ԱՄՆ-ում 90 կիլոգրամանոց հսկա պիթոն են բռնել (լուսանկարներ)

ԱՄՆ-ում որսորդները ճահիճներում բռնել են հսկա վագրային պիթոնի, հաղորդում է CBS News-ը։

Վայրի բնության մասնագետ Մայք Էլֆենբեյնը որդու՝ Քոուլի հետ որս էր անում Ֆլորիդայի Big Cypress արգելոցում, երբ հանդիպեց իր տեսած ամենամեծ պիթոնին։

Միևնույն ժամանակ մոտակայքում գտնվող երեք որսորդներ նույնպես նկատել էին ճանապարհի երկայնքով սողացող օձին։ «Մենք իրար չէինք ճանաչում։ Բայց մենք հինգս էլ գիտեինք, որ պետք է բռնենք այդ օձին»,- ասում է Մայքը:

Տղամարդիկ բռնել են հսկայական պիթոնին և փորձել անշարժացնել նրան, սակայն սողունը համառորեն դիմադրել է։ Տղամարդիկ օձի դեմ պայքարել են ավելի քան 45 րոպե, մինչև որ նրանց օգնության է հասել պիթոնների պրոֆեսիոնալ որսորդ Էմի Սիվին։ Մասնագետը օձին էվթանազիա է արել և տարել տուն՝ չափումներ անելու։ Սողունի քաշը կազմել է 90 կիլոգրամ, իսկ երկարությունը՝ 5,2 մետր։

Պիթոնը Ֆլորիդայում բռնված երկրորդ ամենածանր օձն է: «Դա պարզապես օձ չէր, դա հրեշ էր», - ասում է Մայքը: Պիթոնի ստամոքսում հայտնաբերվել են սպիտակապոչ եղնիկի սմբակներ։