Բուժաշխատողների համար շարունակական մասնագիտական զարգացման դասընթացները պարտադիր կդառնան․ «Փաստ»

«Փաստ» օրաթերթը գրում է.

Առողջապահության նախարարությունն առաջարկում է լրացում կատարել «Բնակչության բժշկական օգնության և սպասարկման մասին» օրենքում՝ նախատեսելով բուժաշխատողների համար պարտադիր համարվող ՇՄԶ (Շարունակական մասնագիտական զարգացման) դասընթացներ, որոնց ցանկը, անհրաժեշտությունից ելնելով, կսահմանի կառավարությունը: Որպես օրինակ կարող են լինել արտակարգ իրավիճակներում, աղետների ժամանակ տուժածներին ցուցաբերվող անհետաձգելի բուժօգնության կամ օրինակ բուժաշխատողների մասնագիտական էթիկայի կանոնների վերաբերյալ դասընթացները։

Նշվում է, որ ներկա իրավակարգավորումների համաձայն, յուրաքանչյուր հնգամյա շրջափուլում ավագ բուժաշխատողների համար նախատեսված է 220, դեղագետների համար՝ 160, միջին բուժաշխատողների համար՝ 140, դեղագործների համար՝ 100 ՇՄԶ կրեդիտ։ Նշված կրեդիտնեը բուժաշխատողները ձեռք են բերում իրենց ցանկությամբ տարբեր ՇՄԶ միջոցառումներին մասնակցելով, գիտական աշխատանքների/ աշխատությունների հրատարակման միջոցով, արտերկրի համալսարանական կլինիկաներում/գիտահետազոտական կենտրոններում չկրեդիտավորված վերապատրաստման դասընթացների մասնակցության միջոցով և այլն։

Կրեդիտավորված միջոցառումներին մասնակցությունը կամավոր է, և բուժաշխատողն ինքն է որոշում, թե իր մասնագիտությանը վերաբերող որ միջոցառմանը, կամ հարակից համարվող միջոցառմանը մասնակցի։ Ներկայում, հաշվի առնելով արտաքին մարտահրավերները, ինչպես նաև նոր ձևավորվող մշակույթները (օրինակ վերջերս ընդունված բուժաշխատողի մասնագիտական էթիկայի կանոնները), անհրաժեշտ է որոշ դասընթացներ պարտադիր դարձնել բուժաշխատողների համար՝ ապահովելով տարբեր իրավիճակներում վերջիններիս պատրաստվածության բարձր մակարդակ։