Ինչո՞ւ Փաշինյանն այդպես էլ չգտավ բանակից 20 տարի «սերմնացու գողացող մկներին»

Աժ-ում կառավարության ծրագրի կատարողականը ներկայացնող Նիկոլ Փաշինյանն այսօր կրկին հիշատակել է նախկին իշխանությունների կողմից տարիներ շարունակ բանակը թալանելու հանգամանքը:

Սա, իհարկե, առաջին դեպքը չէ, բանակում թալանի մասին Փաշինյանը խոսել է թե՛ ընդդիմադիր պատգամավոր եղած ժամանակ, թե՛ վերջին չորս տարիների ընթացքում՝ զբաղեցնելով վարչապետի պաշտոնը: Հիշեցնենք Փաշինյանի մեղադրանքների մի քանի դրվագներ:

Նիկոլ Փաշինյանի այս հայտարարություններից տպավորություն է ստեղծվում, որ նրա ձեռքի տակ կան 20-30 տարի շարունակ ՀՀ ԶՈՒ-ն թալանելու անժխտելի փաստեր, այդ դեպքում հարց է առաջանում՝ իսկ ի՞նչն է խանգարել վերջին չորս տարիների ընթացքում գտնել և պատժել ՀՀ բանակը թալանողներին: 

Ապրիլի 19-ին, երբ Սերժ Սարգսյանը դեռ հրաժարական չէր տվել, Փաշինյանը անդրադառնում էր զինվորների հագուստի, կենցաղի հարցերին: Երբ պաշտպանության այն ժամանակվա նախարար Վիգեն Սարգսյանը հայտարարեց, թե հանրահավաքները կարող են ազդել բանակի մարտունակության վրա, հեղափոխության առաջնորդ Նիկոլ Փաշինյանը պատասխանեց նրան. «Թող Վիգեն Սարգսյանը զինվորների համար մայկա-տրուսիկ առնի: ՀՀ բանակի զինվորները անմայկա և անտրուսիկ են, ահա թե ինչն է սպառնում բանակի մարտունակությանը»: Իշխանափոխությունից հետո նոր պաշտպանության նախարար Դավիթ Տոնոյանը զեկուցեց հանրությանը, որ մայկա-տրուսիկի հարցը լուծված է, նոր ներքնաշորեր են գնել բանակի համար: Այն ժամանակ, հեղափոխության առաջին ամսում թվում էր, թե իրավիճակը բանակում շատ արագ կարգի են բերելու, զինվորների մայկա-տրուսիկի հարցից հետո այլ թեմաների կանցնեն, օրինակ՝ կպարզեն, թե ովքեր են 20 տարի շարունակ բանակը թալանող և սերմացու գողացող մկները: Չպարզեցին:

«2018-ից հսկայական միջոցներ ենք ծախսել բանակի վրա, այսօր պարզվում է, որ նույնիսկ այդ տված միջոցները միշտ չէ, որ գնացել, հասել են այնտեղ, որտեղ պետք է հասնեին: Իսկ ինչո՞ւ սա պետք է ներենք ինչ-որ մեկին, ինչ «պագոն» ուզում է՝ լինի ուսին, ինչ մեդալ՝ դոշին. չկա ներում այդ մարդկանց»,- սեպտեմբերի 8-ին՝ Վլադիվոստոկում հայ համայնքի հետ հանդիպման ժամանակ նմանատիպ հայտարարություն է արել ՀՀ վարչապետ Նիկոլ Փաշինյանը: Փաշինյանի այս հայտարարությունն ասես 2018-ի օգոստոսի 18-ին «թալանը կոպեկ առ կոպեկ հետ ենք բերելու» սերիալի երկրորդ սերիան լինի, որտեղ սերիալի բոլոր չար կերպարները հերթով, կարգով, շարքով պատասխան են տալու: Հայաստանի դեպքում, սակայն, պատասխանատվության ժամն այդպես էլ չի գալիս:

Ինչո՞ւ այս ընթացքում մեղադրանք չներկայացվեց գոնե մեկ նախկին բարձրաստիճան պաշտոնյայի: Բանակում «թալանի» և կոռուպցիայի միակ աղմկահարույց դրվագը վերաբերվում է հենց Փաշինյանի ղեկավարման տարիներին և նրա կողմից նշանակած ՊՆ նախարարին՝ Դավիթ Տոնոյանին, ով անցնում է այսպես կոչված` անորակ հրթիռների գործով: Ո՞ւր են այն թալանված միլիարդները, որոնց մասին խոսում էր ընդդիմադիր և վարչապետ Նիկոլ Փաշինյանը: Դժվար է պատկերացնել, որ ՀՀ իշխանությունները չորս տարի շարունակ բանակում «թալան» իրականացրած գեթ մեկ պաշտոնյայի չեն գտել, իսկ եթե չեն գտել, ապա ի՞նչ հիմքով է երկրի վարչապետը շարունակում հանրապետության թիվ մեկ ամբիոնից կրկնել «բանակից գողացված միլիարդների» մասին իր մանտրան...