Մարտին Գալստյանը սպառողների գրպանի հաշվին հարստացնում է մենաշնորհատերերին

Երեկ ՄՊՀ-ն բավական ուշական վերլուծություն է հրապարակել, համաձայն որի  2021 թվականի հոկտեմբեր և 2022 թվականի մարտ ամիսների ընթացքում 1 կիլոգրամ «Նոր Զելանդական» տեսակի կարագի ներմուծման ինվոյսային արժեքը բարձրացել է 12-15 տոկոսով: Մրցակցության պաշտպանության հանձնաժողովից հայտնում են, որ միևնույն ժամանակահատվածի ընթացքում դոլարի փոխարժեքը բարձրացել է 5-7 տոկոսով, իսկ ապրանքի մանրածախ իրացման գինը բարձրացել է շուրջ 9 տոկոսով՝ 4312 դրամից դառնալով 4692 դրամ։ 2021 թվականի մայիս և 2022 թվականի մարտ ամիսների ընթացքում միևնույն ապրանքի ինվոյսային արժեքը բարձրացել է 16-18 տոկոսով։ Միևնույն ժամանակահատվածի ընթացքում դոլարի փոխարժեքը իջել է 4-6 տոկոսով, իսկ ապրանքի մանրածախ իրացման գինը բարձրացել է շուրջ 7 տոկոսով՝ 4382 դրամից դառնալով 4692 դրամ: 

Ընդհանուր առմամբ, պարզ է դառնում, որ դոլարի կուրսի նվազումը զգալի հարված է հասցրել արտահանող սեկտորին, իսկ ահա ներմուծողներին գները մի քանի անգամ բարձրացնելու լեգալ առիթ է տվել: Ներմուծողները, ինչպես գիտենք, հիմնականում մենաշնորհատեր, կամ այսպես ասենք՝ գերիշխող դիրք ունեցող տնտեսվարողներն են՝ բենզինի շուկայում, կարագի, շաքարավազի, մսի և այլն: Այս վերը նշված բոլոր ապրանքների գները դոլարի կուրսի նվազման հետևանքով բարձրացել են՝ հարվածելով շարքային սպառողների գրպանին: 2022 թվականի հունվար և մայիս ամիսների ընթացքում 1 լիտր դիզելային վառելիքի  ներմուծման ինվոյսային արժեքը բարձրացել է 52-57 տոկոսով։ 2022 թվականի հունվար և հունիս ամիսների ընթացքում ցորենի ներմուծման ինվոյսային արժեքը բարձրացել է 22-26 տոկոսով։ Միևնույն ժամանակահատվածի ընթացքում դոլարի փոխարժեքը իջել է 8-10 տոկոսով, իսկ 1 կիլոգրամ «Բաղրամյան» տեսակի ալյուրի մանրածախ իրացման գինը բարձրացել է շուրջ 8.8 տոկոսով՝ 285 դրամից դառնալով 310 դրամ։

Մինչդեռ ԿԲ նախագահ Մարտին Գալստյանը պնդում էր, որ դոլարի էժանացումը այնքան էլ չի վնասում սպառողներին, իսկ ահա եթե իրենք միջամտեն՝ ավելի վատ կլինի: Հարց է առաջանում՝ ո՞ւմ համար ավելի վատ` շարքային սպառողների, ովքեր առանց այդ էլ կարագը կամ շաքարավազը գնում են 7 անգամ բարձր գնով, թե մենաշնորհատերերի և գերիշխող դիրք ունեցողների համար, ովքեր սպառողների վրա իրենց ապրանքները 7 անգամ թանկ են վաճառում: Բնական է, որ ավելի վատ կլիներ մի շարք հայտնի օլիգարխների և նրանց բիզնեսների համար: Հետևաբար ԿԲ նախագահի պնդումները, որ դոլարի էժանացումը սպառողի գրպանին չի խփում, չեն համապատասխանում իրականությանը  և դա փաստում է անգամ ՄՊՀ-ն: Փոխարենը՝ ԿԲ-ի կողմից մատը մատին չխփելու քաղաքականությունը գերշահույթներ է ապահովել մի շարք օլիգարխների համար, որոնց բիզնեսները, ի տարբերություն արտահանողների, բարգավաճում են...