Ռուսաստանը չի կարող և չպետք է հաղթի. Մակրոն

Ռուսաստանը չի կարող և չպետք է հաղթի, անհրաժեշտ է շարունակել աջակցել Ուկրաինային, հայտարարել է Ֆրանսիայի նախագահ Էմանուել Մակրոնը, գրում են միջազգային ԶԼՄ-ները։

«Ռուսաստանը չի կարող և չպետք է հաղթի: Մինչ նա հարձակվում է, մենք պետք է շարունակենք տրամադրել այն ռազմական աջակցությունը, որն անհրաժեշտ է Ուկրաինայի պահպանման համար: Մենք կշարունակենք գործադրել մեր ջանքերը, և այս գիշեր միասին (Գերմանիայի կանցլերի հետ-խմբ.) մենք կքննարկենք Ուկրաինայի գործառնական կարիքները»,- ասել է Մակրոնը հինգշաբթի երեկոյան Փարիզում Ուկրաինայի նախագահի և Գերմանիայի կանցլերի հետ կայացած մամուլի ասուլիսում։

Նա նաև նշել է, որ Ֆրանսիան, իր հերթին, կշարունակի ուղեկցել Ուկրաինային հաղթանակի և նրա ինքնիշխանության ու տարածքային ամբողջականության վերականգնման ճանապարհին։

Մակրոնն ընդգծել է, որ «ագրեսիվ հանցագործությունն անընդունելի է ցանկացած պարագայում, հատկապես, եթե դա այնպիսի տերության գործողություն է, ինչպիսին Ռուսաստանն է»։

Իր հերթին, Ուկրաինայի նախագահ Վոլոդիմիր Զելենսկին կոչ է արել Ֆրանսիայի և Գերմանիայի ղեկավարներին հնարավորինս արագ Ուկրաինային ինքնաթիռներ և ծանր հեռահար սպառազինություն տրամադրել։

«Որքան շուտ Ուկրաինան ստանա հեռահար ծանր սպառազինություն, որքան շուտ մեր օդաչուները ստանան ինքնաթիռներ, այնքան շուտ կավարտվի ռուսական այս ագրեսիան, և մենք կարող ենք վերադառնալ խաղաղության Եվրոպայում»,- ասել է Զելենսկին։

Նա նաև նշել է, որ Ուկրաինան «գիտի ուժեղ լինել, գիտի երախտապարտ լինել»։