Քաղաքացիների գրպանին հարվածող պաշտոնյաների՝ ճոխ և կոռուպցիոն ռիսկ պարունակող գնումները

Նախորդ տարի պետական երկու կառույց՝ ՏՄՄՊՀ-ն և ՀԾԿՀ-ն, աչքի են ընկել իրենց բավականին մեծածավալ գնումներով, որոնց մի մասը, ինչպես և ակնկալվում էր, կատարվել է մեկ անձից գնման ընթացակարգով և առանց մրցույթի: 

Դիցուք՝ ՏՄՊՊՀ-ն 288,000 հազար դրամով համակարգչային ծառայություններ է գնել, 277,400-ով թվային տպագրության ծառայություններ, 6,737,700 դրամով էլ.էներգիայի բաշխման ծառայություն, 255,000 դրամի պատյաններ, 270,000 և 508,000 դրամի հսկողության համակարգեր, 438,600 դրամի փորձաքննության ծառայություններ, 715,000 դրամի ավտոմեքենաների վերանորոգման ծառայություններ, 250,000 դրամի ավտոմեքենաների լվացման ծառայություններ, 350,000 դրամի պատճենահանող սարքի վերանորոգման ծառայություն, 300,000 դրամի օդորակիչների վերանորոգման ծառայություններ, 450,000 համակարգչային սարքերի վերանորոգման ծառայություններ, 44,527,776 դրամի ոչ բնակելի անշարժ գույքի վարձակալություն.  1,950,000 դրամի փոստային ծառայություն, 115.120 դրամի տնտեսական ծառայություն, 1081600 մասնագիտական լաբորատոր հետազոտությունների ծառայություններ, 1328000 արտասահմանյան պատվիրակությունների ընդունման ծախսեր,  3214598.4 դրամի բենզին,  852500 դրամի արտասահմանյան պատվիրակությունների ընդունելության հետ կապված թվային տպագրության ներկայացուցչական ծառայություններ և այլն:

ՀԾԿՀ-ն այս առումով հետ չի մնացել: Այս տարի կառույցը արդեն իսկ հասցրել է ավտոմեքենաների վերանորոգման ծառայություններ գնել մեկ անձից, այն էլ 223.333.3 հազար դրամով: Նախորդ տարի 224,898 դրամի գրենական պիտույքներ են գնվել` իհարկե առանց մրցույթի, 372,000 դրամի ավտոմեքենաների անիվներ, 239,040 դրամի առողջապահական նյութեր,  499,500 դրամի ավտոմեքենաների վերանորոգման ծառայություններ,  619,000 դրամի աթոռ, 228,000 դրամի փոշեկուլ,  818,650 դրամի տնտեսական ապրանք, 3,040,000 դրամի հեռախոսային ծառայություն, 500,000 դրամի համակարգչային սարքերի վերանորոգման ծառայություններ, 1,152,000 դրամի ծրագրային ապահովման սպասարկման ծառայություններ, 568,765 խմելու ջուր: 

Սյս ամենը, իհարկե, երկու կառույցների գնումների ամբողջական ցանկը չէ: Մյուս կողմից նշենք, որ ճոխ և կոռուպցիոն ռիսկեր պարունակող գնումներ կատարող կառույցների ղեկավարները՝ Գարեգին Բաղրամյանը և Գեղամ Գևորգյանը, նախորդ տարի հսկայական հարված են հասցրել քաղաքացիների գրպանին: Առաջինը պեչատում էր սակագների թանկացման անխտիր բոլոր հայտերը, որոնք ստացվում էին ՀԾԿՀ-ում, արդյունքում` թանկացավ գազը, ջուրը, էլ.էներգիան: Գեղամ Գևորգյանն էլ իր հերթին աչք էր փակում դրակոնյան թանկացումների վրա, դրանով իսկ պաշտպանելով մենաշնորհատերերին և օլիգարխներին: Մինչդեռ սեփական կառույցների կարիքների վրա վերջիններս, ինչպես տեսնում ենք, բյուջեից ոչ մի լումա չեն խնայել և գոտիները ձգելու Փաշինյանի կոչը նրանց չէր վերաբերվում: Ընդ որում, վերջիններիս գնումները պարունակում են նաև կոռուպցիոն ռիսկեր, ոչ միայն այն պատճառով, որ մեծ մասը կատարվել է մեկ անձից, այլ նաև այն  պատճառով, որ ծառայությունները մատուցող ընկերությունները գտնվում են ՀԾԿՀ և ՄՊՀ վերահսկողության տակ. դիցուք՝ Ֆլեշ Մոթորսը կամ Վեոլիա ջուրը...