Միավորման անվան տակ քանդում են հերթական բուհը. «Հրապարակ»

«Հրապարակ» թերթը գրել է.

ՀՀ կառավարությունը սեպտեմբերի 12-ին հաստատեց «Ոստիկանությունում ծառայության մասին», «Փրկարար ծառայության մասին» եւ մի շարք այլ օրենքներում փոփոխություններ կատարելու նախագիծը եւ այն կներկայացնի ԱԺ։ Նախագծով նախատեսվում է միավորել Ոստիկանության կրթահամալիրը եւ Ճգնաժամային կառավարման պետական ակադեմիան եւ վերակազմակերպման արդյունքում ձեւավորել ՆԳՆ ենթակայությամբ գործող մեկ միասնական ուսումնական հաստատություն։ Ըստ ՔՊ-ականների, նպատակն է՝ ձեւավորել կառավարման միասնական արդյունավետ մոդել։ 

Իրականում սրանով կքանդվի Ճգնաժամային կառավարման պետական ակադեմիան։ Ոստիկանության կրթահամալիրն արդեն քանդել են․ սկսեցին 2020-ին` ավարտեցին 2023-ին։ 2020 թ. հունիսին թավշյաները «Ոստիկանության մասին» օրենքում փոփոխություններ եւ լրացումներ կատարեցին, եւ սկսվեց ոստիկանության կազմում պարեկային ծառայության ձեւավորումը։ Պարեկները պետք է փոխարինեն պարեկապահակային ծառայությանը եւ ճանապարհային ոստիկանությանը: Բայց պարեկ դառնալու համար Ոստիկանության ակադեմիա ավարտել պետք չէ, իրավաբան լինել պետք չէ։ Ընդհանրապես, բարձրագույն կրթություն պետք չէ։ Պարեկային ծառայության ներդրումից հետո Ոստիկանության ակադեմիայի դիմորդների քանակը նվազել է: 2020-ին Ակադեմիա է ընդունվել  31, 2021-ին՝ 24, 2022-ին՝ 19 հոգի։ Մարդիկ տեսան, որ ոստիկան դառնալու համար կարիք չկա 4 տարի սովորել, «գլուխ կոտրել», ի՞նչ իմաստ ունի Ակադեմիա ընդունվելը։

Սա Ոստիկանության կրթահամալիրը քանդելու սկիզբն էր, ավարտն անցած տարի էր, երբ կառավարությունը հաստատեց բուհերում պետպատվերով տեղերը, ու Ոստիկանության ակադեմիայում տեղեր չառանձնացվեցին, այն դեպքում, երբ տարիներ շարունակ այս բուհում 55 նման տեղ էր լինում, եւ բուհն ավարտողներն աշխատանքի էին անցնում ոստիկանության տարբեր ստորաբաժանումներում։ Անվճար տեղեր դեռ կան Ճգնաժամային կառավարման պետական ակադեմիայում։ Ավելին, երբ նախահեղափոխական տարիներին դեռեւս կար «Արցախ» անունով հայկական պետություն, «Հայաստան» անունով հայկական պետության կառավարությունը Ճգնաժամային կառավարման պետական ակադեմիայում 5 անվճար տեղ էր առանձնացնում Արցախի քաղաքացիների համար։ Այս տարի Ճգնաժամային կառավարման պետական ակադեմիայի բակալավրի ծրագիր է ընդունվել 80 դիմորդ՝ ապագա փրկարար, ճգնաժամային կառավարիչ, քաղաքացիական պաշտպանության մասնագետ։ Իսկ քանի՞ հոգի է այս տարի ընդունվել ոստիկանության քանդված ակադեմիայի բակալավրի ծրագիր։ Թող ոստիկանությունն ասի։ 

Դառնանք միավորմանը, որն իրականում բուհ քանդելու ծրագիր է։ Երբ լուծարում էին արտակարգ իրավիճակների նախարարությունն ու փրկարար ծառայության, ոստիկանության, միգրացիայի եւ քաղաքացիության ծառայության միավորմամբ ձեւավորում ներքին գործերի նախարարություն, էլի խոսում էին արդյունավետության բարձրացումից։ Իրականում քանդեցին փրկարար ծառայությունը։ Այսօր Ծառայությունն ունի մեկ տնօրեն եւ երեք փոխտնօրեն։ Տնօրեն Կամո Ցուցուլյանը, փոխտնօրեններ Դավիթ Սարգսյանն ու Եգոր Կարապետյանը փրկարարությունից բան չեն հասկանում, յուրաքանչյուրն ավելի քան 20 տարվա ոստիկան է ու միանգամից նշանակվել է փրկարար ծառայության ղեկավար կազմում։ ՓԾ երրորդ փոխտնօրեն Տիգրան Պետրոսյանն այս համակարգում է 2004 թվականից։ Բայց նրան նշանակել են ոչ թե այն բանի համար, որ լավագույնն է, այլ այն, որ, ըստ ներսից ստացված տեղեկատվության, «խելոք գառը յոթ մոր կաթ է ուտում» սկզբունքով է ապրում։ Ամեն դեպքում, փրկարար ծառայության չորս ղեկավարից երեքը փրկարարության հետ կապ չունի։ Սրան զուգահեռ, ոստիկան Կամո Ցուցուլյանը, դառնալով փրկարար ծառայության տնօրեն, փրկարարությունից անտեղյակ, յուրային ոստիկաններին առանցքային պաշտոններ է տվել Ծառայությունում։ Դե, թող ներքին գործերի նախարարությունն ասի, 2023 թվականի հունվարից, երբ Ցուցուլյանը դարձավ փրկարար ծառայության ղեկավար, քանի ոստիկան է առանցքային պաշտոն ստացել փրկարար ծառայությունում, ու դրանով որքանով է աճել ծառայության աշխատանքի արդյունավետությունը։ Վստահաբար՝ չի աճել։ 

Միայն մեկ օրինակ՝ փրկարար ծառայության յոթ վարչությունից երեքը տեւական ժամանակ է՝ պետ չունի։ Սա չի խոսում արդյունավետ կառավարման եւ աշխատանքի մասին։ Ուստի պնդում ենք․ ինչպես ՆԳՆ ձեւավորելով քանդվեցին պետական կարեւոր օղակներ, կառույցներ, այնպես էլ Ոստիկանության կրթահամալիր եւ Ճգնաժամային կառավարման պետական ակադեմիա բուհերի միավորումը քանդարարություն է։ Ոչ ավելին։

Արեգ ՄԱՐԳԱՐՅԱՆ