Երկրաշարժի հետևանքով մահացել է Սիրիայի վարչապետի քույրը

Սիրիայի Համա քաղաքում շենքի փլուզման հետևանքով մահացել է Սիրիայի վարչապետ Հուսեյն Առնուսի քույրը՝ Նասուբ Առնուսը, հայտնում է Al-Watan թերթը։

«Վարչապետ Հուսեյն Առնուսի քույրը՝ Նասուբ Առնուսը, մահացել է երկրաշարժից՝ շենքի փլուզման հետևանքով», - գրում է թերթը: Առնուսի հետ միասին, ինչպես գրել է թերթը, փլատակների տակ մահացել են նրա երեխաներն ու թոռները։

Այսօր վաղ առավոտյան, տեղական ժամանակով ժամը 04:17-ին Թուրքիայի հարավարևելյան Քահրամանմարաշ նահանգի Պազարջիկ շրջանում 7,4 մագնիտուդ ուժգնությամբ երկրաշարժ է տեղի ունեցել։ Արտակարգ իրավիճակների կանխարգելման և հետևանքների վերացման գրասենյակը պարզաբանել է, որ դեպքից հետո գրանցվել է ևս 42 հետցնցում, որոնցից ամենահզորը եղել է 6,6 մագնիտուդով։ Երկրաշարժը հատկապես ուժեղ է եղել Թուրքիայի Քահրամանմարաշ, Հաթայ, Ադիյաման և այլ նահանգներում։

Երկրաշարժից տուժել է նաև Սիրիան։ Telegram-ի ալիքներում հրապարակված կադրերից երևում է, որ միջադեպի հետևանքով՝ Հարիմ քաղաքը գրեթե ամբողջությամբ ավերվել է, իսկ Հալեպում փլուզվել են բազմահարկ շենքեր։ Սիրիայի առողջապահության նախարարությունը հայտնել է, որ երկրաշարժի հետևանքով զոհերի թիվը հասել է 371-ի, վիրավորվել է 1089-ը։