Պուտինի ռազմավարությունը Եվրոպային կստիպի թուլացնել պատժամիջոցները. Politico

ՌԴ նախագահ Վլադիմիր Պուտինի հաջող քաղաքականությունը Եվրամիությանը հասկացրեց, որ Արևմուտքը վաղ թե ուշ ստիպված է լինելու թուլացնել հակառուսական պատժամիջոցները։ Նման կարծիք է հայտնել Politico-ի ամերիկյան խմբագրության սյունակագիր Մեթյու Կարնիչնիգը։

Նրա խոսքով՝ «սպասվող փոթորիկը» թույլ տվեց եվրոպացի քաղաքական գործիչներին տեսնել «դառը ճշմարտությունը». մինչ Ռուսաստանը և Ուկրաինան պայքարում են, Մոսկվան պահպանում է իր դիրքերը Եվրոպայի դեմ պայքարում։

«Ժամանակը, ինչպես նաև եղանակը, Մոսկվայի կողմն է։ Քանի որ ջերմաստիճանը կնվազի առաջիկա շաբաթների և ամիսների ընթացքում, և ձմեռը մոտենում է, եվրոպացիները կսկսեն զգալ բնական գազի գների բարձրացման բեռը», - գրում է Կարնիչնիգը:

Լրագրողը նշում է, որ Գերմանիայի, Ֆրանսիայի, Մեծ Բրիտանիայի և Լեհաստանի բնակիչները ստեղծված իրավիճակում ավելի շատ անհանգստացած են իրենց կյանքի արժողությամբ, քան նրանով, թե ինչ է կատարվում Ուկրաինայում։

Նրա կարծիքով, այժմ Ֆրանսիայում քաղաքացիների 40 տոկոսը կողմ կլինի «դեղին բաճկոններ» շարժման վերադարձին՝ բողոքի ցույցերի, որոնք սկսվել են 2018 թվականին՝ «տնտեսական արդարության» հասնելու նպատակով։