Շիրակի մարզպետի եղբայրը «յուղ է լցնում» կրակի մեջ. ի՞նչ է կատարվում Գյումրիում

Շիրակի մարզպետ Նազելի Բաղդասարյանը՝ Արման Բաղդասարյանը, որը ՔՊ-ով Գյումրու ավագանու անդամ է դարձել, սակայն դուրս է եկել ՔՊ-ից, հերթական անգամ ի ցույց է դրել իր տարաձայնությունները Գյումրու փոխքաղաքապետ Դավիթ Առուշանյանի հետ։  Մարզպետի եղբայրը հիմա էլ իր ֆեյսբուքյան էջում ինչ-որ ակնարկներով գրառում է կատարել՝ վերջում նշելով Դավիթ Առուշանյանին ու պահանջելով նրա հրաժարականը։ 

Գյումրու ավագանու ընտրություններից հետո, երբ «Քաղաքացիական պայմանագիր» կուսակցությանը հաջողվել էր Սամվել Բալասանյանին տառացիորեն շանտաժի ենթարկելով ստանալ Գյումրու համատեղ կառավարումը, խոսվում էր այն մասին, որ փոխքաղաքապետերից մեկը կլինի Սուրեն Պապիկյանի եղբայրը՝ Արթուր Պապիկյանը, իսկ մյուսը՝ «Անիտուր» տուրիստական գործակալության հիմնադրի ու սեփականատիրոջ որդին՝ Դավիթ Առուշանյանը, ինչը, իհարկե, իրականություն դարձավ:

Փոխքաղաքապետերի հավանական թեկնածուների ցանկում էր նաև Արման Բաղդասարյանը, սակայն վերջնական արդյունքները նրա օգտին չէին: Ինչն էլ, կարծես, ստիպել է Բաղդասարյանին դուրս գալ երբեմնի թիմակիցների դեմ: Ամիսներ առաջ էլ Արման Բաղդասարյանը փաստացի տարրական անգրագետ էր համարում ոչ ավել, ոչ պակաս, Նիկոլ Փաշինյանի մերձավորագույն շրջապատի ներկայացուցիչ, պաշտպանության նախարար Սուրեն Պապիկյանի հորեղբոր թոռանը՝ Արթուր Պապիկյանին: Այժմ էլ հերթը հասել է մյուս փոխքաղաքապետին: 

Ինչպես երևում է` մարզպետ Նազելի Բաղդասարյանն առանձնապես դեմ չէ իր եղբոր նման պոռթկումներին՝ իր իսկ թիմակիցների դեմ, մնում է հասկանալ, թե ինչ հեռահար ծրագրեր ունի մարզպետը և ինչով է պայմանավորված նրա լռությունը ստեղծված իրավիճակում..