Վրաստանի իշխանությունները կոչ են արել Ուկրաինային «ապաշխարել»

Ուկրաինայի իշխանությունները պետք է «ապաշխարեն անցյալի մեղքերը», նախքան Վրաստանին որևէ պահանջ ներկայացնելը։ Այս մասին հայտարարել է իշխող «Վրացական երազանք-Ժողովրդավարական Վրաստան» կուսակցության նախագահ Իրակլի Կոբախիձեն, փոխանցում է Sputnik Գրուզիան։

Նա նշել է, որ Կիևը երկար տարիներ ապաստան է տվել Վրաստանի նախկին նախագահ Միխայիլ Սաակաշվիլիին։ «Նախքան Ուկրաինայի ներկայացուցիչները կխոսեն որևէ բանի մասին, նրանք պետք է ապաշխարեն անցյալի մեղքերը, շտկեն ներկայիս հանցագործությունները, ապա անցնեն այլ բաների», - ասել է Կոբախիձեն՝ մեկնաբանելով Ուկրաինայի նախագահ Վլադիմիր Զելենսկու հայտարարությունները, թե վրացական իշխանությունները «տանջում և սպանում են» Սահակաշվիլիին։

Վրացի քաղաքական գործիչը նշել է, որ Կիևը տարիներ շարունակ թաքցրել է «հանցագործ Սահակաշվիլիին» և շարունակում է ապաստան տալ հանցագործներին։ «Նրանք դեռ ապաստան են տալիս այդ հանցագործներին, չնայած այն հանգամանքին, որ Վրաստանում նրանք դատապարտվել են համապատասխան հանցագործությունների համար», - ասել է Կոբախիձեն:

Օրինակ՝ Վրաստանի ներքին գործերի նախկին փոխնախարար Գիա Լորդկիպանիձեն ներկայումս զբաղեցնում է Ուկրաինայի հակահետախուզության փոխտնօրենի պաշտոնը։