Ռուսաստանից աջակցություն ստանալ չենք կարող. ռազմական փորձագետ

«Այս ամենը սպասելի էր»,-ԼՈՒՐԵՐ.com-ի հետ զրույցում, անդրադառնալով Ադրբեջանի զինված ուժերի հարձակմանը ՀՀ սուվերեն տարածքի վրա, ասաց ռազմական փորձագետ Կարեն Վրթանեսյանը:

«Բազմիցս գրել եմ առաջինը այն պատճառով, որ Հայաստանի իշխանությունը զավթած խումբը, ըստ էության, չի զբաղվել Հայաստանի զինված ուժերի վերականգնմամբ 44-օրյայում պարտությունից հետո, չի զբաղվել պատշաճ ծավալով վերազինմամբ, փոխարենը զբաղվել է  բանակի կազմաքանդմամբ, դուրս է բերել հայկական զորքի ծանր սպառազինությունը Արցախից, հետապնդումների է ենթարկել սպայակազմը: Այն, որ 5 ամիս գլխավոր շտաբի պետ մենք չունեինք, ու եթե չեմ սխալվում, առայսօր էլ չունենք հետախուզության պետ: Դա օրինակներից մեկն է, թե ինչպես են քանդվել և ինչպես են շարունակում քանդվել զինված ուժերը»,- նշեց Վրթանեսյանը:

Հարցին արդյոք ՌԴ-ից, ՀԱՊԿ-ից, ՄԱԿ անվտանգության խորհրդից Հայաստանին կտրամադրվի որևէ օգնություն, Վրթանեսյանն ասաց.

«Մենք չգիտենք իրենք, իրոք, դիմել են թե ոչ, իրենց ձևակերպումներով գրված է՝ որոշվում է, որ դիմելու են, դիմելը որպես փաստ նշված չի: Եվ հետո եկեք հաշվի առնենք այն, որ ամբողջ աշխարհը հիմա զբաղված է Ուկրաինայով, և Արևմուտքի և Ռուսաստանի համար այսօր առաջնահերթությունը տրվում է Ուկրաինային»:

Վրթանեսյանը կարծիք հայտնեց, որ տեսականորեն կարող ենք Ռուսաստանից աջակցություն ունենալ, գործնականում՝ ոչ, շեշտելով Ռուսաստանի իրավիճակը Ուկրաինայում:

Վրթանեսյանը նշեց, որ չգիտի այսօրվա միջադեպը կապ ունի Բրյուսելում օրեր առաջ տեղի ունեցած հայտարարության հետ, փոխարենը այսօրվա լարված վիճակը կապեց Ուկրաինայում տեղի ունեցող իրավիճակի հետ, ընդգծելով, որ Ադրբեջանը փորձում է օգտվել առիթից:

«Ադրբեջանին այդպիսի հնարավորություն, որ կարողանա օգտվել առիթից, ըստ էության, տվել է Նիկոլ Փաշինյանի խմբակը, որովհետև այն ժամանակ, երբ պետք էր վերականգնել զինված ուժերը, Նիկոլ Փաշինյանը զբաղված էր բանակը կազմաքանդելով: Մենք նոյեմբերի 10-ից այդ մասին ահազանգում ենք, որ այն, ինչ անում են, բերելու է այսպիսի աղետի»:

Այսօր ԱԺ ամբիոնից Նիկոլ Փաշինյանը ասաց, որ Ադրբեջանը պահանջում է ՀՀ-ից ճանաչել Արցախը Ադրբեջանի կազմում: Դիտարկմանը, թե ներկայիս վիճակը կարող է արդյոք ճգնաժամ առաջացնել և Նիկոլ Փաշինյանը ճանաչի Արցախը Ադրբեջանի մաս, Վրթանեսյանն ասաց, որ Նիկոլ Փաշինյանին չնայած այդպիսի մանդատ տրված չի, այնուամենայնիվ նա առանց նման մանդատի լիքը այլ գործողություններ է իրականացրել:

«Երբ Նիկոլ Փաշինյանը հայտարարում էր, որ Գորիս- Կապան ճանապարհի այն հատվածը, որ նվիրեցին Ադրբեջանին, ադրբեջանական տարածք է, արդյոք ունե՞ր նման մանդատ: Չուներ: Հակառակը որպես ՀՀ իշխանություն պարտավոր էր մինչև վերջ պաշտպանել հայկական շահը, բայց ինքը ԱԺ-ի ամբիոնից հայտարարեց, որ դա ադրբեջանական  տարածք է: Ըստ այդմ՝ ես  միշտ շեշտում եմ, որ այն քաղաքականությունը, որը վարում է Նիկոլ Փաշինյանը, վկայում է այն մասին, որ, ըստ էության, նա ոչ թե հայկական շահն է ներկայացնում, այլ օկուպացիոն ռեժիմ է՝ Ադրբեջանի ու Թուրքիայի շահը սպասարկող»,-ասաց Վրթանեսյանը:

Կա իրավիճակից դուրս գալու լավագույն  եղանակ արդյոք, Վրթանեսյանի կարծիքով լուծում չի կարող լինել առանց Փաշինյանի հրաժարականի.

«Իր ամբողջ քարոզչամեքենան աշխատում է իր վրայից էս վերջին իրադարձությունների մեղքը հանելու: Չնայած մենք՝ փորձագետներս, բազմիցս ենք նշել, որ այդ, այսպես կոչված, խաղաղության օրակարգը, որով Նիկոլ Փաշինյանը վերընտրվեց իշխանության, կեղծ օրակարգ է, որ դա բերելու է պատերազմի, ինքը համառորեն իրանն առաջ էր տանում՝ ձևացնելով թե չի հասկանում՝ ինչ է անում: Նրա նպատակը ամեն գնով իշխանության մնալն է, ես չեմ հավատում, որ նա հրաժարական կտա»:

Թե ինչ է ուզում Ադրբեջանը ՀՀ-ից, Վրթանեսյանը ասաց.

«Ադրբեջան ընդհանրապես ուզում է, որ Հայաստանի սուվերեն տարածքը գոյություն չունենա, ու ցանկալի է, որ այդտեղ ընդհանրապես հայեր չլինեն: Դա Ադրբեջանի և Թուրքիայի հին երազանքն է: Եվ նրանք ամեն ինչ անելու են, որ այդպես լինի՝ խաբելով, ինչ-որ բաներ խոստանալով, ասելով, որ եթե էս ինչը հանձնեք, այլևս խաղաղություն կլինի: Իրականությունը այնն  է, որ անընդհատ մեզ դուրս են մղելու՝ չխորշելով նույնիսկ ցեղասպան գործողություններից»: