ԱԺ-ն քննարկեց ցեմենտի ներկրման տուրքը նվազեցնելու նախագիծը

 ՀՀ ազգային ժողով առաջին ընթերցմամբ քննարկեց «Քաղաքացիական պայմանագիր» խմբակցության պատգամավորների օրենսդրական նախաձեռնությունը, որով առաջարկվում է ցեմենտի ներկրման համար 14 հազար դրամ տուրքը նվազեցնել՝ դարձնելով 9 հազար դրամ, իսկ կլինկերի ներկրման տուրքը հանել: «Պետական տուրքի մասին» Հայաստանի Հանրապետության օրենքում փոփոխություն կատարելու մասին օրենքի նախագիծն ԱԺ ն նիստում ներկայացրեց համահեղինակ Բաբկեն Թունյանը:

«Առաջարկվում է Հայաստան ներկրվող ցեմենտի համար այսօր կիրառվող 14 հազար դրամ տուրքը նվազեցնել և սահմանել 9 հազար դրամ, իսկ ցեմենտի հումքի՝ կլինկերի համար կիրառվող 2 հազար դրամ տուրքն ընդհանրապես հանել»,-ասաց Թունյանը:

Պատգամավորը հիշեցրեց, որ 2019-ին իրանական էժան ցեմենտը սկսել է մեծ թափով մտնել հայկական շուկա, արդյունքում տեղական արտադրողները, պարզապես չդիմանալով մրցակցությանը, հայտնվել էին սննկացման վտանգի առաջ: Եվ հենց այդ ժամանակ էլ որոշվեց կիրառել տուրք՝ պաշտպանելու տեղական արտադրողներին, այսինքն՝ Հայաստան ներկրվող ցեմենտի գինը արհեստականորեն բարձրացվեց 14 հազար դրամով:

Ըստ Թունյանի՝ արդյունքում հայկական շուկայում ցեմենտի արտադրության ծավալները շեշտակի աճել են: Այս տարվա միայն առաջին 7 ամիսներին արտադրվել է ավելի քան 520 հազար տոննա ցեմենտ, ինչն ավելին է, քան օրինակ 5-6 տարի առաջ տարեկան կտրվածքով արտադրվածը: Շուկայում գերակշիռ մասը տեղական արտադրողների բաժինն է:

«Այսօր ունենք մի իրավիճակ, երբ այդ ելակետային պայմանները փոխվել են: Իրանական ցեմենտի գինը սահմանի վրա էապես թանկացել է, տրանսպորտային ծախսերն էապես թանկացել են: Եվ, եթե սրան զուգահեռ ուժի մեջ ենք թողնում 14 հազար դրամ տուրքը, ապա ներմուծումը արհեստականորեն արգելափակվում է, շուկայում տեղի է ունենում գերկենտրոնացում, ցեմենտի դեֆիցիտ, գների աճ: Եվ վերջին շրջանում կառուցապատողներն այդ թեմայով շատ են իրենց դժգոհությունն արտահայտում»,-ասաց Թունյանը:

Ըստ պատգամավորի՝ եթե այս պայմաններում որևէ քայլ չձեռնարկեն, կնշանակի, որ արհեստականորեն թանկացնում են շինարարությունը: Այսպիսով՝ պետությունը խնդիր ունի շուկայում վերականգնել մրցակցային վիճակը:

Անդրադառնալով ցեմենտի գնին՝ Թունյանն ասաց, որ վերջին 1 տարվա ընթացքում 25-տոկոսանոց թանկացում կա: «Սա գործարանային գինն է: Իսկ 2020 թվականի սկզբի համեմատ մոտ 43 տոկոսով է թանկացել ցեմենտի գինը»,-ասաց նա: