Վահագն Խաչատուրյանը ոգեշնչվել է որդուց և որոշել ինքն էլ գիտնական դառնալ. Հրապարակ

«Հրապարակը» գրել էր, որ Հայաստանի պետական տնտեսագիտական համալսարանը ռեկտորի թափուր տեղի համար մրցույթ է հայտարարել, հայտերի ընդունումն ավարտվել է հուլիսի 28-ին: Իսկ բուն մրցույթը կայանալու է սեպտեմբերի 6-ին: Նախկին դեսպան Էդգար Ղազարյանը «Հրապարակի» հետ զրույցում հայտնել էր, որ ինքն էլ է դիմել ռեկտորի պաշտոնի համար: Մեր տեղեկություններով՝ կա եւս երեք թեկնածու: Իշխանության ցանկալի թեկնածուն ռեկտորի ԺՊ Արմեն Գրիգորյանն է: Թեկնածուներից մեկն էլ ՀՊՏՀ ուսումնական բաժնի պետ, 2013-2023թթ՝ Տնտեսության կարգավորման եւ միջազգային տնտեսական հարաբերությունների ֆակուլտետի դեկանի տեղակալ, համատեղությամբ՝ տնտեսագիտության տեսության ամբիոնի դոցենտ Արսեն Պետրոսյանն է:

Առաջադրվել է նաեւ տնտեսագիտության դոկտոր, բուհի երկարամյա դասախոս Ատոմ Մարգարյանը: Մենք տեղեկացանք, որ Տնտեսագիտականի հոգաբարձուների խորհուրդն արդեն իսկ քայլեր է մշակել` վաղը ԶԼՄ-ների աշխատանքը խոչընդոտելու համար: Ռեկտորի թեկնածու նախկին դեսպան Էդգար Ղազարյանը մեզ հետ զրույցում նշեց, որ ՀՀ նախագահ Վահագն Խաչատուրյանն ապօրինաբար է զբաղեցնում բուհի կառավարման խորհրդի նախագահի պաշտոնը: Այս առիթով ինքը դիմել է Կոռուպցիայի կախարգելման հանձնաժողովին, հանձնաժողովից պատասխանել են, որ պետք է հարցը քննարկեն, սակայն հանձնաժողովն այս պահին չունի բավարար քանակով անդամներ:

- Իսկ ինչո՞ւ է Կոռուպցիայի կանխարգելման հանձնաժողովը «ականջի ետեև» գցել Ձեր դիմումը: Ինչո՞ւ հստակ գնահատական չի տալիս նախագահ Խաչատուրյանի մասով:

- Կոռուպցիայի կանխարգելման հանձնաժողովը կազմված է հինգ անդամներից, որպեսզի նիստ կայանա, հարցեր քննարկվեն, պետք է առնվազն հինգից երեքը ներկա լինի, սակայն երկուսի պաշտոնն արդեն մեկ տարուց ավելի է, ինչ թափուր է մնացել, քանի որ ԱԺ-ն այդպես էլ հանձնաժողովի անդամներ չի ընտրում: Մեկն էլ գնացել է արձակուրդ և ըստ հրամանի` սեպտեմբերի 10-ին է վերադառնալու արձակուրդից: Այսինքն` երկու անդամները չեն կարող վարույթ նախաձեռնելու մասին որոշում ընդունել, ողջ խնդիրը սա է: Ինձ տեղեկացրել են, որ իմ բարձրաձայնած խնդրի մասին նախ պետք է կարողանան վարույթ նախաձեռնել և նոր միայն որոշումներ կայացնել: Բայց դրա համար իրավազոր նիստ է անհրաժեշտ, ինչն այս պահին չի կարող լինել:

- Ըստ Ձեզ` Հանարպետության նախագահն ինչո՞ւ է զբաղեցնում ՀՏՊՏ-ի կառավարման խորհրդի նախագահի պաշտոնը: Ի՞նչ է դա նրան տալիս:

- Ստացվել է այնպես, որ բոլոր բուհերի կառավարման խորհուրդները ղեկավարում են ՔՊ-ականներ: Պոլիտեխնիկի խորհրդի ղեկավարը` Տիգրան Ավինյանն է, Արայիկ Հարությունյանը` Կառավարման ակադեմիայինը, Սուրեն Պապիկյանը` ԵՊՀ-ում, Խաչատուրյանը Տնտեսագիտականում, Կարեն Գիլոյանը` Ֆիզկուլտինստիտուտում, Ժաննա Անդրեասյանը` Մանկավարժականում: Ամեն մի ՔՊ-ական մի բուհ է ղեկավարում փաստացի: Նախկին փոխվարչապետն էլ` Բրյուսովում էր: Սա նրանց համար նաեւ պրեստիժի դրսևորում է: Բայց եթե մյուսներն օրենքով կարող են այդ պաշտոններում նշանակվել, ապա նախագահին սահմանադրությունն արգելում է: Նա չունի նման իրավունք: Ի դեպ` նա իր եկամուտների հայտարարագրում չի էլ նշել ոչ մի բան: Գրել է, որ տվյալներ պարզապես չկան, այնինչ այդպես չէ: Տնտեսագիտական համալսարանը ոչ առևտրային կազմակերպություն է: Այսպիսով` Վահագն Խաչատուրյանն ակնհայտ տեղեկություններ է թաքցնում:

- Դուք գրառում էիք արել և նշել, որ նախագահ Խաչատուրյանն իր թեկնածուական ատենախոսությունը պաշտպանել է 60 տարեկանում, իսկ իր որդին` 2018-ին: Ի՞նչ եք ակնարկում:

- Սրանք ակնհայտ փաստեր են, ԲՈԿ-ում առկա: 2018-ին իր տղան է պաշտպանել, 2020-ին` ինքը: Հավանաբար որդուց հետո Խաչատուրյանը ոգեշնչվել է և այդպես որոշել է ինքն էլ գիտնական դառնալ: Տեղեկություններ կան, որ դիսերտացիան էլ ոչ թե ինքն է գրել, այլ Աշոտ Մարկոսյանը:

- Բայց այս իշխանությունները զարմանում էին, որ Սերժ Սարգսյանի եղբայրը դարձել է գիտությունների թեկնածու, անվերջ քննադատում էին դա:

- Հա, մինչև հիմա ասում են Տարոն Մարգարյանն ու Սաքուլիկը դիսերտացիա են պաշտպանել, է նույնն բանն իրենք են անում հիմա, ի՞նչ տարբերություն: Հո Վահագն Խաչատրյանը գիտնական չէ, բայց հեղափոխությունից հետո իրավիճակ է փոխվել, օգտվում են առիթից: Որ գիտնական լիներ, մինչև հեղափոխությունը գիտությունների թեկնածու կդառնար, ինչի՞ սպասեց իշխանության գան նոր: Վաղը ժամը երեքին մրցույթն է: Տեսնենք թե ինչ կլինի, ես անկեղծ ասած այս մասով չունեմ տեղեկություններ, քանի որ բուհում չեմ դասավանդում: