Ինչպե՞ս է կազմակերպվում բռնի տեղահանված երեխաների դասապրոցեսը Վարդենիսում՝ Ադրբեջանի վերջին սադրանքից հետո․ պարզաբանում

Ադրբեջանի վերջին սադրանքը, ի թիվս Բաքվի թիրախավորած մյուս հայկական բնակավայրերի, վտանգեց նաև Վարդենիսի տարածաշրջանում ապրող խաղաղ բնակչության, այդ թվում՝ երեխաների կյանքը։ Բացի այդ, ուսումնական տարեսկզբին բազմաթիվ աշակերտներ զրկվեցին բնականոն կրթություն ստանալու հնարավորությունից՝ ենթարկվելով բռնի տեղահանության։ 

Մեր այն հարցին, թե ի՞նչ իրավիճակ է այժմ Վարդենիսում, արդյո՞ք սահմանամերձ գյուղերից (Սոթք, Կութ, Նորաբակ) տարհանված աշակերտների և նախակրթարանների սովորողների ժամանակավոր վերաբաշխում եղել է Վարդենիսի շրջանի համեմատաբար անվտանգ կրթօջախներ, Վարդենիսի համայնքապետարանի մամուլի խոսնակ Էդգար Պետրոսյանը ԼՈՒՐԵՐ․com-ին ասաց հետևյալը․

«Ադրբեջանական վերջին ագրեսիայից հետո մեծ ուշադրություն է դարձվում սահմանամերձ գյուղերից բռնի տեղահանված աշակերտների և մանկապարտեզի սաների կրթական գործընթացի հետագա ապահովման խնդրին։ Համայնքապետի հրամանով՝ այս պահին արձակուրդ է տրամադրվել մանկապարտեզներին»։

Նրա խոսքով, ադրբեջանական վերջին հարձակումներից տուժած համայնքների դպրոցահասակ երեխաների մեծ մասը տեղավորվել է Վարդենիս քաղաքի հանրակրթական դպրոցներում, որոշ մասն էլ, ըստ կենցաղային ու այլ նպատակահարմարությունների, հաճախելու են հարակից գյուղերի կրթական հաստատություններ։

Պետրոսյանը դժվարացավ կոնկրետ թիվ մատնանշել, թե սահմանային լարվածության հետևանքով որքան երեխա է տարհանվել և տեղավորվել Վարդենիս քաղաքի և այլ գյուղերի կրթական հաստատություններ։


Արա Ալոյան