Անցնող տարին աշխարհում

Արդեն հաշված ժամեր են մնացել 2011 թվականի ավարտին և 2012 թվական մուտք գործելուն: Կարելի է ասել, որ 2011 թվականը աշխարհաքաղաքական զարգացումների առումով այնքան էլ խաղաղ չանցավ: Այս տարում գլոբալ և տարածաշրջանային քաղաքական գործընթացներին և մարտահրավերներին հասարակություններն այնպիսի ադեկվատ արձագանք էին տալիս, որ յուրաքանչյուր կառավարման համակարգ` մասնավորապես` ավտորիտար կառավարման համակարգերը չէին կարողանում դիմագրավել հասարակությունների բուռն ճնշումներին:

2011 թ-ին արաբական աշխարհում տեղի ունեցող հեղափոխությունների ալիքը չէր կարող իր ազդեցությունը չթողնել շատ ավտորիտար կառավարման համակարգերի  վրա: Այստեղ իսկապես տեղին է ասել, որ յուրաքանչյուր իշխանություն պատկանում է ժողովրդին: 2011 թ-ի փետրվարին առաջին ավտորիտար ռեժիմը, որ տեղի տվեց հասարակության ճնշումներին Եգիպտոսն էր: Եգիպտոսի նախագահ Հոսնի Մուբարաքի ռեժիմը, երկար ժամանակ փորձելով ճնշել երկրի կառավարման համակարգը փոխել ցանկացող հասրակության ոգին, այնուամենայնիվ, տեղի տվեց հասարակության լայն զանգվածների ճնշումներին: Այնուհետեև հեղափոխությունների ալիքը չշրջանցեց Լիբիան, Եմենը, Մերձավոր արևելքի երկրներից Սիրիան և մենք ականատես եղանք և կարծում եմ, որ դեռ ականատես կլիենք, թե ինչես կարծրացած ավտորիտար ռեժիմներ ունեցող երկրների հասարակությունները կարող են հեղափոխություններ անել և տապալել կառավարման այդ ռեժիմները: