Փաշինյանը Վլադիվոստոկ էր մեկնել Ռուսաստանին և անձամբ Պուտինին սիրաշահելու համար․ Արա Պապյան

Վլադիվոստոկի Արևելյան տնտեսական ֆորումի ժամանակ ՀՀ վարչապետ Նիկոլ Փաշինյանը հույս հայտնեց, որ Ռուսաստանը կաջակցի հայ-թուրքական հարաբերությունների բարելավման գործընթացին, բացի այդ, վարչապետն, ըստ էության, խոստովանեց, որ հենց ՌԴ ջանքերով է կանգնեցվել Արցախյան 44-օրյա պատերազմը։ Ի թիվս Մոսկվային ուղղված գովեստի խոսքերի, Փաշինյանը նաև ընդգծեց, որ Հայաստանի ամենամոտ դաշնակիցը Ռուսաստանն է։

«Փաշինյանի ելույթի նպատակը Ռուսաստանին և անձամբ նախագահ Վլադիմիր Պուտինին սիրաշահելն էր։ Նրա արած հայտարարությունները կամ ճիշտ չեն կամ ճիշտ են մասամբ։ Այն, որ Ռուսաստանն է կանցնեցրել պատերազմը, ճշմարտություն է, բայց դա ճշմարտության մի մասն է, եթե քննելու լինենք, ինչու սկսվեց պատերազմը, ինչ հիմքեր կային դրա համար, ով էր երաշխավորել, որ գնված զենքերը պետք է օգտագործվեն և այլն»,-ԼՈՒՐԵՐ․com-ի հետ զրույցում ասաց «Մոդուս Վիվենդի» կենտրոնի ղեկավար, Ազգային Ժողովրդավարական Բևեռի խորհրդի անդամ Արա Պապյանը։

Քաղաքական գործչի պնդմամբ, վիճելի է նաև Փաշինյանի այն պնդումը, որ ռուս խաղաղապահների առաքելյությունն անթերի է․ որպես խնդրահարույց դիպվածներ՝ մեր զրուցակիցը մատնանշեց զինադադարից հետո ադրբեջանական կողմի պարբերական սադրանքները, հայկական տարածքների, նույնիսկ գյուղերի՝ գրավման փաստերը։

«Կարծում եմ, Նիկոլ Փաշինյանը Վլադիվոստոկ  էր մեկնել զուտ թիվ ապահովելու համար, այսպես ասած՝ ներկայացուցչական կողմը պահպանելու համար»,-նշեց Պապյանը։

Հարցին, թե քաղաքական աշնան համար ի՞նչ օրակարգ է առաջադրելու ԱԺԲ-ն, քաղաքական գործիչը նշեց հետևյալը․

«Իրականությունն այն է, որ ՀՀ ներքաղաքական պրոցեսները պայմանավորված են իրանա-ամերիկյան և ռուս-ուկրաինական հակամարտության հետագա զարգացումներով։ Քանի դեռ այս համատեքստում հստակություն չկա, մենք առայժմ քաղաքական պայքարի ակտիվ փուլ չենք մտնում»։


Արա Ալոյան