«Կրիայի տեմպերով» զարգացող մարզը. Արարատ Գրիգորյանը ձախողել է իր կառավարումը

Շարունակելով ընթերցողի ուշադրությանը ներկայացնել իրենց վստահված ոլորտները տապալած ՔՊ-ական պաշտոնյաներին` այսօր կանդրադառնանք այս պահի դրությամբ ամենաերկարակյաց մարզպետ՝ Վայոց Ձորի մարզը ղեկավարող Արարատ Գրիգորյանին:

Արարատ Գրիգորյանը այս պաշտոնը ստանձնել է 2019 թվականին և այդ պահից ի վեր մարզը չի կարող հպարտանալ գրանցած փոքր կամ մեծ հաջողություններով, այն պատճառով, որ դրանք պարզապես չկան: Առաջին խնդիրը, որը չհաջողվեց լուծել Գրիգորյանին, մարզի առջև կանգնած լուրջ բնապահպանական խնդիրն էր: Ամուլսարի հանքի վերաբացման մասով բնապահպաններին խոստումներ շռայլած և նրանց հետ քննարկումներ անցկացնող մարզպետը, ըստ մամուլի, մինչև վերջին ամիսները շարունակում էր ճնշում գործադրել Ջերմուկի համառող ավագանու վրա: ՏԻՄ ընտրություններին հետո նման խնդիր Գրիգորյանը այլևս չունի: Ավելորդ է ասել, թե ինչ բնապահպանական խնդիրներ են առաջանալու մարզում Ամուլսարի հանքի վերագործարկումից հետո:

Ոչ պակաս փոքր ձախողում է արձանագրվել մարզի ներդրումային ոլորտում: Չնայած այն բանին, որ մարզում ներդրումային համաժողով է կայացել՝ ներդրումային բում, մեղմ ասած, չկա: Ընդհանրապես Գրիգորյանը և իր թիմը նախընտրում են լռել իրենց ներգրավված ներդրումների մասին և նրանց կարելի է հասկանալ: 2020 թվականի հուլիսի 1-ի դրությամբ մարզի 8 համայնքների տեղական բյուջներով ընդամենը եկամուտներ են նախատեսվել 1 մլդ 115,7մլն ՀՀ դրամ, տեղական բյուջեներին ամրագրված ընդամենը եկամուտներից հավաքագրվել է 1 մլդ 100,6 մլն ՀՀ դրամ, այսինքն բյուջեի եկամուտները թերակատարվել են:

 2020 թվականի առաջին կիսամյակի ընթացքում մարզի բոլոր համայնքները տուժել են ցրտահարությունից և կարկտահարությունից, ինչ է արել մարզի ղեկավարությունը տուժած գյուղացիներին օգնելու համար՝ ճիշտ է, ոչինչ: Մարզպետարանի պաշտոնական կայքում որպես բնապահպանական կարևոր ծրագիր նշվում է այն, որ Վայրի բնության և մշակութային արժեքների պահպանման հիմնադրամի կողմից մարզին անվճար տրամադրվել է 10 հատ էլեկտրոնային հովիվ:

Մարզպետարանի կողմից ախատեսվել էր գյուղատնտեսության համար ոչ արդյունավետ 26 հա գյուղատնտեսական նշանակության հողատեսքեր տրամադրել արևային վահանակների տեղակայման համար, ներկա պահին տեղադրված է 1.5հա-ի վրա: 

Աղքատությունը մարզում կազմել է 21.9 տոկոս, ինչը ամենաբարձր ցուցանիշներից է Հայաստանում: 2018 թվականի համեմատ մարզում չի փոխվել Պետական նախնական մասնագիտական (արհեստագործական) ուսումնական հաստատությունների, Պետական միջին մասնագիտական ուսումնական հաստատությունների թիվը:

Մամուլի ունեցած տեղեկատվության համաձայն՝ իշխանափոխությունից հետո Վայոց ձորի մարզպետարանում բացի վերը նշված ձախողումներից նաև ամենաթողություն է տիրում։ Մասնավորապես, AntiFake.am-ին դիմած քաղաքացին տեղեկություններ էր փոխանցել Վայոց ձորի մարզպետարանում առկա «ֆեյք» հաստիքների մասին: Մասնավորապես, քաղաքացու պնդմամբ՝ մարզպետարանում ստեղծվել են «ֆեյք» հաստիքներ` իշխանական ուժի ներկայացուցիչների մտերիմներին և «հեղափոխության» իրականացման մեջ իրենց «ավանդը» ներդրած անձանց «տեղավորելու» համար։

Ինչպես տեսնում ենք`  ընդամենը երեք տարիների ընթացքում ՔՊ-ական մարզպետին հաջողվել է տապալել իր կուռացիայի տակ գտնվող մարզի գրեթե բոլոր կարևորագույն խնդիրների լուծումը: