաբարձր և ամենացածր կետում:

Հիմք ունդունելով 1996 թվականին ՀՀ վիճակագրական կոմիտեի տարածած տվյալները` կարող ենք արձանագրել, որ Լևոն Տեր-Պետրոսյանի կառավարման տարիներին հանրապետությունում առկա են եղել 1.7-1.8 միլիոն աղքատներ, որոնցից 800-900 հազարը կազմում էին ծայրահեղ աղքատները:

2004-ին ծայրահեղ աղքատ բնակչության քանակը կազմում էր 4.4 տոկոս, 2005-ին՝ 3.3 տոկոս,  2008-ին՝ 1.6 տոկոս: 2011-ին` 3.7  տոկոս, 2012-ին ՝ 2.8 տոկոս, 2013-ին՝ 2.7  տոկոս, 2014-ին՝ 2.3 տոկոս, 2015-ին ՝ 2.0 տոկոս:

2016-ին ծայրահեղ աղքատ էր բնակչության  1.8 տոկոսը: Շատ աղքատների տեսակարար կշիռն ամբողջ բնակչության մեջ կազմել է 9.8%` 2008թ.-ին արձանագրված 12.6%-ի դիմաց: Ծայրահեղ աղքատության մակարդակը կազմել է 1.8%` 2008թ.-ին արձանագրված 1.6%-ի դիմաց :

2018-ին հեղափոխությունից հետո ծայրահեղ աղքատ էր բնակչության 1.0 տոկոսը, 2019-ին՝ 1.4-ը, 2020-ին ծայրահեղ աղքատ էր համարվում բնակչության՝ 0.7 տոկոսը:

Ինչպես տեսնում ենք` թեև հեղափոխությունից հետո ունեցել ենք ծայրահեղ աղքատ բնակչության թվի կրճատում, սակայն այդ կրճատումը աննախադեպ չես անվանի: 2008 թվականին՝ Սերժ Սարգսյանի կառավարման տարում ծայրահեղ աղքատ բնակչության թիվը կազմել է 1,6 տոկոս: