Փաշինյանն ու թիմակիցները մոռացե՞լ են 2016-ի դեպքերը և իրենց տված գնահատականները

Երեկ Երևանում տեղի ունեցող բողոքի ակցիայի ընթացքում իրավապահները դիմեցին ոչ ավել, ոչ պակաս լուսաձայնային նռնակների կիրառմանը: Այստեղ ուշագրավը ոչ այնքան ոստիկանության գործողություններն են, որքան ՔՊ-ական որոշ պաշտոնյաների արձագանքը, վերջիններս այնքան էին լծվել ոստիկանության գործողությունները արդարացնելուն, որ անգամ մոռացել էին՝ ժամանակին իրենք նման նռնակների կիրառումը համարում էին հանցագործություն:

Դիցուք՝ բոլորս քաջ հիշում ենք 2016-ին Սարի Թաղում տեղի ունեցած հայտնի դեպքերը, որոնց ժամանակ կիրառվեցին վերը նշված տխրահչռակ լուսաձայնային նռնակները: Այն ժամանակ ցուցարաներին և ոստիկաններին հանդարտացնող ընդդիմադիր պատգամավոր Նիկոլ Փաշինյանը կտրուկ կերպով քննադատեց իրավապահների այդ քայլը, իսկ նրա ընտանեկան թերթը 2017-ին բողոքում և ահազանգում էր, որ 2016 թվականի հուլիսի 29-ին Սարի թաղում տեղի ունեցած դեպքերի գլխավոր հերոս, լուսաձայնային նռնակ նետող, ոստիկանության գնդապետ Լեռնիկ Երանոսյանի լիազորությունները ծառայողական քննությունից հետո վերականգնվել են:

Ժամանակին՝ ԵԼՔ խմբակցության անդամ Էդմոն Մարուքյանին շատ էր հետաքրքրում, թե քաղաքացիների դեմ հատուկ միջոցներ կիրառած իրավապահները պատժվելու են արդյոք, թե ոչ: Այսօր Մարուքյանը կրկին Փաշինյանի կողքին է՝ նրա հատուկ հանձնարարություններով դեսպանն է և ինչպես ցույց են տալիս երեկվա դեպքերը՝ խոսելու և քննադատելու հանձնարարություն Մարուքյանը այսօր չի ստացել:

Սարի թաղի դեպքերով տուժածներին փոխհատուցում նախատեսող օրինագիծ ընդունած Լենա Նազարյանը իր հերթին երեկ չի դատապարտել ոստիկանության գործողությունները և, բնականաբար, նրանց գործողություններից տուժած քաղաքացիներին փոխհատուցում չի առաջարկի:

ՔՊ-ական պատգամավոր Վահագն Ալեքսանյանը հեղափոխությունից հետո որոշակի կշտամբանքի նոտաներով հայտարարում էր, որ ՄԻՊ Արման Թաթոյանի պլանկան մնացել է իր՝ Սարի Թաղի դեպքերի մասով արված հայտարարությունը: Այն ժամանակ Թաթոյանը բավական մեղմ էր գնահատել ուժայինների գործողությունները` ասելով, որ երթը չէր կրում խաղաղ բնույթ: Սակայն, թե ուր է այսօր իր՝ Ալեքսանյանի պլանկան կարելի է դատել երեկվա նրա գրառումներից, որտեղ քիչ էր մնում պատգամավորը շնորհակալություն հայտներ ոստիկանությանը ժողովրդի դեմ հատուկ միջոցներ կիրառելու համար:

2018 թվականի ապրիլին ոստիկանության հետ Բաղրամյան պողոտայում տեղի ունեցած բախումից և լուրջ վնասվածքներ ստանալուց հետո Նիկոլ Փաշինյանը հայտարարել էր, որ ոտիկանների մեծ մասը այդ բախման ընթացքում վնասվածքներ են ստացել  իրենց օգտագործած ձայնային նռնակից, ինչը վտանգավոր է եւ ինչին ոստիկանությունը չպետք է դիմեր Մարտի 1-ից հետո:

Արսեն Թորոսյանը, ով հեղափոխության օրերին ակտիվ պայքարում էր և նրան էլ էր բաժին հասնում իրավապահ մարմինների հետ լոկալ բախումներում, այսօր 2018-ին իր կողմից արվածը պիտակավորում է որպես խուլիգանակրատիա: Մինչդեռ 2018-ին էլ էին ցուցարարները դուրս եկել իշխանափոխության պահանջով, այսօր էլ պահանջը նույնն է:

Ակնհայտ է, որ կա՛մ Նիկոլ Փաշինյանն ու իր մերձավոր շրջապատը շատ կարճ հիշողություն ունեն, կա՛մ առաջնորդվում են բացահայտ երկակի ստանդարտներով: