Apple Watch-ը պատահաբար հատուկ ջոկատայիններ է կանչել

Apple Watch խելացի ժամացույցը պատահաբար Սիդնեյի մարզադահլիճներից մեկում կանչել է 15 ոստիկանների, մի քանի շտապօգնության և փրկարարական ծառայությունների խումբ: Այս մասին հայտնում է News.com-ը։

Դեպքը տեղի է ունեցել հունվարի 17-ին՝ տեղական ժամանակով ժամը 07:45-ին։ Ոստիկանությունը հաղորդում է ստացել հրազենի գործադրմամբ հնարավոր հանցագործության մասին և շտապել է հաստատություն։ Սակայն ժամանելուն պես իրավապահները բախվել են միայն մարզիկների զարմացած դեմքերին։

Կարճ հետաքննությունից հետո պարզվել է, որ մարտարվեստի մարզիչ Ջեյմի Ալեյնը աղետի ազդանշան է հնչեցրել։ Սենսեյը սկսել է արդարանալ, սակայն իրավապահները ստիպել են նրան բացել հեռախոսն ու ցույց տալ զանգերի մատյանը։ Այնտեղ եղել է փրկարար ծառայությանը ելքային զանգ։

Իրավիճակի տարօրինակությանը ավելացրել է այն հանգամանքը, որ Ալեյնը չի օգտվել  հեռախոսից զանգի ժամանակ։ Մարզիչը եղել է մարզադահլիճում, իսկ iPhone-ը՝ հանդերձարանում, և բոլոր մարզիկները հաստատել են դա։

Հաջորդիվ ոստիկանությունը վերլուծել է Ալեյնի զանգի ձայնագրությունը։ Պարզվել է, որ այն արվել է Apple Watch-ով։ Դասի ժամանակ մարզիչը պատահաբար սեղմել է ժամացույցի կոճակը և այդպիսով ակտիվացրել Սիրիին։ Ձայնային օգնականը հարվածի ժամանակ լսել է Ալեյնի հաշվարկը՝ «1-1-2, 1-1-2, 1-1-2»: Սիրին այս հնչյունները շփոթել է շտապ օգնության 112 համարին զանգահարելու խնդրանքի հետ:

Զավեշտալի զուգադիպությունների շարքն այսքանով չի ավարտվել։ Երբ 112-ի օպերատորը վերցրել է հեռախոսը, նա լսել է աղմուկ և հարվածներ, որոնք նման են եղել կրակոցների, իսկ հետո լսվել է Ալեյնի ձայնը. «Լավ կրակոց էր»:

Այսպես մարզիչը գովաբանել է իր աշակերտին լավ հարվածի համար: Սակայն փրկարար ծառայության օպերատորն այս մասին չի իմացել, ուստի ահազանգն անմիջապես փոխանցել է ոստիկանություն։

Ալեյնին չեն մեղադրել 112-ին կեղծ զանգ կատարելու մեջ: Նա լրագրողներին ասել է, որ շնորհակալ է փրկարար ծառայության զգոնության համար և խոստացել է անջատել Սիրիին Apple Watch-ում: