Հեղափոխականները անցել են իրար «կոկորդ կրծելուն». թիրախը՝ ՔՊ վարչությունն է

Վերընտրվելու համար համառ պայքար է մղում պատգամավոր Արսեն Թորոսյանը, ում, սակայն, թիմի ներսում միանշանակ չեն ընդունում։ Ավելին` երբ ցանկություն էր հայտնել բարձր տեխնոլոգիաների եւ արդյունաբերության նախարար դառնալ, նրան վարչությունում կտրուկ «ոչ» էին ասել։ Թորոսյանը մարզերում վոյաժներ է սկսել` փորձելով այնտեղ ձայներ հավաքել և շահել տեղի ՔՊ-ականների սիրտը։

 

Հաջորդը Վիլեն Գաբրիելյանն է, ում հետ կապված վստահություն առկա չէ` հաշվի առնելով պաշտպանության նախկին նախարար Դավիթ Տոնոյանի ու նրա կապը:

 

Վերընտրվելու մեծ ցանկություն ունի նաև ՊՎԾ պետ Ռոմանոս Պետրոսյանը, սակայն, մամուլը բազմիցս էր գրել, որ իշխանական վերնախավում Պետրոսյանից դժգոհությունները աճում են և չի բացառվում, որ նա շուտով ընդհանրապես լքի ՊՎԾ պետի պաշտոնը։ Այնուամենայնիվ, նա չի հանձնվում և առնվազն Կոտայքում իր յուրայինների միջոցով փորձում է ձայներ հավաքել։ Բնականաբար, նրա մրցակիցը այստեղ Սասուն Միքայելյանն է, ով նույնպես առաջադրել է իր թեկնածությունը և այս առումով Կոտայքի ՔՊ ակտիվի ձայների համար լուրջ պայքար է սպասվում։

 

Համառ պայքար է նաև հավերժ մրցակիցներ Արփի Դավոյանի և Կարեն Համբարձումյանի միջև։ Վերջիններիս պայքարը այս օրերին արտահայտվում է Սիսիանում, որտեղ Արփի Դավոյանի օգնականը բացահայտ հակաքարոզչություն է տանում Կարեն Համբարձումյանի պրոտեժե համարվող համայնքապետի թեկնածու Արմեն Հակոբջանյանի դեմ։

 

Մարզային վոյաժների մեջ է նաև ուջանցի Գեւորգ Պապոյանը, նա վերջերս հանդիպել է կուսակցության Մարտունու տարածքային ակտիվի հետ՝ կազմակերպելու այնտեղի խորհրդի ընտրությունները և բնականաբար շահելու տեղի կուսակցական ակտիվի սիրտը։

 

Վարչության ընտրություններին ընդառաջ կուսակցական ակտիվը կատաղի պայքար է մղում խորհրդի կազմում հայտնվելու եւ տարածքային խորհուրդ ղեկավարելու համար։ Կապանում, ինչպես ավելի վաղ հայտնել ենք, ամեն ինչ անում են, որ Արայիկ Հարությունյանի սանիկ, նկարիչ, պատգամավոր Դավիթ Դանիելյանը դառնա նախագահ։ Անցած շաբաթ պետք է տեղի ունենար ընտրությունը, սակայն Դանիելյանի միջնորդությամբ հետաձգվել է, եւ եթե կրկին չհետաձգեն, ապա հուլիսի 4-5-ը կկայանա այն։ Որքան էլ տարօրինակ է, Դանիելյանի մրցակիցն իր հարազատ զարմիկն է՝ նախկին փոխմարզպետ Նարեկ Բաբայանը, ով եւս հավակնում է մարզային կառույցի ղեկավարի պաշտոնին։ Նրանք եղբոր եւ քրոջ որդիներ են՝ քեռորդի, հորաքրոջ որդի, սակայն Կապանի ընտրություններից հետո զարմիկների փոխհարաբերությունները լարվել են․ Դավիթ Դանիելյանն իր պարտության հարցում մեղադրում է նախընտրական շտաբը ղեկավարած Բաբայանին։

 

Վարչության կազմում, ըստ քվոտայի, երկու կին պետք է լինեն, ուստի տղամարդկանց պայքարից ոչ պակաս, իսկ տեղ-տեղ նաև ավելի անզիջում պայքար է ընթանում ՔՊ-ական կանանց շրջանում։ Մասնավորապես` Արփի Դավոյանը, ով ինչպես նշեցինք պայքարում է մեկ այլ պատգամավոր Կարեն Համբարձումյանի հետ, պայքարում է նաև ՔՊ-ական Լենա Նազարյանի և Նազելի Բաղդասարյանի հետ։ Բաղդասարյանը վերջերս ջանք չի խնայում շահելու Նիկոլ Փաշինյանի բարեհաճությունը. նա, կարծես թե, արշավ է սկսել Գյումրու քաղաքապետի դեմ` նպատակ ունենալով այստեղ կարգել ՔՊ-ական ղեկավարի, մյուս կողմից զոհված զինծառայողների հարազատների բողոքի ակցիան ՌԴ հյուպատոսության դիմաց, ըստ մամուլի, նույնպես ուղղորդվել է Բաղդասարյանի կողմից։ Արփի Դավոյանը թեև նման գործնական ակտիվությամբ աչքի չի ընկնում, սակայն նա ՔՊ-ական կանանցից ամենաակտիվն է քննադատում Փաշինյանի հակառակորդներին։ Միևնույն ժամանակ, ՔՊ նորաթուխ կին պատգամավորները` Լիլիթ Կիրակոսյանը, Արուսյակ Ջուլհակյանը, Արուսյակ Մանավազյանը նույնպես լուրջ ամբիցիաներ ունեն և այս առումով հին և նոր ՔՊ-ականների միջև լարված պայքար է սպասվում։

 

Սյունիքի ՔՊ-ական ակտիվի սիրտը շահելու գործում միմյանց դեմ պետք է պայքարեն պատգամավորներ Արմեն Խաչատրյանը և վերը նշված Կարեն Համբարձումյանը։ Երկուսն էլ մարզում լուրջ լծակների են տիրապետում և փորձելու են իրենց համար անհրաժեշտ ձայների քանակ ապահովել։

 

Ինչպես երևում է` բացահայտ խաղից դուրս են մնացել ՔՊ-ականներ Հայկ Ղալումյանը և Թագուհի Ղազարյանը, նրանք նույնիսկ չեն էլ առաջադրվել վարչության անդամի պաշտոնում, այլ բավարարվել են վերահսկող հանձնաժողովի անդամի թեկնածություն առաջադրելով։ Ըստ էության, թիմի ներսում նրանց հասկացրել են, որ ընտրվելու շանսեր չկան։ Ղալումյանների ընտանիքից էլ, ինչպես երևում է, նախապատվությունը տրվել է պատգամավոր եղբորը, ոչ թե մարզպետի պաշտոնը զբաղեցնողին։