Իսրայելը հայտարարել է, որ Իրանը բարձր գին կվճարի Նաթանյահուի նստավայրին «Հեզբոլլահի» հարվածի համար

Իսրայելի քաղաքական գործիչները շաբաթ երեկոյան իրենց հռետորաբանությունն ուղղել են  Իրանի դեմ՝ խոստանալով, որ Թեհրանը «բարձր գին կվճարի» վարչապետ Բենիամին Նաթանյահուի տան վրա լիբանանյան «Հեզբոլլահի» անօդաչուի հարվածի համար, գրում է Times of Israel-ը։ Շաբաթ առավոտյան երեք անօդաչու է արձակվել Լիբանանից՝ թիրախավորելով վարչապետի մասնավոր նստավայրը։ Երկուսը կալանվել են Ռոշ Հանիկրայի և Նահարիայի վրա, իսկ երրորդը պայթել է կենտրոնական ծովափնյա Կեսարիա քաղաքում, որը հայտնի է իր շքեղ առանձնատներով և հնագույն ավերակներով: Հարձակման պահին վարչապետն ու նրա կինը տանը չեն եղել։

Հանրային հեռարձակող Kan-ը հայտնել է, որ հարձակումից հետո Նաթանյահուի տուն են եկել հարկային ծառայության աշխատակիցները և  այգեպանը:

Նախնական հաստատմամբ, որ իր տունն է եղել անօդաչուի հարվածի թիրախը, Նաթանյահուն հայտարարություն է տարածել՝ նշելով, որ «Իրանի գործակալները, որոնք այսօր փորձել են սպանել ինձ և կնոջս, ծանր սխալ են թույլ տվել»: Նրա խոսքին արձագանքել են նրա կառավարության շատ նախարարներ և ընդդիմադիր օրենսդիրներ, ինչպես նաև արտերկրում դաշնակիցներ, որոնցից շատերը հայտարարել են, որ Իրանը «ստիպված կլինի զղջալ իր դրածո «Հեզբոլլահի» գործողությունների համար»:

Իսրայելի պաշտպանության նախարար Յոավ Գալանտը, գովաբանելով պաղեստինյան ՀԱՄԱՍ խմբավորման ոչնչացման և «Հեզբոլլահի» մարտունակության նվազեցման հարցում Իսրայելի ձեռքբերումները, սպառնացել է, որ Իսրայելի անվտանգության ծառայությունները «շարունակելու են գրոհել ցանկացած ահաբեկչի և ուժային հարված հասցնել ցանկացած թշնամու, որը կվնասի  կամ կփորձի վնասել Իսրայել պետությանը»։

«Մեր գործողություններն ամբողջ Մերձավոր Արևելքում դա ապացուցել են մինչ օրս և կապացուցեն նաև ապագայում: Մեզ շփոթեցնելու և պատերազմի նպատակներին հասնելուն խոչընդոտելու «Հեզբոլլահի» փորձերը հաջողությամբ չեն պսակվի»,- ասել է նա։

աղբյուր՝ News.am