ԱՄՆ Կոնգրեսը պատրաստ է Ռուսաստանին ճանաչել՝ որպես ահաբեկչության հովանավոր․ Gazeta

«Եթե ​​ԱՄՆ Պետդեպարտամենտը Ռուսաստանին չճանաչի` որպես ահաբեկչության հովանավոր, ապա Կոնգրեսը դա կանի»,֊այս մասին պետքարտուղար Էնթոնի Բլինքենին ասել է Ներկայացուցիչների պալատի խոսնակ Նենսի Փելոսին, ֊գրում են լրատվամիջոցները։ Աղբյուրներից մեկը հայտնել է, որ Սպիտակ տունն այդպիսով «քաղաքական ծածկույթ» կստանա տնտեսական ճնշման սրման և «հակապուտինյան հռետորաբանության» համար։ Այժմ Վաշինգտոնը ճանաչում է Սիրիան, Իրանը, Հյուսիսային Կորեան և Կուբան՝ որպես ահաբեկչության հովանավորող պետություններ։ 
Ներկայացուցիչների պալատի խոսնակ Նենսի Փելոսին պետքարտուղար Էնթոնի Բլինքենին ասել է, որ ԱՄՆ Կոնգրեսը կճանաչի Ռուսաստանը` որպես ահաբեկչության հովանավոր, եթե Պետդեպարտամենտը հրաժարվի դա անել: Այս մասին հայտնում է Politico թերթը՝ վկայակոչելով Վաշինգտոնի աղբյուրները։

«Կոնգրեսի ընդունումն ակնհայտորեն ավելի բարդ ճանապարհ է, քան քարտուղարի որոշումը, բայց այն վարչակազմին կտա քաղաքական ծածկույթ, որն անհրաժեշտ է տնտեսական ճնշումը և հակապուտինյան հռետորաբանությունը ուժեղացնելու համար», - լրագրողներին ասել է Կոնգրեսի աղբյուրը: Նա հավելել է, որ չկան իրավական հիմքեր, որոնք թույլ չեն տալիս կոնգրեսականներին նման որոշում կայացնել։

Երկրի ընդգրկումը ահաբեկչությունը հովանավորող պետությունների ցուցակում ենթադրում է խիստ սահմանափակումներ նրա հետ փոխգործակցության համար։ Արգելվում է պաշտպանական նշանակության ապրանքների արտահանումը, խստացվում է երկակի նշանակության արտադրանքի արտահանման վերահսկողությունը, կիրառվում են ֆինանսական արգելքներ և այլ պատժամիջոցներ։ Տուգանքներ կարող են սահմանվել նաև երրորդ երկրների նկատմամբ, որոնք առևտուր են անում ահաբեկչությունը հովանավորող պետության հետ։ ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ Մոսկվան Վաշինգտոնի հայտարարությունները համարում է «քարոզչական քայլ»։

«Բոլոր այն միջոցները, որ ձեռնարկելու են, նույնիսկ նման ապուշ բնույթի, կմշակվեն ու կշարունակվեն։ Մենք, իհարկե, ոչինչ անպատասխան չենք թողնում, և նրանք պետք է դա հասկանան»,- ասել է դիվանագետը։

Զախարովան նշել է, որ մինչ այժմ միջազգային հանրությունը իրավական դաշտում գլոբալ հարց չի բարձրացրել Սիրիայում, Լիբիայում, Իրաքում և այլ երկրներում ԱՄՆ գործողությունների վերաբերյալ։ Նրա խոսքով՝ Ռուսաստանի դեմ ոչ բարեկամական միջոցներ ձեռնարկելու ԱՄՆ-ի փորձերը՝ «ուկրաինացիների դեմ կատարված հանցագործությունների պատճառով», կարող են «վերադարձվել» Վաշինգտոնին։

«Որքան ԱՄՆ-ն այժմ այս թեման արթնացնում է միջազգային հանրության գիտակցության մեջ, այնքան միջազգային հանրությունը հիշում է Միացյալ Նահանգների հանցագործությունները»,- ասել է Զախարովան։