Առաջիկայում բնակչության տարհանում չի նախատեսվում. ԱԻՆ-ի պարզաբանումը այսօր իրականացված ուսումնական վարժանքների մասին

«Պարբերաբար տարբեր վարչական շրջաններում, համայնքներում շչակներ են գործարկվում, դրանք պրոֆիլակտիկ աշխատանքներ են: Մեր փրկարարական ծառայությունները տարվա կտրվածքով՝ թե մարզերում, թե քաղաքներում, տարբեր հաստատություններում, իրականացնում է երկրաշարժի, տարհանման, օդային տագնապի, տարբեր թեմատիկաներով ուսումնական վարժանքներ, և սա դրանցից մեկն է ընդամենը»,- ԼՈՒՐԵՐ.com-ի հետ զրույցում ասաց ԱԻՆ մամուլի խոսնակ Հայկ Կոստանյանը՝ մեկնաբանելով այսօր ուսումնական մի քանի հաստատություններում կազմակերպված ուսումնական վարժանքները:

Կոստանյանի խոսքով՝ սա չի ենթադրում, թե առաջիկայում բնակչության տարհանում կիրականացվի:

«Մենք փորձում ենք միանգամից մի քանի վարժանքներ իրականացնել, որ հասկանանք բնակչությունը ինչպիսի պատրաստավծություն, գիտելիքներ ունի այդ բոլոր առումներով»-,ասաց նա:

Անդրադառնալով Ջերմուկում երեկ բռնկված հրդեհին Կոստանյանը նշեց, որ այս պահին հրդեհը ամբողջությամբ մարված չէ:

«Այն հատվածում, որտեղ մենք հրդեհաշիջում ենք իրականացրել, այդ հատվածում ամբողջությամբ մարված է: 3-4 կրակի օջախ կար, 2-ը ինքնամարվել է, այս պահին 2 օջախ կա, որտեղ հրդեհ կա: Սա դիտարկվող տարածք է, այդ հատվածում չենք կարող հրդեհամարման աշխատանքներ իրականացնել»,-նշեց Կոստանյանը:

 Կոստանյանի հավաստմամբ՝ հրդեհի տարածման վտանգ չկա.

«Մենք հերթափոխություն ենք իրականացնում, որպեսզի հրդեհի տարածման վտանգ չլինի»:

Կոստանյանի խոսքով՝ ԱԻՆ-ը Սուրմալուի պայթյունից հետո հիմա էլ տեխնիկապես հագեցած է.

«Թե Սուրմալուի դեպքում, թե հիմա պատրաստ ենք ցանկացած տեսակի հրդեհաշիջման աշխատանքներ իրականացնել»: