«Այլևս ոչ մի հայի արյուն՝ հանուն նավթի». «The Promise» ֆիլմի պրոդյուսեր Էրիկ Էսրայելյանը գրառում է կատարել

«The Promise» ֆիլմի ամերիկահայ պրոդյուսեր, Էրիկ Էսրայելյանն ինստագրամյան իր էջում անդրադարձ է կատարել հայ-ադրբեջանական սահմանին տիրող իրավիճակին ու Ադրբեջանի նախահարձակ ագրեսիվ գործողություններին։ Նա հրավիրել է բոլոր իր հետևորդների ուշադրությունը.

«Խնդրում եմ տարածել: Ողջ աշխարհում մարդու իրավունքների և ազատությունների ամենացածր ցուցանիշներից մեկն ունեցող երկիրը անխղճորեն հարձակվել է հարևան պետության վրա: Սա կարող է ձեզ ծանոթ թվալ, սակայն այն չէ, ինչ դուք լուրերով լսում եք։ Հայերը կրկին հարձակման են ենթարկվել, իսկ Ադրբեջանը պարգևատրվում է մեղսակցությամբ, ապատեղեկատվությամբ և լռությամբ: 

Այլևս ոչ մի հայի արյուն՝ հանուն նավթի: Աշխարհում քրիստոնեությունն ընդունած առաջին պետությունը, որը եղել է նաև նորարարության, մշակույթի, երաժշտության, արվեստի, սննդի, գինու և ուղեղի ներուժի աղբյուր, չպետք է տուժի միայն այն պատճառով, որ վաճառքի հանելու նավթ և գազ չունի։ Հայերը կրթել են ձեզ, նրանք կերակրել են ձեզ, դուք ոգևորել եք նրան մրցումների ժամանակ և մասնակցել նրանց համերգներին`նվագելով իրենց երաժշտությունը, Նրանք ձեզ զվարճացրել են, և դուք նրանց հեռուստացույցով դիտել եք, նրանք փրկել են ձեր կյանքը:

Խնդրում եմ ինքներդ ձեզ հարցրեք, թե ինչ եք արել այդ ամենի դիմաց։ Օգնելու համար դեռ ուշ չէ։ Ստուգեք կցված համացանցային էջերը, որպեսզի իմանաք ինչ անել: Միացյալ Նահանգները պետք է դադարեցնի հարկերի հաշվին Ադրբեջանին տրամադրվող օգնությունը։ Մենք այնքան շատ կարիքներ ունենք ԱՄՆ-ում, և մեր քաղաքացիներն անտեսվում են, որպեսզի մենք կարողանանք ընտրողաբար հովանավոր լինել մարդու իրավունքները չարաշահող որոշ կառավարությունների չարաբաստիկ հավակնություններին: Թույլ մի տվեք, որ դա շարունակվի: Դուք կարող եք օգտագործել բոյկոտի ձեր անձնական ձևերը: Քաղաքական, սպորտի, երաժշտության, առողջապահության, կրթության և այլ ոլորտներից ինձ հետ ընկերանալը բավարար չէ։ Ժամանակն է Հայաստանի կողքին կանգնելու», - իր հայանպաստ գրառումներից մեկում մասնավորապես ասել է Էսրաելյանը: