ՔՊ-ականները շարունակում են հին «հաշիվները» պարզել միմյանց հետ

Այսօր ԱԺ-ում բավականին թեժ էր, հանձնաժողովների նիստում քննարկվում էր բավականին ցավոտ մի հարց, այն է, թե ինչպես է համավարակի ընթացքում ծախսել բյուջեի գումարները առողջապահության նախարարը: Սակայն, նիստը կեսից սկսեց հիշեցնել ոչ թե դասական հանձնաժողովի նիստ այլ ներքին ռազբորկա, որի ընթացքում ՔՊ-ականները մեկը մյուսի հետ հին հաշիվները մաքրելու փայլուն հնարավորություն էին ստացել:

Դիցուք՝ բնականաբար Հաշվեքննիչ պալատի նախագահ Ջանջուղազյանի հետ համամիտ չէր Արսեն Թորոսյանը: Ջանջուղազյանը պնդում է, որ համավարակի ընթացքում բավականին աղաղակող խախտումներ են տեղի ունեցել: Քննարկումը վեր ածվեց հարաբերություններ պարզելուն և դա զարմանալի չէ: ՀՊ ներկայիս նախագահ Ատոմ Ջանջուղազյանը և Արսեն Թորոսյանը բավական լարված հարաբերություններ ունեին այն ժամանակ, երբ երկուսն էլ դեռևս նախարարի պաշտոն էին զբաղեցնում։ Արսեն Թորոսյանն ակնարկում էր, որ Ջանջուղազյանը նախկին է և հակահեղափոխական, ինչպես նաև պահպանողական հայացքների կողմնակից։ Իսկ Ջանջուղազյանը դեմ էր արտահայտվել Թորոսյի գլխավոր նախագծին` առողջապահության հարկ ներմուծելուն` պնդելով, որ դա ավելացնելու է քաղաքացիների հարկային բեռը և, ընդհանուր առմամբ, անիմաստ և ծախսատար ծրագիր է, ինչի հետ անշուշտ Թորոսյանը չէր համաձայնվել, ինչն էլ հանգեցրել էր երկու նախարարների գժտվելուն։

Ընդ որում, ակնհայտ է, որ նիստը վարող Նարեկ Զեյնալյանը թեև փորձում է պահպանել օբյեկտիվությունը, սակայն ամեն դեպքում առիթը բաց չի թողնում կսմիթներ հասցնել ինչպես ասում են՝ առիթի գլխավոր մեղավորին՝ Արսեն Թորոսյանին: Եվ սա էլ պատահական չէ:  ԱԺ առողջապահության հանձնաժողովի նախագահ Նարեկ Զեյնալյանի և առողջապահության նախկին նախարար Արսեն Թորոսյանի հակամարտությունը հին է. դեռ ժամանակին փոխվարչապետ Արարատ Միրզոյանն էր ուզում, որ Արա Մինասյանի փոխարեն «Գր. Լուսավորիչ» ԲԿ տնօրեն նշանակվի իր սանիկը` Նարեկ Զեյնալյանը, սակայն Թորոսյանը նշանակեց իր մարդուն: Վերջերս էլ Միրզոյան-Զեյնալյան դուետը հնարավորություն ունեցավ «կոնտրուդառ» հասցնել թիմակից նախարարին` Մաշկաբանության և սեռավարակաբանության կենտրոնի օրինագծով: Օրենսդիրը, ի դեմս Զեյնալյանի, թույլ չտվեց, որ կենտրոնը մասնավորեցվի և ԱԺ մեծամասնությունը հավանություն տա դրան:  Ամիսներ առաջ Զեյնալյանի՝ պարետատան նիստերին մասնակցելու որոշումից Թորոսյանը դժգոհ է մնացել, սակայն լռել է՝ հաշվի առնելով, որ այդ որոշումը կայացվել է վարչապետի կողմից: Դեռ ավելին, վերջինս համաձայնություն է տվել, որպեսզի այս ամենից զատ Նարեկ Զեյնալյանը ձևավորի մի մասնագիտական քննարկման հարթակ, որը պետք է պարբերաբար հավաքվի, քննարկումներ անցկացնի և ներկայացնի պարետատուն: Մամուլը անգամ գրում էր, որ Թորոսյանը ընտրություններից առաջ ծրագիր ուներ, նա ցանկանում էր, որպեսզի առողջապահության այն ժամանակվա նախարարի ԺՊ Ավանեսյանը խորհրդարանում զբաղեցնի ԱԺ առողջապահության և հանրային հարցերի հանձնաժողովի նախագահի պաշտոնը, և այս դեպքում Թորոսյանը մեկ զարկով երկու նապաստակ կխփեր. Նարեկ Զեյնալյանին կհեռացնի ճանապարհից և իր մարդը կունենա այդ հանձնաժողովում: Թե ինչու այդ ծրագիրը ձախողվեց՝ դժվար է ասել:

Այս ներքին ռազբորկաներից, անշուշտ, անմասն չէր մնում նաև գործող նախարար Անահիտ Ավանեսյանը, ում դերը թերևս ամենաբարդն է: Մի կողմից մամուլը բազմիցս էր գրել, որ Թորոսյանն ու Ավանեսյանը ունեն լարված հարաբերություններ: Արսեն Թորոսյանի արբանյակ սորոսական ՀԿ-ներն անգամ արշավ էին սկսել նախարար Ավանեսյանի դեմ, ինքն էլ Թորոսյանը մի քանի անգամ հրապարակավ մեղադրել է Ավանեսյանին անարդյունավետ աշխատանքի մեջ: Այժմ Ավանեսյանը ստիպված է պաշտպանել Թորոսյանին, քանի որ, ըստ էության, պաշտպանում է իր գերատեսչությունը, ասել է թե՝ նաև իրեն: Սակայն, ակնհայտ է, որ Ավանեսյանը դա անում է, մեղմ ասած, առանց մեծագույն ցանկության և ձգտման:

Ինչևէ, վերը նշվածից պարզ է դառնում, որ ՔՊ-ում ներքին մենամարտերը չեն դադարում, եթե կա առիթը՝ միմյանց փուռը տալ ցանկացողներ մշտապես կգտնվեն...

Այս թեմայով Իրանը ՄԱԿ-ի Անվտանգության խորհրդի շտապ նիստ է պահանջել Լիբանանում իսրայելական գործողությունների առնչությամբ ՈՒՂԻՂ․ Աժ գիտության, կրթության, մշակույթի եվ սպորտի հանձնաժողովի նիստ ՈւՂԻՂ. Կառավարության հերթական նիստը ՈւՂԻՂ. Ռոբերտ Քոչարյանի և մյուսների գործով դատական նիստ ՈւՂԻՂ. Ռոբերտ Քոչարյանի և մյուսների գործով դատական նիստ