Ովքեր և որքան գումար են ստացել «Սորոսի» հիմնադրամից՝ նախորդ վեց ամիսների ընթացքում

Սորոսի Հայաստանյան հիմնադրամը, կամ այլ կերպ ասած՝ Բաց հասարակության հիմնադրամներ Հայաստանը հրապարակել է 2022 թվականի ընթացքում տրված դրամաշնորհների ցանկը: Եվ այսպես, ովքեր և որքան գումար են այս տավա վեց ամիսների ընթացքում ստացել Սորոսի հիմնադրամից:

10 հազար ԱՄՆ դոլարի դրամաշնորհ է տրվել «Դովեղ» ֆուտբոլային ակումբին: Նշվում է, որ հիմնադրամը կաջակցի «Դովեղ» ֆուտբոլային ակումբին, ՀԿ-ին ներդրումներ կատարել Տավուշի և Լոռու մարզերի շուրջ 80 երեխաների (տղաների և աղջիկների) սոցիալական ներառման, առողջ ֆիզիկական ապրելակերպի և թիմային հմտությունների զարգացման մեջ՝ ներգրավելով նրանց պրոֆեսիոնալ մարզիչների կողմից անցկացվող ֆուտբոլային դասընթացներում: «Դովեղ» ֆուտբոլային ակումբի հիմնադիրը Թաթուլ Հակոբյանն է, հասցեն Նոյեմբերյան խոշորացված համայնքի Դովեղ բնակավայրն է՝ Հայաստան-Ադրբեջան սահմանին: Ակումբի Կանոնադրության մեջ ասվում է. «Դովեղ» ֆուտբոլային ակումբի հիմնական նպատակն է Հայաստանում, մասնավորապես սահմանամերձ Տավուշի մարզում ֆուտբոլային թիմերի հիմնադրումը, օժանդակումը և պահպանումը, նրանց մասնակցության ապահովումը ֆուտբոլի միջազգային և Հայաստանի մրցումներին՝ սկսած մանկապատանեկանից մինչև մեծահասակների առաջնություններ, գավաթային և այլ խաղարկություններ։ Թաթուլ Հակոբյանը, ի դեպ, լրագրող է:

160 հազար դոլարի դրամաշնորհ է ստացել Դեմոլավ տեղեկատվական կենտրոնը: Ծրագրի նպատակն է աջակցել Factor.am լրատվամիջոցին` ապահովելու համապարփակ և վերլուծական լուսաբանում Հայաստանում քաղաքականության հիմնախնդիրների և քաղաքացիների կարիքների մասին` համոզվելով, որ ճգնաժամի ժամանակ այդ հարցերը չեն մղվում հանրային խոսակցության լուսանցք: Factor.am կայքի ղեկավարը Արևհատ Սահակյանն է, կայքն էլ հաճախ անվանում են սորոսական:

Գլոբալիզացիայի և տարածաշրջանային համագործակցության վերլուծական կենտրոնը Սորոսի հիմնադրամից ստացել է 39,760 հազար ԱՄՆ դոլարի դրամաշնորհ: Ծրագիրը նպատակ ունի ապահովել վիզաների դյուրացման և ռեադմիսիայի վերաբերյալ ԵՄ-Հայաստան համաձայնագրերի հաշվետու իրականացումը (ուժի մեջ են 2014թ. հունվարից) և բարելավել Հայաստանի քաղաքացիական հասարակության համագործակցությունը ԵՄ կառույցների հետ: Կենտրոնի ղեկավարը Ստեփան Գրիգորյանն է, նա հայտնի է իր ընդգծված արևմտյան կողմնորոշմամբ: 2018 թվականին համապետական ընտրություններին մասնակցում էր Սասնա Ծռերի նախընտրական ցուցակով:

Հանրային լրագրության ակումբ ՀԿ-ն ստացել է 52,500 ԱմՆ դոլար: ՀԿ-ի ղեկավարը Սեդա Մուրադյանն է: Դրամաշնորհը նպատակ ունի աջակցել Մեդիա կենտրոնի հարթակին՝ քննարկելու Հայաստանի կարևորագույն խնդիրները հարցազրույցների, ասուլիսների և այլ հանրային միջոցառումների միջոցով: ՀԿ-ն բավական ակտիվ կերպով քննադատում է և արձագանքում մամուլի դեմ ուղղված իշխանությունների ոտնձգություններին:

«Թրանսփերենսի ինթերնեյշնլ» հակակոռուպցիոն կենտրոնը ստացել է 40 հազար ԱՄՆ դոլարի դրամաշնորհ: Կենտրոնի գործադիր տնօրենը Սոնա Այվազյանն է: Ծրագիրը նպատակ ունի բացահայտել Կառավարության կողմից առաջարկվող գնումների բողոքարկումների վերանայման համակարգի ուժեղ և թույլ կողմերը: Ընդհանուր առմամբ, եթե դիտարկենք միայն այս նպատակը, ապա կարելի է ասել, որ 2022 թվականին դեռևս որևէ դիտարկումներ այս մասով կենտրոնը չի արել, չենք խոսում՝ բացահայտումների մասին:

«Առաջընթաց Գյումրի» քաղաքացիական հասարակության զարգացման կենտրոն (Progress Gyumri, Civil Society Development Center)-ը ստացել է 10.700.00 ԱՄՆ դոլարի դրամաշնորհ: Ծրագիրը նպատակ ունի մեծացնել «Գյումրու «Պրոգրես» քաղաքացիական հասարակության զարգացման կենտրոն ՀԿ-ի մեդիա հնարավորությունները, որպեսզի այն կարողանա լուծել Շիրակի մարզում առկա մարդու իրավունքների կարևորագույն խնդիրները, համակողմանի լուսաբանել տարածաշրջանի զարգացումները և ունենալ ավելի լայն տարածում:

Ինչպես տեսնում ենք՝ այս տարի բավական մեծ գումարներ են հատկացվել հայկական ՀԿ-ներին, սակայն ցանկի ամբողջական ուսումնասիրությունը թույլ է տալիս որոշակի եզրահանգնումներ անել, որ սորոսականների հետաքրքրության տիրույթը շարունակում է մնալ Գեղարքունիքը և Տավուշը, ինչը, իհարկե, զարմանալի չէ` հաշվի առնելով, թե ինչ աշխարհաքաղաքական շահեր են բախվում այս տարածաշրջանում...