Նոր բացահայտումներ և «մութ ամպեր»` պաշտոնյաների գլխին

ՄՊՀ տարբեր դիտարկումների և վերլուծությունների արդյունքում  հայտնաբերվել են հակամրցակցային համաձայնության, գերիշխող դիրքի չարաշահման, պետական մարմինների ու պաշտոնյաների կողմից մրցակցության սահմանափակման բազմաթիվ դեպքեր։ Ի թիվս այլ կառույցների` վարույթներ են հարուցվել  Էկոնոմիկայի նախարարության, առողջապահության նախարարության , Կադաստրի կոմիտեի նկատմամբ։ Վարույթի արդյունքներով նշված պետական կառույցների գործունեությունը որակվել է՝ որպես «պետական մարմնի կողմից տնտեսվարող սուբյեկտների նկատմամբ խտրական պայմանների սահմանում»։

Դեղերի շուկայում գործող «Վան Ֆարմ» ընկերությունը 2020թ. դիմել է Առողջապահության նախարարությանը՝ ՌԴ-ից Հայաստան 40 անուն դեղ ներմուծելու թույլտվություն ստանալու նպատակով։ Առողջապահության նախարարությունը թույլատրել է ներկայացված 40 անուն դեղերից 19-ի ներմուծումը։ Մնացած 21-ի ներմուծման թույլտվությունը մերժել է՝ պատճառաբանությամբ, որ «Գեդեոն-Ռիխտեր» ԲԲԸ-ն, արտադրող գործարանից ներմուծել է «Գեդեոն Ռիխտեր» ընկերության արտադրության մեծածավալ քանակությամբ դեղեր՝ վեց ամսվա վաճառքի անխափան ապահովման նպատակով։ Այսինքն` գործ ունենք մի իրավիճակի հետ, երբ մեկ ընկերության գործունեությունը սահմանափակել են, մյուսինը՝ ամեն կերպ հովանավորել: Դժվար է ասել, թե ինչ շահ է այստեղ հետապնդել Անահիտ Ավանեսյանի ղեկավարած կառույցը, սակայն այս իրավիճակը բնավ չի խոսում մրցակցային պայմանների ապահովման մասին:

Ինչ վերաբերվում է էկոնոմիկայի նախարարությանը, այս անգամ կառույցը ՄՊՀ թիրախում է հայտնվել A4 ձևաչափի թղթի գնման ընթացակարգերի հրավերների տեխնիկական բնութագրերի մասով, սակայն Վահան Քեչոբյանի նախարարությունը ՄՊՀ ուշադրության կենտրոնում էր հայտնվել նաև նախորդ տարի:  Հանձնաժողովի որոշման մեջ, մասնավորապես, նշվում էր, որ «Սիլիկոն Թրեյդ» և «Ջերմուկ Ինթերնեյշնլ Պեպսի-Կոլա Բոթլեր» ընկերությունները դիմել են Հանձնաժողով` նշելով, որ սպիտակ շաքարի ներմուծումը ազատվում է ներմուծման մաքսատուրքից, ընդ որում, նշված ժամանակահատվածի համար ներմուծման լիցենզիա տրամադրվում է այն տնտեսավարող սուբյեկտներին, որոնք 2020 թվականի ընթացքում ներմուծել են ինչպես սպիտակ շաքար, այնպես էլ շաքարի հումք։ Ընկերությունները նշում են, որ սահմանված պահանջը տրամաբանական չէ, քանի որ կառավարության որոշմամբ շաքարի հումքի ներմուծումն արդեն իսկ ազատվել է մաքսատուրքի վճարումից։ Արդյունքում` ՄՊՀ-ն որոշում էր կայացրել վարույթ հարուցել էկոնոմիկայի նախարարության դեմ:

Այլ երկրներում նման բացահայտումները, իհարկե, անմիջապես հետևանքներ կունենային, վերը նշված կառույցների ղեկավարները առնվազն կբացատրեին, թե ինչու են հակամրցակցային գործունեություն ծավալել, իսկ եթե չհաջողվեր համոզիչ բացատրություններ տալ՝ հրաժարականներ կներկայացնեին և վերջիններիս գործունեությունը կքննեին արդեն պատկան մարմինները: Իսկ գուցե Հայաստանում էլ դեռ ամեն բան կորած չէ, և պատկան մարմինները ամեն դեպքում ուշադրության կենտրոնում կպահեն այն հանգամանքը, որ որոշ պետական կառույցների ղեկավարներ նպաստում են հակամրցակցային միջավայրի խորացմանը, և կպարզեն այդ գործընթացում վերջիններիս իրական մոտիվացիան...