Մականունավորներ, «ճշտով ապրող»-ներ, նախկին «տասովշիկներ». ՔՊ-ի հույսը ՏԻՄ ընտրություններում

Հայաստանում սեպտեմբերի 26-ին մեկ տասնյակ համայնքներում ՏԻՄ ընտրություններ են նախատեսված և, բնականաբար, իշխանությունների, իշխող քաղաքական ուժի գլխավոր խնդիրը այստեղ նախկին ձախողումները բացառելն է:

Թերևս դա է պատճառը, որ ՔՊ-ն հերթական անգամ քաղաքական խաղադրույք է անում, ոչ թե երդվյալ և այսպես ասած՝ քայլած հեղափոխականների վրա, այլ նրանց, ովքեր ոչ վաղ անցյալում սերտորեն համագործակցել են նախկինների հետ:

Դիցուք՝ Քաջարանի քաղաքապետի թեկնածուն Արմեն Առաքելյանն է, հաշված օրեր առաջ է մտել ՔՊ։ Մամուլը գրել էր, որ նա նախկինների «տասովշչիկներից» է եղել, մականունը՝ «Զապ», որը ստացել է սովետի թվին հոր «Զապորոժեցը» վարելու պատճառով։ Հայրը եղել է ուսումնարանի, հացի գործարանի տնօրեն։ Հիմա բիզնես ունի՝ հյուրանոց Երեւանում։ Այսինքն` տվյալ դեպքում ՔՊ-ն աչք է փակել իր երկու կարևոր խոստման վրա՝ նախկինները չեն վերադառնալու, բայց արի ու տես վերադառնում են, բիզնեսն ու քաղաքականությունը տարանջատված են լինելու, բայց արի ու տես, որ այդպես չէ և հյուրանոցի տերը կարող է հանգիստ հավակնել համայնքի ղեկավար դառնալուն:

ՔՊ-ի մյուս խոստումը վերաբերվում էր նրան, որ պետական կառավարման համակարգում տեղ չեն ունենալու նրանք, ովքեր նախկինում հայտնվել են քրեական գործերի թիրախում: Կրկին մամուլի տեղեկություններից պարզ է դառնում, որ  Չարենցավանի իշխանական թեկնածուն՝ Արթուր Գալստյանը, Կոտայքի մարզի Չարենցավան համայնքում «Ճնդո» մականունով է հայտնի։ Կիսագողական, «ճշտով ապրող» Գալստյանի մասին լուրեր կան, թե նորատուսցի Ալիկ եւ Արա Բանդուրյան եղբայրներն են աջակցում։ Տարիներ առաջ որդին դատվել է մարդ սպանելու համար. տղայական «ռազբորկայի» ժամանակ դանակահարել է մի երիտասարդի։ 

Բերդ համայնքում իշխանական թեկնածուն 2017 թ․ համայնքի ավագանի ընտրված, իսկ 20-ին Միասնական սոցիալական ծառայության Բերդի տարածքային կենտրոնի տնօրեն նշանակված Վահրամ Սուքիասյանն է: Ինչպես տեսնում ենք` վերջինս նույնպես ՔՊ-ական չէ, ավելին՝ պաշտոնի է նշանակվել նախկին իշխանությունների ժամանակ:

Թալինում Տավրոս Սափեյանն է ՔՊ-ի թեկնածուն, ով նույնպես հասցրել է հայտնվել կրիմինալ ռազբորկաների էպիկենտրոնում:

Ինչ է ստացվում` համայնքներում նախկինները, կիսաքրեական և կրիմինալ աշխարհի հետ կապ ունեցող անձինք ՔՊ-ի դեմքով կրկին իշխանության են գալիս, արդյո՞ք այս սցենարը կանխելու համար չէր տեղի ունեցել 2018 թվականի Թավշյա հեղափոխությունը....