Փաշինյանի «աչքկապոցին»՝ յուրայինների գերծախսերի և չարաշահումների վրա

Նմանատիպ վիճակ է գնումների համակարգում: Դիցուք՝ ՏՄՊՊՀ-ն 288,000 հազար դրամով համակարգչային ծառայություններ է գնել, 277,400-ով թվային տպագրության ծառայություններ, 6,737,700 դրամով էլ.էներգիայի բաշխման ծառայություն, 255,000 դրամի պատյաններ, 270,000 և 508,000 դրամի հսկողության համակարգեր, 438,600 դրամի փորձաքննության ծառայություններ, 715,000 դրամի ավտոմեքենաների վերանորոգման ծառայություններ, 250,000 դրամի ավտոմեքենաների լվացման ծառայություններ, 350,000 դրամի պատճենահանող սարքի վերանորոգման ծառայություն, 300,000 դրամի օդորակիչների վերանորոգման ծառայություններ, 450,000 համակարգչային սարքերի վերանորոգման ծառայություններ, 44,527,776 դրամի ոչ բնակելի անշարժ գույքի վարձակալություն. 1,950,000 դրամի փոստային ծառայություն:

 

ՀԾԿՀ-ն այս առումով հետ չի մնացել: Այս տարի կառույցը արդեն իսկ հասցրել է ավտոմեքենաների վերանորոգման ծառայություններ գնել մեկ անձից, այն էլ 223.333.3 հազար դրամով: Նախորդ տարի 224,898 դրամի գրենական պիտույքներ են գնվել` իհարկե առանց մրցույթի, 372,000 դրամի ավտոմեքենաների անիվներ, 239,040 դրամի առողջապահական նյութեր, 499,500 դրամի ավտոմեքենաների վերանորոգման ծառայություններ, 619,000 դրամի աթոռ, 228,000 դրամի փոշեկուլ, 818,650 դրամի տնտեսական ապրանք, 3,040,000 դրամի հեռախոսային ծառայություն:

 

Առողջապահության գծով պետպատվերի գումարների բաշխման թեման այնքան էր արծարծվել եւ այնքան շատ էր շոշափվել առողջապահության նախկին նախարար Արսեն Թորոսյանի կնոջ կազմակերպությանը՝ «ՄԻԲՍ» կենտրոնին հասանելիք պետպատվերն ավելացնելու թեման, որ Կենտրոնի տնօրեն Վարդանուշ Թեւանյանը՝ Արսեն Թորոսյանի կինը, գրություն էր ուղարկել առողջապահության նախարարություն՝ խնդրելով պետպատվերի գումարի վերաբաշխում կատարելիս «ՄԻԲՍ» ՍՊԸ-ին լրացուցիչ գումար չհատկացնել։ Փաստորեն, դա բավարար էր պատկան մարմինների աչքերը փակելու և ավելի խորքային ուսումնասիրությունները կանխելու համար։

 

ԶԼՄ-ները վերջերս տեղեկացրել էին, որ վարչապետի աշխատակազմի ղեկավարի տեղակալ Բագրատ Բադալյանի ընկերությունը պետական մարմիններից առանց մրցույթի խոշոր պատվերներ է ստանում։ Բնականաբար, այս տեղեկությունը անգամ չստուգվեց պատկան կառույցների կողմից։

 

Մամուլը շաբաթներ առաջ գրել էր, որ Վեդի խոշորացված համայնքի ղեկավար Գարիկ Սարգսյանն ընտրություններից մոտ մեկ ամիս առաջ բարեգործության օրեր է հայտարարել, վերջին մեկ շաբաթում նա գրեթե ամեն օր մոտ երկու տասնյակ որոշում է ստորագրել՝ համայնքի բնակիչներին դրամական օգնություն տրամադրելու մասին։ Այդ օգնությունները 10-50 հազար դրամի միջակայքում են: Բացի այդ, Սարգսյանը իր հայրենի Նոր Կյանքի ու հարևան Ոսկետափի անապահով ընտանիքներին 20-35 հազարական դրամ է տրամադրել։ Տարբեր հաշվարկներով` վերջին երկու շաբաթվա ընթացքում սոցիալական աջակցության անվան տակ 5-6 մլն դրամի փող է դուրս գրվել համայնքային բյուջեից։

 

Դեկտեմբերի ընտրություններում Մեծամորի համայնքապետ ընտրված ՔՊ-ական Վահրամ Խաչատրյանը որոշել է բյուջեի հաշվին շքեղ ծառայողական մեքենա ձեռք բերել։ Խոսքը` մոտ 32 մլն դրամ արժողությամբ Toyota Prado ամենագնացի մասին է։ Դրա համար մրցույթ է հայտարարվել, որտեղ այնպիսի պարամետրեր են նշել, որոնցով հնարավոր չէ ավելի էժան ու ցածր դասի մեքենա ձեռք բերել։ Օրինակ՝ շարժիչի հզորությունը պետք է լինի առնվազն 3,5 աշխատանքային ծավալով և ոչ պակաս 250 ձ/ուժ–ից, պետք է ունենա all wheel drive համակարգ, տարատեսակ այլ հաճելի մանրուքներ, իսկ վազքը պետք է լինի ոչ ավելի, քան 60 հազար կմ։

 

Իջևանի նորընտիր համայնքապետ Արթուր Ճաղարյանը համայնքային միջոցների հաշվին թանկ ավտոմեքենա է գնել։ Մամուլի տեղեկություններով` նա դեռևս համայնքապետի պաշտոնակատար եղած ժամանակ՝ 2021 թվականին է ձեռք բերել «Տոյոտա Պռադո» մակնիշի ծառայողական ավտոմեքենա, այն դեպքում, երբ համայնքապետարանն ունեցել է մեկ այլ՝ մի քիչ ավելի ցածր դասի «Տոյոտա»։

 

Ամիսներ առաջ դատախազությունն ուսումնասիրել է եւ պարզել, որ 2020 թվականից հետո մանկատան նախկին սաներին պետական ծրագրով բնակարան ապահովելու ընթացքում եղել են չարաշահումներ։ Քեական գործ է հարուցվել «Պաշտոնեական անփութություն» հոդվածով (ՀՀ քրեական օրենսգրքի 315- րդ հոդվածի 1-ին մաս)։ Նշված խախտումների համար նախարարության ստորաբաժանումներից պատասխանատու է սոցիալական աջակցության վարչությունը, եւ այս մասին դատախազությունը հատուկ նշել է իր տարածած նյութում։ Հավանաբար, միտումն այն է, որ կարդացողը հանկարծ չկարծի, թե չարաշահումների պատասխանատուն այն ժամանակվա նախարար, այժմ նիկոլական պատգամավոր Զարուհի Բաթոյանն է, մինչդեռ հենց նրա ղեկավարած կառույցում և նրա քթի տակ էին տեղի ունենում այդ աղաղակող ապօրինությունները։

 

Ահա այս բոլոր դեպքերը վկայում են այն մասին, որ Նիկոլ Փաշինյանը կամ տեղյակ չէ, որ իր ենթակաների աշխատանքը բազմաթիվ հարցեր է առաջացնում, կամ էլ կանխամտածված կերպով մոլորության է մատնում ՀՀ քաղաքացիներին....