Նախկիններ, քրեական «հեղինակություններ», օրինախախտներ. ՔՊ-ի համայնքապետերի թեկնածուները

Հայաստանի մի շարք համայնքներում մոտակա ամիսներին սպասվում են ՏԻՄ ընտրություններ, արդեն իսկ հայտնի է, թե ՔՊ ցուցակները ովքեր են ղեկավարելու և ուշագրավն այն է, որ համայնքապետերի իշխանական թեկնածուները ոչ միայն այսպես ասած` նախկիններ են, այլև հասցրել են հայտնվել մի շարք պիկանտ պատմությունների կենտրոնում:

Դիցուք՝ Ակունքի համայնքապետի թեկնածուն Հունան Ռուբենյանն է,  վերջինս այս պաշտոնը զբաղեցնում էր նաև հեղափոխությունից առաջ՝ 1996 թվականից և հայտնի էր բյուջեի հաշվին իր ճոխ գնումներով: Դիցուք՝ 2018-ին Ակունք համայնքը նախատեսել է ձեռք բերել ռեգուլյար տեսակի բենզին, որի լիտրը արժե է 420 դրամ, իսկ անհրաժեշտ չափաքանակ է նշված 7262 լիտրը: Փաստորեն, համայնքը պատրաստվում է ձեռք բերել ընդհանուր 3 մլն 50 հազար դրամի բենզին: Համայնքը բջջային հեռախոսների ծառայությունների համար նախատեսել է 1 մլն 763 հազար դրամ, խնջույքների կազմակերպման ծառայությունների համար` 4 մլն դրամ: Ակունքի համայնքապետարանը նախատեսել է գնել նաեւ 300 հազար դրամի խոհանոցային սարքեր:  Մյուս դեպքում` հատն արժե 13 հազար դրամ, անհրաժեշտ քանակությունը դարձյալ 32 հատ է, եւ այս տեսակի ծաղկային կոմպոզիցիայի ընդհանուր արժեքն էլ փաստորեն կազմում է 416 հազար դրամ: Ինչ է սա, եթե ոչ բյուջեի գումարների անհարկի վատնում՝ դժվար է ասել:

Սիսիանում ՔՊ համայնքապետի թեկնածուն Արմեն Հակոբջանյանն է: Նկատենք, որ Արմեն Հակոբջանյանը Սիսիանի նախկին քաղաքապետ Աղասի Հակոբջանյանի եղբորորդին է: Ասել է թե՝ Նիկոլ Փաշինյանը նախկինում քրեական գործերի մեջ թաթախված Սիսիանի նախկին քաղաքապետ Աղասի Հակոբջանյանի եղբորորդուն է նշանակում համայնքի ղեկավարի ժամանակավոր պաշտոնակատար: Իսկ ի՞նչ էր արել նախկին քաղաքապետը: 2012թ. Սյունիքի մարզպետարանը Սիսիանի քաղաքապետարանում իրականացրած վարչական հսկողության արդյունքում բացահայտել էր մի շարք խախտումներ: Սույն գործում որպես մեղադրյալներ ներգրավված են նաեւ Սիսիանի քաղաքապետ Աղասի Հակոբջանյանը, քաղաքապետարանի աշխատակազմի ֆինանսատնտեսական բաժնի պետ Կարեն Դանիելյանը եւ համայնքի ղեկավարի նախկին տեղակալ Աշոտ Գրիգորյանը: Մեղադրանքի հիմքում ընկած էր այն, որ կեղծվել է իրավունք վերապահող պաշտոնեական փաստաթուղթ, եւ այն օգտագործելով՝ խարդախությամբ հափշտակվել է խոշոր չափի` 1 մլն 260 հազար դրամ գումար:

Քաջարանում ՔՊ ցուցակը գլխավորելու է Արմեն Առաքելյանը: Մամուլը գրել էր, որ նա նախկինների «տասովշչիկներից» է եղել, մականունը՝ «Զապ», որը ստացել է սովետի թվին հոր «Զապորոժեցը» վարելու պատճառով։ Հայրը եղել է ուսումնարանի, հացի գործարանի տնօրեն։ Հիմա բիզնես ունի՝ հյուրանոց Երեւանում։ Այսինքն` տվյալ դեպքում ՔՊ-ն աչք է փակել իր երկու կարևոր խոստման վրա՝ նախկինները չեն վերադառնալու, բայց արի ու տես վերադառնում են, բիզնեսն ու քաղաքականությունը տարանջատված են լինելու, բայց արի ու տես, որ այդպես չէ և հյուրանոցի տերը կարող է հանգիստ հավակնել համայնքի ղեկավար դառնալուն:

Եղեգիսում ՔՊ ցուցակը գլխավորելու է նախկին ՀՀԿ-ական Արթուր Ստեփանյանը: Վերջինիս էլ մեղադրում էին համայնքի բնակիչներին սուտ խոստումներ տալու, առանց հանրային լսումների ՀԷԿ-ի կառուցման թույլտվություններ բաշխելու մեջ:

Ստացվում է, որ ՔՊ-ն իր ցուցակներում վերարտադրում է ոչ միայն պարզապես նախկինների, այլ այնպիսի նախկինների, որոնք աչքի են ընկել իրենց օրինախախտ կեցվածքով կամ հայտնվել են այնպիսի պատմությունների կիզակետում, որոնցում հայտնված անձինք, ըստ հեղափոխության գաղափարների և բովանդակության, չպետք է տեղ գտնեին Նոր Հայաստանի պետական կառավարման համակարգում...