Որսագողերի երազանքի ՊՈԱԿ-ը. Ռոմանոս Պետրոսյանն ու Արտակ Մխիթարյանը «կուրացրե՞լ» են էկոակտիվիստներին

Այս տարվա հունիսի 22-ին Բնապահպանության և ընդերքի տեսչական մարմնի Արարատի տարածքային բաժին ահազանգ է ստացվել «Խոսրովի անտառ» պետական արգելոց ՊՈԱԿ-ի «Խաչաձոր» տեղամասում հայտնաբերված բեզոարյան այծի արգասիքների մասին։ Ըստ ԲԸՏՄ հաղորդագրության՝ տեսուչները դեպքի վայրում հայտնաբերել են անհայտ պայմաններում անկած մոտ 2 տարեկան արու այծի արգասիքներ՝ գլուխ, կաշի և ոտքեր։ Հունիսի 6-ին էլ .ջրատար առվի մեջ հայտնաբերվել է Կարմիր գրքում գրանցված, վնասվածքներով սատկած բեզոարյան այծ: Դժվար է հասկանալ, թե ինչ ապօրինություններ են կատարվում պետական արգելոցում, սակայն այն, որ դրանք առկա են այս կամ այն ծավալով, այլևս փաստ է: Իրականում արգելոցի շուրջ աղմուկը չի դադարում՝ մեկ մարում է, մեկ կրկին բորբոքվում: Ամեն բան սկսեց նրանից, որ արգելոցի փոխտնօրենը մեղադրեց այն ժամանակ ՇՄ նախարար Ռոմանոս Պետրոսյանին իրենից ամեն գնով ազատվելու ցանկության մեջ: Այնուհետև Ռոմանոս Պետրոսյանի հրամանով` Բորիս Բաղդասարյանը նշանակվել էր ՀՀ ՇՄՆ «Խոսրովի անտառ» պետական արգելոց ՊՈԱԿ-ի տնօրենի ժամանակավոր պաշտոնակատարի պաշտոնում: Մամուլը այն ժամանակ գրել էր, որ Բաղդասարյանը Պետրոսյանի յուրայինն է և նրա նշանակման փաստը պայմանավորված է հենց այդ հանգամանքով:

Այսօր արդեն ՊՈԱԿ-ի տնօրենի ԺՊ-ն Արտակ Մխիթարյանն է, ով մի քանի անգամ հայտնվել է մամուլի ուշադրության կենտրոնում: Ամիսներ առաջ լուրեր էին տարածվել, որ ՊՈԱԿ-ի այն ժամանակ պահպանության գծով փոխտնօրենի պաշտոնը զբաղեցնող Արտակ Մխիթարյանը մասնակցություն է ունեցել Սյունիքում վարազի ապօրինի որսի դեպքին: Այս լուրը հերքվեց պաշտոնապես: Այնուհետև ևս մեկ սկանդալ եղավ: Եվ չնայած դրան` Մխիթարյանը մնաց ԺՊ, իսկ նոր տնօրեն ընտրելու մրցույթը այդպես էլ չի կայանում: Անգամ եթե Մխիթարյանը որևէ կապ չունի վերը նշված մեղադրանքների հետ, այլ երկրում նման պաշտոնյան արդեն իսկ հրաժարական տված կլիներ՝ հանրության տարատեսակ շերտերի կասկածները ցրելու համար: Ռոմանոս Պետրոսյանը, ում մեղադրում էին ՊՈԱԿ-ի գործերին խառնվելու մեջ, հրաժարական ներկայացրեց, սակայն բնավ էլ ոչ այդ պատճառով, այլ մեկ այլ պաշտոնի անցնելու նպատակով:

Ուշագրավ է նաև այն, որ նախկին իշխանությունների օրոք ընդդիմադիրները, ովքեր այսօր տարբեր պաշտոնների են և գրանտների վրա նստած բնապահպանները բավական ուշադիր էին Խոսրովի անտառի հանդեպ: 2017 թվականի օգոստոսի 12-ին Խոսրովի պետական արգելոցում տեղի են ունեցել մասշտաբային հրդեհներ, որոնք հանգեցրել են էկոլոգիական խոշոր աղետի։ Հրդեհի առաջացման ստույգ պատճառը հայտնի չէ, և շրջանառվում են հակասական կարծիքներ։ Չի բացառվում նաև, որ հրդեհը կարող է ծագած լինել մարդկային գործոնի հետևանքով։ Համաձայն բնապահպանների՝ բնապահպանական կազմակերպությունների հայտարարությունների և լրատվամիջոցների հրապարակումների՝ Խոսրովի անտառ պետական արգելոցը տարբեր տարիներին եղել է որսագողերի, այդ թվում՝ նաև Հայաստանի բարձրաստիճան պաշտոնյաների ու մեծահարուստների սիրված վայր: Ո՞ւր են այսօր այդ բնապահպանները և ինչո՞ւ են լռում, երբ արգելոցի տարածքում ապօրինությունները շարունակվում են, գրանտնե՞րն են վերջացել, թե՞ սկզբունքայնությունը...