Հունաստանը հայտարարել է, որ Թուրքիան օրվա ընթացքում 52 անգամ ներխուժել է իր օդային տարածք

Սեպտեմբերի 12-ին Թուրքիայի ռազմաօդային ուժերը 52 անգամ խախտել են Հունաստանի օդային տարածքը, որն ամեն անգամ բարձրացրել է իր ինքնաթիռները՝ կալանելու համար։ Այս մասին հայտարարել է Հունաստանի ազգային պաշտպանության նախարարությունը, փոխանցում է ՏԱՍՍ-ը։

«Թուրքիայի ռազմաօդային ուժերն այսօր 52 անգամ ներխուժել են երկրի օդային տարածք։ Էգեյան ծովի հյուսիսարևելյան և հարավարևելյան շրջանների օդային սահմանի խախտումներին մասնակցել է չորս ինքնաթիռ և անօդաչու թռչող սարք»,- ասվում է հաղորդագրության մեջ։։

Խոսքը երկու թուրքական զինված F-16 կործանիչների եւ երկու CASA CN-235 ռազմատրանսպորտային ինքնաթիռների մասին է։ Հունաստանի պաշտպանության նախարարությունը նշել է, որ իրենք որսացել են թուրքական բոլոր ինքնաթիռները։

Թուրքիան և Հունաստանը ՆԱՏՕ-ի անդամներ են, սակայն երկար տարիներ լարված հարաբերություններ ունեն։