Ռոնալդուն և «Յուվենտուսի» մյուս նախկին աստղերը կարող են որակազրկվել խարդախության մեջ ներգրավված լինելու համար

Կրիշտիանու Ռոնալդուն, Ջանլուիջի Բուֆֆոնը, Պաուլո Դիբալան, Լեոնարդո Բոնուչին և «Յուվենտուսի» նախկին ու ներկայիս այլ աստղեր կարող են որակազրկվել թուրինյան ակումբի կողմից ֆինանսական խարդախություններին մասնակցելու համար։

Լրագրող Պաոլո Զիլիանին սոցցանցում հրապարակել է փաստաթղթերի նկարներ, որոնցից պարզ է դառնում, որ վերոնշյալ խաղացողները, ի թիվս այլոց, համաձայնել են ստանալ ակումբի աշխատավարձը ծրարներով՝ կորոնավիրուսի համաճարակի ժամանակ։ Պաշտոնապես հայտարարվել էր, որ ֆուտբոլիստներն այս դժվարին ժամանակահատվածում զրկվել են իրենց աշխատավարձից, իսկ ակումբի ղեկավարությունը, մինչդեռ, կարողացել էր հաշվեկշռից դուրս գրել խոշոր կորուստները։

Մի քանի խաղացողներ արդեն խոստովանել են խարդախությունը, այդ թվում՝ Մատեյս դե Լիգտը և Մատիա Դե Շիլիոն: Ըստ նրանց՝ սխեմայի մեջ ներգրավված է եղել «Յուվեի» ավագ Ջորջիո Կիելլինին, ով մեսենջերում զրուցելիս ֆուտբոլիստներին բացատրել է, թե ինչու նրանք պետք է պաշտոնապես հրաժարվեն աշխատավարձերից:

Բոլոր խաղացողներին, ովքեր մասնակցել են այս գործընթացին, սպառնում է որակազրկում՝ առնվազն մեկ ամսով։